Езекиль 46 - Коми Библия 2023

¹ «Господь Ыджыдыс тадзи висьталӧ: квайт уджалан лун чӧж пытшкӧс йӧрӧ нуӧдысь асыввыв пыранін мед лоӧ пӧдса, а шойччан лунӧ да выль тӧлысь пасъян лунӧ мед лоӧ восьса.

² Ӧксылы колӧ пырны посводзӧд тайӧ пыранінас да сувтны ӧдзӧс курич дорӧ. Попъяс мед ваясны ӧксылысь сотан да бурасян висьяссӧ. Пыранін тагӧс дорын ӧксы мед копыртчылас Господьлы да бӧр петас. Пыраніныс рытӧдзыс мед лоӧ восьса.

³ Тайӧ пыраніныслӧн ӧдзӧс дорын войтырыс мед шойччан лунӧ да выль тӧлысь пасъян лунӧ копыртчылас Господьлы.

⁴ Шойччан лунӧ ӧксы мед вайӧ Господьлы сотан вись пыдди дзоньвидза квайт баляпиӧс да дзоньвидза ӧти межӧс.

⁵ Нянь вись пыдди ӧксы мед вайӧ ефа мында пызь межкӧд, а быд баляпикӧд мед вайӧ пызьсӧ сы мында, мыйта кӧсйӧ. Ефа мында пызькӧд колӧ вайны гин мында олив вый.

⁶ Выль тӧлысь пасъян лунӧ ӧксы мед вайӧ сотан вись пыдди дзоньвидза ӧти ӧшкӧс, дзоньвидза квайт баляпиӧс да дзоньвидза ӧти межӧс.

⁷ Нянь вись пыдди ӧксы мед вайӧ ефа мында пызь ӧшкӧд да ефа мында пызь межкӧд, а быд баляпикӧд мед вайӧ пызьсӧ сы мында, мыйта кӧсйӧ. Ефа мында пызькӧд колӧ вайны гин мында олив вый.

⁸ Ӧксылы колӧ пырны пыранінлӧн посводзӧдыс и петны тадзи жӧ.

⁹ Гажӧдчан лунъяс дырйи Израиль войтыр мед локтас Господь водзӧ. Войвыв пыранінӧд юрбитны локтысь мед петас лунвыв пыранінӧд, а лунвыв пыранінӧд локтысь мед петас войвыв пыранінӧд. Некод мед бӧрсӧ оз пет сійӧ пыранінӧдыс, кыті пырис. Петны колӧ воча сулалысь пыранінӧд.

¹⁰ Ӧксылы колӧ пырны и петны войтырыскӧд ӧтлаын.

¹¹ Гажӧдчан лунъяс дырйи ӧксы мед вайӧ нянь вись пыдди ефа мында пызь быд ӧшкӧд да быд межкӧд, а быд баляпикӧд мед вайӧ пызьсӧ сы мында, мыйта кӧсйӧ. Ефа мында пызькӧд колӧ вайны гин мында олив вый.

¹² Ӧксы кӧ ас кӧсйӧм серти ваяс Господьлы сотан вись либӧ бурасян вись, сылы мед восьтасны асыввыв пыранінсӧ. Сійӧ мед ваяс сотан да бурасян висьяссӧ шойччан лун дырйи моз. Сэсся мед петас, а пыранінсӧ мед пӧдлаласны.

¹³ Быд асыв вайӧй Господьлы сотан вись пыдди дзоньвидза арӧса баляӧс.

¹⁴ Быд асыв балякӧд ӧтлаын нянь вись пыдди вайӧй Господьлы шобді пызь – ефалысь квайтӧд юкӧнсӧ, да олив вый – гинлысь коймӧд пайсӧ, медым гудравны сыӧн шобді пызьсӧ. Тайӧ тшӧктӧмсӧ лӧсьӧдӧма нэмъяс кежлӧ.

¹⁵ Быд асыв вайӧй сотан вись пыдди баляӧс, нянь вись да олив вый».

Ӧксылӧн му

¹⁶ «Господь Ыджыдыс тадзи висьталӧ: ӧксы кӧ аслас пиян пӧвстысь кодлыкӧ козьналас му, сэки тайӧ муыс вуджӧ пиыслы, а сы бӧрся – пияныслы.

¹⁷ Ӧксы кӧ аслас кесйӧглы козьналас му, муыс лоӧ кесйӧглӧн тшупӧда воӧдз, но тшупӧда вонас муыс бӧр вуджӧ ӧксылы. Ӧксылӧн муыс сылӧн кулӧм бӧрын вичмас пияныслы.

¹⁸ Ӧксылы оз позь мырддьыны войтырыслысь мусӧ да вӧтлыны найӧс сэтысь. Сійӧ сӧмын аслас юкӧнысь вермӧ мусӧ сетны пияныслы. Менам войтыр пӧвстысь некодӧс мед оз ло вӧтлӧма аслас му юкӧнысь».

Пусянінъяс

¹⁹ Морт вайӧдіс менӧ керкалань, кӧні попъяслӧн вежа жыръясыс видзӧдісны войвылӧ. Сійӧ вайӧдіс менӧ ветлан коластӧд, мый муніс пыранін пӧлӧн. Ветлан коластлӧн рытыввыв пом йылысь

²⁰ морт шуис меным: «Тані попъяс мед пуӧны мыж вештан вись пыдди да мыжысь вись пыдди вайӧм пемӧсъяслысь яйсӧ. Тані мед пӧжалӧны нянь вись. Яйсӧ да няньсӧ мед оз петкӧдны ортсы йӧрӧ, медым тайӧ вежаторъяснас эз инмыны войтырыс дінӧ да тадзи эз вежӧдны найӧс».

²¹ Сэсся морт петкӧдіс менӧ ортсы йӧрӧ да нуӧдіс йӧрлӧн нёльнан пельӧсӧ. Ме аддзи, мый ортсы йӧрлӧн быд пельӧсын вӧлі ичӧтик йӧр.

²² Быд ичӧтик йӧр вӧлі вевттьӧма, найӧ вӧліны нелямын гырддза кузьтаӧсь да комын гырддза пасьтаӧсь.

²³ Йӧръяссӧ вӧлі кытшалӧма стенмӧн, а стен пӧлӧн вӧлі вӧчӧма пусянінъяс.

²⁴ Морт шуис меным: «Тайӧ пусянінъясын крамбердса кесйӧгъяс мед пуӧны войтырлысь висьяссӧ».