Езекиль 45 - Коми Библия 2023

Му юкӧнъяс

¹ «Кор ті понданныд пудъясьӧмӧн юклыны Израиль му, торйӧдӧй вежа юкӧн Господьлы. Кузьтанас сійӧ мед вӧлі кызь вит сюрс гырддза, а пасьтанас – кызь сюрс гырддза. Тайӧ му юкӧныс ставнас лоӧ вежа.

² Торйӧдӧй сэтысь вежаинлы витсё гырддза кузьта да витсё гырддза пасьта му, нӧшта сы гӧгӧрысь ветымын гырддза пасьта видз-му.

³ Тайӧ мусьыс муртав кызь вит сюрс гырддза кузьта да дас сюрс гырддза пасьта му юкӧн. Сійӧ лоас вежаин, вежасьыс-вежа му.

⁴ Тайӧ вежа муыс попъяслӧн, кодъяс кутасны матыстчыны Господь дінӧ, медым вежаинын кесъявны Сылы. Сэні лоӧны налӧн керкаясыс да вежаин.

⁵ Мӧд му юкӧныс, мый тшӧтш кызь вит сюрс гырддза кузьта да дас сюрс гырддза пасьта, лоӧ крамын кесъялысь левитъяслы. Сэтчӧ найӧ вермасны лэптыны керкаяснысӧ.

⁶ Вежа му юкӧн бокысь торйӧдӧй карлы вит сюрс гырддза пасьта да кызь вит сюрс гырддза кузьта му юкӧн, кӧні лоӧны Израиль войтырлӧн керкаясыс.

⁷ Вежа му юкӧн бердысь да карлы торйӧдӧм му юкӧн бердысь му юкӧныс лоӧ ӧксылы. Ӧксылӧн му юкӧныс мед нюжӧдчӧ рытыввылӧ да асыввылӧ – сэтчӧ жӧ, кытчӧ нюжӧдчӧны Израиль чужанкотыръяслӧн му юкӧнъясыс.

⁸ Тайӧ му юкӧныс лоӧ Израильлӧн ӧксылы, медым Менам ӧксыяс эз дзескӧдны Менсьым войтырӧс, а лэдзисны Израиль чужанкотыръяслы лӧня овны налы юклӧм муяс вылын.

⁹ Господь Ыджыдыс тадзи висьталӧ: ӧвсьӧй, израильса ӧксыяс! Тырмас виавны-дзескӧдны да бырӧдны! Юралӧй да мыждӧй веськыда, дугдӧй вӧтлавны Менсьым войтырӧс асланыс му юкӧнысь, – висьталӧ Господь Ыджыдыс».

Вежа гажӧдчан лунъяс дырйи висьяс

¹⁰ «Вескиныд мед стӧча веситас. Мурталан дозъясныд, ефаныд да батныд, мед стӧча петкӧдласны.

¹¹ Ыджданас ефа да бат мед вӧліны ӧткодьӧсь. Тайӧ кыкнан мурталан дозйӧ тӧрӧ хомерлӧн дасӧд пайыс. Хомерыс мед петкӧдлӧ ефалысь да батлысь йӧрыш ыдждасӧ.

¹² Сикельлӧн сьӧктаыс мед лоӧ кызь гера, а квайтымын сикель мед лоӧ ӧти мина.

¹³ Хомер мында шобдіысь тіянлы колӧ вайны вись пыдди ефалысь квайтӧд пайсӧ, хомер мында идысь тшӧтш ефалысь квайтӧд пайсӧ.

¹⁴ Бӧчка мында олив выйысь колӧ вайны батлысь дасӧд пайсӧ. Ӧти хомерӧ моз ӧти бӧчкаӧ тӧрӧ дас бат.

¹⁵ Израильса бур йирсянінъяс вылысь быд кыксё ыжысь колӧ вайны ӧтиӧс. Тайӧ висьясыс лоӧны тіян нянь висьныд, сотан висьныд да бурасян висьныд мыжнытӧ вештӧм могысь, – висьталӧ Господь Ыджыдыс. –

¹⁶ Став Израиль войтырыс мед сетӧ тайӧ вайӧмторъяссӧ Израиль ӧксылы.

¹⁷ Ӧд Израиль войтырлӧн вежа гажӧдчан лунъяс дырйи, выль тӧлысь чужигӧн да шойччан лунъяс дырйи ӧксы кывкутӧ сотан вись, нянь вись да вина вись вайӧм вӧсна. Сійӧ мед ваяс мыжысь вись да нянь вись, сотан да бурасян висьяс, медым вештыны Израиль войтырлысь мыжсӧ».

¹⁸ «Господь Ыджыдыс тадзи висьталӧ: медводдза тӧлысьлӧн медводдза лунӧ босьтӧй дзоньвидза ӧшкӧс, медым сӧстӧммӧдны вежаин

¹⁹ мыжысь вись вайӧмӧн. Поп мед босьтас ӧшлысь вирсӧ да мавтас вирнас крам куричьяс, висьпуктанін тшупӧдлысь нёльнан пельӧссӧ да пытшкӧс йӧрӧ пыранінлысь куричьяссӧ.

²⁰ Тадзи вӧчӧй тшӧтш тӧлысьыслӧн сизимӧд лунӧ на вӧсна, кодъяс мыж вӧчисны мӧвпышттӧг либӧ гӧгӧрвотӧг. Тадзи сӧстӧммӧдӧй крамсӧ.

²¹ Медводдза тӧлысьлӧн дас нёльӧд лунӧ тіян мед лоас Ыджыд лун, сэки сизим лун чӧж гажӧдчӧй да сёйӧй шомтӧм нянь.

²² Ыджыд лунӧ ӧксы мед ваяс мыжысь вись пыдди ӧшкӧс ас вӧснаыс да тайӧ муас олысь став войтырыс вӧсна.

²³ Гаж дырйи сизимнан лун чӧжыс быд лун сійӧ мед вайӧ Господьлы сотан вись пыдди дзоньвидза сизим ӧшкӧс да дзоньвидза сизим межӧс. Мыжысь вись пыдди мед быд лун вайӧ ай кӧзаӧс.

²⁴ Быд ӧшкӧд да быд межкӧд мед вайӧ нянь вись пыдди ефа мында пызь да гин мында олив вый.

²⁵ Сизимӧд тӧлысьлӧн дас витӧд лунсянь лоӧны вежа гажӧдчан лунъяс. Сизим лун чӧж ӧксы мед вайӧ мыжысь вись, сотан вись, нянь вись да олив вый, кыдзи мукӧд гажӧдчан лунъяс дырйи».