Езекиль 43 - Коми Библия 2023

Енлӧн дзирдлуныс тыртӧ крамсӧ

¹ Морт вайӧдіс менӧ асыввыв пыранін дорӧ.

² Ме аддзи, мый асыввывсянь матыстчӧ Израиль Енлӧн дзирдлуныс. Ме кылі бузгысь ыджыд валысь кодь шы. Господьлӧн дзирдлунысь муыс югдіс.

³ Татшӧм жӧ петкӧдчылӧмъяс ме аддзылі, кор Господь воліс бырӧдны Ерусалим кар, и кор ме вӧлі Кевар ю бокын. Ме кымынь уси муас.

⁴ Господьлӧн дзирдлуныс пырис крамӧ асыввыв пыранінӧд.

⁵ Лов кыпӧдіс менӧ да нуӧдіс пытшкӧс йӧрӧ. Ме аддзи, мый Господьлӧн дзирдлуныс тыртіс крамсӧ.

⁶ Менӧ нуӧдысь морт сулаліс мекӧд орччӧн, и ме кылі, мый крамысь кодкӧ шуис меным:

⁷ «Морт пиӧй, тайӧ крамыс Менам юралан пуклӧсӧй да Менам кок улӧй. Тані Ме кута овны Израиль пиян пӧвстын нэмъяс чӧж. Израиль войтыр да налӧн ӧксыясыс оз нин кутны пежавны Менсьым вежа нимӧс идолъяслы сетчӧмнас да кулӧм ӧксыясныслы ыджыд казьтылан изъяс сувтӧдӧмнас.

⁸ Ассьыныс тагӧссӧ найӧ пуктісны Менам тагӧс дінӧ да ассьыныс ӧдзӧс куричьяссӧ сувтӧдісны Менам ӧдзӧс куричьяс бердӧ, медым Меа-на костын сӧмын стен вӧлі. Найӧ пежалісны Менсьым вежа нимӧс асланыс пеж уджъясӧн. Та вӧсна Ме бырӧді найӧс скӧрйывсьым.

⁹ Но ӧні найӧ мед ылыстасны Ме дінысь идолъяснысӧ да ӧксыясныслысь шойяссӧ, и Ме кута овны на пӧвстын нэмъяс чӧж.

¹⁰ А тэ, морт пиӧй, юӧрт Израиль войтырлы тайӧ крам йывсьыс. Кор найӧ тӧдмаласны, кутшӧм ыджыд да тыр-бур тайӧ крамыс, налы яндзим лоӧ асланыс мыжъясысь.

¹¹ Налы кӧ збыльысь яндзим лоӧ, сэки тӧдмӧд найӧс крам балаӧн да тэчасногӧн, пыран-петанінъясӧн да крам йылысь индӧд-тшӧктӧмъясӧн. Гиж налы ставсӧ, медым найӧ оласны став индӧд-тшӧктӧмыс серти.

¹² Со, крам йылысь индӧдыс: керӧс вылын крамлы торйӧдӧм муыс ставнас вежасьыс-вежа. Тайӧ – крам йылысь индӧд».

Висьпуктанін

¹³ Висьпуктанінсӧ мурталӧма гырддза кузьтаӧн, сэтчӧ вӧлі пырӧ тшӧтш ки пыдӧс. Висьпуктанін гӧгӧр вӧлі ворга, джуджданас и пасьтанас ӧти гырддза. Воргасӧ вӧлі гӧгӧртӧма весьт судта дорышӧн. Висьпуктанінлӧн джудждаыс татшӧм:

¹⁴ воргасянь, му веркӧссянь, улыс тшупӧдӧдз вӧлі кык гырддза, тшупӧдлӧн пасьтаыс – ӧти гырддза. Улыс тшупӧдсянь вылыс тшупӧдӧдз вӧлі нёль гырддза, вылыс тшупӧдлӧн пасьтаыс – ӧти гырддза.

¹⁵ Висьяссӧ сотаніныс вӧлі нёль гырддза судта. Сотанінсянь чурвидзисны вывланьӧ нёль сюр.

¹⁶ Сотаніныс вӧлі нёль пельӧса, кузьта-пасьтанас – дас кык гырддза.

¹⁷ Сотанін улас тшупӧдыс быд боксянь кузьтанас вӧлі дас нёль гырддза. Сотанінсӧ вӧлі гӧгӧртӧма джын гырддза пасьта дорышӧн да ӧти гырддза джуджда воргаӧн. Висьяссӧ сотанін дорӧдз асыввывсянь кайис сод.

¹⁸ Господь шуис меным: «Морт пиӧй! Господь Ыджыдыс тадзи висьталӧ: висьпуктанін йылысь тшӧктӧмыс татшӧм. Сійӧ лунӧ, кор кыпӧдасны висьпуктанінсӧ, медым вайны сотан висьяс да резны сійӧс вирӧн,

¹⁹ сет ӧшкӧс Левий чужанкотырысь Садок рӧдысь попъяслы, кодъяслы лэдзӧма матыстчыны Ме дінӧ Меным кесъялӧм могысь, – висьталӧ Господь Ыджыдыс. – Найӧ мед начкасны ӧшкӧс мыжысь вись пыдди.

²⁰ Босьт ӧшлысь вирсӧ да мавтышт сыӧн висьпуктанінлысь нёльнан сюрсӧ, тшупӧдлысь нёльнан пельӧссӧ да дорышъяссӧ. Тадзи сӧстӧммӧдан висьпуктанінсӧ.

²¹ Босьт ӧшкӧс, мыжысь висьсӧ, да сот сійӧс индӧм местаын вежаин ортсыас.

²² Мӧд луннас мыжысь вись пыдди вай дзоньвидза ай кӧзаӧс, медым ӧш вирӧн моз сӧстӧммӧдны висьпуктанінсӧ.

²³ Сӧстӧммӧдӧм бӧрын вай дзоньвидза ӧшкӧс да дзоньвидза межӧс

²⁴ Господь водзӧ. Попъяс мед койыштасны на вылӧ сов да ваясны сотан вись пыдди Господьлы.

²⁵ Сизим лун чӧж быд лун вай ай кӧзаӧс мыжысь вись пыдди. Нӧшта быд лун мед вайӧны вись пыдди дзоньвидза ӧшкӧс да дзоньвидза межӧс.

²⁶ Сизим лун чӧж мед сӧстӧммӧдасны висьпуктанінсӧ, и висьпуктаніныс лоӧ сиӧма вись вайӧмлы.

²⁷ Сідзкӧ, кӧкъямысӧд луннас и водзӧ быд лун попъяс мед ваясны висьпуктанін вылын тіянлысь сотан да бурасян висьяснытӧ. Сэки Ме бур сьӧлӧмӧн сибӧда тіянӧс, – висьталӧ Господь Ыджыдыс».