Галатӧ 4 - Коми Библия 2023

¹ Нӧшта висьтала: пиыс, кодлы вуджӧ бать овмӧсыс, ичӧт арлыднас нинӧмӧн оз торъяв кесйӧгысь, кӧть сійӧ став вылас нин ыджыд.

² Батьыслӧн урчитӧм кадӧдз керканас веськӧдлӧны мукӧдъяс, ачыс пиыс кага видзысь киын.

³ Кодыр ми вӧлім кага кодьӧсь, вӧлім муюгыд вынъяслӧн кабыр улынӧсь.

⁴ А кор воис урчитӧм кадыс, Енмыс мӧдӧдіс Ассьыс Писӧ, кодӧс ань чужтіс. Ен Пи оліс Индӧд улын,

⁵ медым ньӧбны Индӧд улын олысьясӧс, босьтны миянӧс ныв-пи пыдди.

⁶ Ӧні ті Енмыслӧн ныв-пи. Та вӧсна Ен сетіс сьӧлӧманыд Пиыслысь Ловсӧ. Тайӧ Лолыс шыасьӧ: «Авва, Батьӧй!»

⁷ Сідзкӧ, ті абу нин кесйӧгъяс, ті – ныв-пи. Ныв-пи кӧ, сідзкӧ, Исус Кристос пыр Енсянь вичмӧдӧмасӧ босьтысьяс.

Эскысьяс вӧсна майшасьӧм

⁸ Кор ті энӧ на тӧдӧй Енсӧ, вӧлінныд мукӧд енъяслӧн кипод улынӧсь. Збыльвылас, найӧ абу енъяс.

⁹ Но ӧні ті тӧданныд Енсӧ, бурджык шуны, Енмыс тӧдӧ тіянӧс. Сідзкӧ, мыйла ті бӧр бергӧдчанныд муюгыдса ковтӧм жеб вынъяс дінӧ да важ мозыс бара кӧртасянныд сэтчӧ?

¹⁰ Кутчысянныд торъя лунъясӧ, тӧлысьясӧ, воясӧ да кадъясӧ.

¹¹ Пола тіян вӧсна – буракӧ, менам весьшӧрӧ мырсьӧма-уджалӧма.

¹² Вокъяс, кора тіянӧс, лоӧй ме кодь, ӧд ме тіян кодь. Ті менӧ нинӧмӧн энӧ дӧзмӧдӧй.

¹³ Ті тӧданныд, мый тіян дінӧ волігӧн ме висьми, но тайӧ сетіс позянлун медводдзаысь висьтавны тіянлы Бур Юӧрсӧ.

¹⁴ Висьӧмӧй вылӧ видзӧдтӧг ті сибӧдінныд менӧ, энӧ кедзовтӧй да энӧ эновтӧй. Сибӧдінныд Ен анделӧс моз, Исус Кристосӧс моз.

¹⁵ Кутшӧм шудаӧсь ті сэки вӧлінныд. А ӧні мый лои? Тіян йылысь верма шуны: позис кӧ, ті ассьыныд синтӧ эськӧ перйинныд да сетінныд меным.

¹⁶ Збыльсӧ висьталӧм вӧсна ме ӧмӧй тіянлы паныд сувтысьӧн лои?

¹⁷ Кодсюрӧ оз бур могысь тӧждысьны тіян вӧсна. Найӧ кӧсйӧны янсӧдны миянӧс, медым ті тӧждысинныд на вӧсна.

¹⁸ Тӧждысьӧмыд бур, ті кӧ пыр вӧчанныд тайӧс, онӧ сӧмын ме дырйи.

¹⁹ Челядь, меным бара лоӧ сьӧкыда чужтыны тіянӧс, кытчӧдз Кристос оз тыдовтчы тіян олӧмын.

²⁰ Кӧсйи эськӧ ӧні лоны тіян дінын, мед тӧдны, кутшӧм ногӧн сёрнитны тіянкӧд. Ме ог гӧгӧрво тіянӧс!

Агар да Саара

²¹ Висьталӧй меным, Индӧд улын овны кӧсйысьяс, гӧгӧрвоанныд-ӧ ті, мый висьталӧ Индӧдыс?

²² Сэні гижӧма, мый Ӧвраамлӧн вӧлі кык пи: ӧтисӧ чужтіс кесйӧгыс, мӧдсӧ – гӧтырыс.

²³ Кесйӧглӧн пиыс чужис морт кӧсйӧмсянь, гӧтырыслӧн – Енлӧн кӧсйысьӧм серти.

²⁴ Тайӧ висьталӧ кык йитӧд йылысь. Ӧти йитӧдсӧ вӧлі кӧрталӧма Синай керӧсын – тайӧ Агар, сылӧн ныв-пиыс кесйӧгъяс.

²⁵ Агарыс индӧ Аравияын Синай керӧс вылӧ да лӧсялӧ ӧнія Ерусалимлы. Сійӧ аслас челядькӧд кесйӧг туйын.

²⁶ Енэжвыв Ерусалимыс – мездлуна кар, сійӧ миянлы ставнымлы мам.

²⁷ Гижӧма: – Нимкодясь, сьӧктыны вермытӧм, кага вайлытӧм ань! Гораа нимкодясь да гажӧдчы, чужтан дой тӧдлытӧм ань! Ӧд эновтӧмалӧн ныв-пиыс уна, ёна унджык верӧсыскӧд олысьлӧн дорысь.

²⁸ Вокъяс, ми Исаак моз кӧсйысьӧм серти чужысь ныв-пи.

²⁹ Сэки вир-яй кӧсйӧмсянь чужысьыс вӧтліс Ловсянь чужысьсӧ. Тадзи тшӧтш ӧні.

³⁰ Гижӧдыс мый висьталӧ? Вӧтлы кесйӧг аньсӧ пиыскӧд. Тэнад овмӧсыд мед оз вудж сылӧн пилы, а вуджас сӧмын гӧтырлӧн пиыслы.

³¹ Вокъяс, ми абу кесйӧгыслӧн, а гӧтырыслӧн ныв-пи.