Езекиль 48 - Коми Библия 2023

Му юклӧм

¹ «Израиль чужанкотыръяслӧн нимъяс серти муясыс татшӧмӧсь. Войвылын лоӧ Дан чужанкотырлӧн муыс. Сылӧн войвыв мудорыс нюжӧдчас Хетлон туйӧд Лево-Хаматӧдз, водзӧ Хацар-Энан карӧдз. Дамаск да Хамат муяс лоӧны мудор войвывладорын. Тайӧ муыс асыввывсянь саридз дорӧдз лоӧ Данлӧн.

² Дан чужанкотырлӧн му лунвывладорын асыввывсянь рытыввылӧдз лоӧ Асир чужанкотырлӧн муыс.

³ Асир чужанкотырлӧн му лунвывладорын асыввывсянь рытыввылӧдз лоӧ Неффалим чужанкотырлӧн муыс.

⁴ Неффалим чужанкотырлӧн му лунвывладорын асыввывсянь рытыввылӧдз лоӧ Манассей чужанкотырлӧн муыс.

⁵ Манассей чужанкотырлӧн му лунвывладорын асыввывсянь рытыввылӧдз лоӧ Ефрем чужанкотырлӧн муыс.

⁶ Ефрем чужанкотырлӧн му лунвывладорын асыввывсянь рытыввылӧдз лоӧ Рувим чужанкотырлӧн муыс.

⁷ Рувим чужанкотырлӧн му лунвывладорын асыввывсянь рытыввылӧдз лоӧ Иуда чужанкотырлӧн муыс.

⁸ Иуда чужанкотырлӧн му лунвывладорысь асыввывсянь рытыввылӧдз торйӧдӧй кызь вит сюрс гырддза пасьта му. Кузьтанас асыввывсянь рытыввылӧдз муыс мед лоӧ чужанкотыръяслӧн муяс кодь. Сэні шӧрас мед лоӧ вежаин.

⁹ Тайӧ торйӧдӧм муысь Господьлы торйӧдӧй кызь вит сюрс гырддза кузьта да кызь сюрс гырддза пасьта му.

¹⁰ Тайӧ вежа му юкӧныс лоӧ попъяслы. Сійӧ лоӧ кызь вит сюрс гырддза кузьта да дас сюрс гырддза пасьта. Кузьтасӧ лоӧ мурталӧма рытыввывсянь асыввылӧ, пасьтасӧ войвывсянь лунвылӧ. Попъяслӧн му шӧрас лоӧ Господьлӧн вежаин.

¹¹ Тайӧ муыс лоӧ Садок рӧдысь вежа попъяслы, кодъяс дугдывтӧг кесъялісны Меным да эз кежны Меысь левитъяс моз, кор Израиль войтыр кежис Меысь.

¹² Садок рӧдысь попъяслы вичмас торйӧдӧм муысь вежасьыс-вежа му юкӧн. Сійӧ лоӧ левитъяслӧн мукӧд орччӧн.

¹³ Левитъяслы лоӧ попъяслӧн му бердысь кызь вит сюрс гырддза кузьта да дас сюрс гырддза пасьта му. Попъяслӧн да левитъяслӧн муясыс ӧтлаын лоӧны кузьтанас кызь вит сюрс гырддза, пасьтанас – кызь сюрс гырддза.

¹⁴ Господьлы торйӧдӧм мусӧ оз позь вузавны ни вежны, оз позь сетны киысь киӧ, ӧд тайӧ медбур му юкӧныс Господьлӧн. Сійӧ – вежа му.

¹⁵ Торйӧдӧм муысь кольӧм вит сюрс гырддза пасьта да кызь вит сюрс гырддза кузьта юкӧныс абу вежа. Сэні лоӧны карса керкаяс, а на гӧгӧрыс – видз-муяс.

¹⁶ Войвывладорсянь, лунвывладорсянь, асыввывладорсянь да рытыввывладорсянь карыс лоӧ нёль сюрс витсё гырддза кузьта.

¹⁷ Кар гӧгӧрыс лоӧны видзьяс. Войвывладорсянь, лунвывладорсянь, асыввывладорсянь да рытыввывладорсянь тайӧ восьсаиныс лоӧ кыксё ветымын гырддза кузьта.

¹⁸ Вежа му юкӧн бокын коляс асыввылын да рытыввылын дас сюрс гырддза кузьта му. Тайӧ видз-муяс вылысь вотӧс-быдтасыс лоӧ карса уджалысьяслы.

¹⁹ Карса уджалысьяс, кодъяс лоӧны став Израиль чужанкотырысь, мед вӧдитӧны тайӧ мусӧ.

²⁰ Торйӧдӧм муыс, кытчӧ пырӧны вежа му юкӧныс да карса муыс, лоӧ нёль пельӧса, кузьта-пасьтанас кызь вит сюрс гырддза.

²¹ Ӧксылы вичмас му, мый коляс вежа му юкӧн да карса му ӧтар-мӧдарладорсяньыс. Ӧксылӧн муыс нюжӧдчас Израильлӧн асыввыв мудорӧдз кызь вит сюрс гырддза и рытыввыв мудорӧдз кызь вит сюрс гырддза – сэтчӧ жӧ, кытчӧ чужанкотыръяслӧн муясыс. Тадзи вежа му юкӧныс да крамыс лоӧны ӧксылӧн муяс костын, Израиль му шӧрын.

²² Левитъяслӧн мусянь да карса мусянь асыввылӧ да рытыввылӧ муыс лоӧ ӧксылӧн. Сылӧн муыс лоӧ Иуда да Венямин чужанкотыръяслӧн муяс костын.

²³ Мукӧд чужанкотыръяслӧн муясыс лоӧны Израиль асыввыв мудорсянь рытыввыв мудорӧдз, торйӧдӧм му лунвывладорын лоӧ Венямин чужанкотырлӧн муыс.

²⁴ Венямин чужанкотырлӧн му лунвывладорын асыввывсянь рытыввылӧдз лоӧ Симеон чужанкотырлӧн муыс.

²⁵ Симеон чужанкотырлӧн му лунвывладорын асыввывсянь рытыввылӧдз лоӧ Иссакар чужанкотырлӧн муыс.

²⁶ Иссакар чужанкотырлӧн му лунвывладорын асыввывсянь рытыввылӧдз лоӧ Завулон чужанкотырлӧн муыс.

²⁷ Завулон чужанкотырлӧн му лунвывладорын асыввывсянь рытыввылӧдз лоӧ Гад чужанкотырлӧн муыс.

²⁸ Гад чужанкотырлӧн лунвыв мудорыс мунас Тамар карсянь Мериват-Кадеш ваяс дорӧдз, сэтысянь шорті Ыджыд саридз дорӧдз.

²⁹ Тадзи юклӧй му Израиль чужанкотыръяслы. Юклӧй сійӧс пудъясьӧмӧн, – висьталӧ Господь Ыджыдыс».

Ерусалим карса дзиръяяс

³⁰ «Ерусалим кар войвывладорын нёль сюрс витсё гырддза кузьта стенмын карса дзиръяясысь

³¹ лоӧ куим дзиръя. Дзиръяяслӧн нимъясыс лоӧны Израиль чужанкотыръяслӧн ним серти. Войвыв стенмын лоӧны Рувимлӧн, Иудалӧн да Левийлӧн дзиръяяс.

³² Нёль сюрс витсё гырддза кузьта асыввыв стенмын лоӧ куим дзиръя – Ӧсиплӧн, Веняминлӧн да Данлӧн.

³³ Нёль сюрс витсё гырддза кузьта лунвыв стенмын лоӧ куим дзиръя – Симеонлӧн, Иссакарлӧн да Завулонлӧн.

³⁴ Нёль сюрс витсё гырддза кузьта рытыввыв стенмын лоӧ куим дзиръя – Гадлӧн, Асирлӧн да Неффалимлӧн.

³⁵ Ставнас карса стенмыс лоӧ дас кӧкъямыс сюрс гырддза кузьта. Тайӧ лунсяньыс Ерусалим карлӧн нимыс лоӧ ”Тані Господь”».