Езекиль 42 - Коми Библия 2023

Попъяслӧн жыръяс

¹ Морт петкӧдіс менӧ ортсы йӧрӧ войвыв пыранінӧд да вайӧдіс керка дорӧ, мый сулаліс крамбокса восьсаин войвывладорын, крам сайын сулалысь керкасянь войвылынджык.

² Керкалӧн войвыв стенмыс, кӧні вӧлі ӧдзӧсыс, вӧлі сё гырддза кузьта. Пасьтанас керкаыс вӧлі ветымын гырддза.

³ Керка сайын вӧлі пытшкӧс йӧрлӧн кызь гырддза пасьта восьсаин, а керка водзын вӧлі ортсы йӧрлӧн изэрд. Тайӧ куим судтаа керкаас вӧліны восьса жыръяс, найӧ сулалісны ӧта-мӧд выланыс.

⁴ Сё гырддза кузьта керка водзас вӧлі ветланін, сійӧ вӧлі дас гырддза пасьта да сё гырддза кузьта. Керкалӧн ӧдзӧсъясыс видзӧдісны войвывлань.

⁵ Восьса жыръяс вӧсна керкалӧн вылысса жыръясыс вӧліны векньыдджыкӧсь улысса да шӧр жыръяс дорысь.

⁶ Жыръясыс вӧліны куимнан судтаас, но налӧн эз вӧвны йӧрын сулалысь кодь сюръяяс. Вылыс судтаыс вӧлі векньыдджык улыс да шӧр судтаяс дорысь.

⁷ Керка да ортсы йӧр костын вӧлі ветымын гырддза кузьта стен. Жыръясыс видзӧдісны стенлань.

⁸ Тайӧ керкаыс кузьтанас вӧлі сё гырддза, а керкаыс, мый мышнас сулаліс ортсы йӧрлань, кузьтанас вӧлі ветымын гырддза.

⁹ Стенлань видзӧдысь керкаӧ ортсы йӧрсянь локтігӧн керка дінӧ матыстчисны асыввывсянь. Жыръясӧ пырисны улі судтаӧдыс.

¹⁰ Крам сайын сулалысь керка дорын, крамбокса восьсаин лунвывладорын, сулаліс уна жыръя керка.

¹¹ Керка водзас вӧлі ветланін. Керкаыс кузьта-пасьтанас, жыръяснас да ӧдзӧсъяснас вӧлі войвывладорын сулалысь уна жыръя керка кодь.

¹² Керкаӧ локтігӧн матыстчисны асыввывсянь. Лунвывлань видзӧдысь ӧдзӧсъяс дорын помасис ветланін, мый муніс йӧръяссӧ торйӧдысь стен пӧлӧн.

¹³ Морт шуис меным: «Восьсаин войвылын и лунвылын сулалысь керкаяслӧн жыръясыс вежаӧсь. Сэні попъяс, кодъяслы сетӧма матыстчыны Господь дінӧ, сёйӧны вежасьыс-вежаторъяс. Сэтчӧ найӧ вайӧны вежасьыс-вежа висьяс: нянь вись, мыжысь вись да мыж вештан вись. Тайӧ жыръясыс вежаӧсь.

¹⁴ Крамӧ ветлӧм бӧрын попъяс оз петны ортсы йӧрӧ вежсьытӧг. Найӧ кольӧны тайӧ жыръясас ассьыныс кесъялан паськӧмнысӧ, ӧд кесъялан паськӧмыс вежа. Ассьыныс паськӧмсӧ пасьталӧм бӧрын попъяс вермӧны мунны войтыр дінӧ».

Крамлы торйӧдӧм му

¹⁵ Крамсӧ йӧръяснас мурталӧм бӧрын морт петкӧдіс менӧ асыввыв пыранінӧд да мурталіс крамлы торйӧдӧм мусӧ.

¹⁶ Морт мурталіс бедьнас асыввывладорсӧ, сійӧ вӧлі витсё бедь кузьта.

¹⁷ Бедьнас мурталіс войвывладорсӧ, сійӧ вӧлі витсё бедь кузьта.

¹⁸ Бедьнас мурталіс лунвывладорсӧ, сійӧ вӧлі витсё бедь кузьта.

¹⁹ Сэсся бергӧдчис рытыввывлань да мурталіс рытыввывладорсӧ, сійӧ вӧлі витсё бедь кузьта.

²⁰ Морт мурталіс крамлы торйӧдӧм мусӧ нёльнанладорсяньыс. Сійӧс кытшалысь стен быд боксянь вӧлі витсё бедь кузьта. Стенмыс торйӧдіс вежасӧ сыысь, мый абу вежа.