Езекиль 40 - Коми Библия 2023

Выль крам аддзылӧм 40-48 Пыранінъяс да йӧръяс

¹ Миянӧс пленӧ нуӧдӧмсянь кызь витӧд вонас, во заводитчӧмсянь тӧлысьлӧн дасӧд лунӧ, дзик сійӧ лунӧ, кор Ерусалим кисьтӧмсянь коли дас нёль во, Господьлӧн киыс вӧлі ме вылын. Господь нуӧдіс менӧ

² Израиль муӧ да сувтӧдіс зэв джуджыд керӧс вылӧ. Тайӧ вӧлі Енсянь петкӧдлӧм. Керӧс лунвывладорас сулалісны карлӧн кодь керкаяс.

³ Господь вайӧдіс менӧ сэтчӧ, и ме аддзи кар дзиръя дорын сулалысь мортӧс. Сійӧ вӧлі быттьӧ ыргӧнысь. Киас сійӧ кутіс шабді кӧв да мурталан бедь.

⁴ Сійӧ шуис меным: «Морт пиӧй, бура видзӧд, сюся кывзы да босьт тӧд вылад ставсӧ, мый ме петкӧдла тэныд. Дзик та вӧсна тэнӧ татчӧ вайӧдӧма. Ставсӧ, мый аддзылан, висьтав Израиль войтырлы».

⁵ Со, ме аддзи крам да сійӧс кытшалысь стен. Мекӧд сёрнитысь мортлӧн беддьыс вӧлі квайт гырддза кузьта. Гырддза кузьтаас вӧлі пырӧ тшӧтш ки пыдӧс пасьта. Морт мурталіс йӧр стенсӧ, стенлӧн кызтаыс и судтаыс вӧлі ӧти бедь.

⁶ Сэсся морт матыстчис асыввыв пыранін дорӧ, кайис содйӧдыс да мурталіс тагӧссӧ, ӧдзӧс воссян пасьтасӧ. Сійӧ вӧлі бедь кузьта. Пыранінлӧн мӧдар помас тагӧсыс вӧлі татшӧм жӧ.

⁷ Пыранінын вӧліны бокыса жыръяс, налӧн кузьтаыс и пасьтаыс вӧлі ӧти бедь, а найӧс торйӧдысь стенъяслӧн кызтаыс вӧлі вит гырддза. Пыранін помас вӧлі посводз. Посводзлӧн тагӧсыс, ӧдзӧс воссян пасьтаыс, вӧлі ӧти бедь кузьта.

⁸ Сэсся морт мурталіс посводзсӧ.

⁹ Посводзыс вӧлі кӧкъямыс гырддза кузьта, а сылӧн ӧдзӧсдор стенмыс вӧлі кык гырддза кызта. Посводзсянь петісны крам йӧрӧ.

¹⁰ Асыввыв пыранінын вӧлі ӧтар бокас куим жыр, мӧдар бокас тшӧтш куим жыр. Жыръясыс вӧліны ӧтпасьтаӧсь, а найӧс торйӧдысь стенъясыс вӧліны ӧткызтаӧсь.

¹¹ Морт мурталіс пыранінсӧ, ӧдзӧс дорын пасьтаыс вӧлі дас гырддза, а бокыса жырсянь паныд сулалысь жырйӧдз – дас куим гырддза.

¹² Быд жыр водзын вӧлі гырддза судта стентор. Ачыс жырйыс вӧлі квайт гырддза пасьта да квайт гырддза кузьта.

¹³ Сэсся морт мурталіс пыранінлысь йирксӧ. Бокыса жырлӧн ортсы стенсянь сылы паныд сулалысь жырлӧн ортсы стенмӧдз пасьтаыс вӧлі кызь вит гырддза.

¹⁴ Мурталіс пыранінлысь ӧдзӧсдор стенсӧ, сійӧ вӧлі квайтымын гырддза судта. Пыранін сулаліс йӧрын.

¹⁵ Пыранінлӧн ӧдзӧссянь йӧрӧ петан ӧдзӧсӧдз вӧлі ветымын гырддза.

¹⁶ Бокыса жыръясын, найӧс торйӧдысь стенъясын да посводзын вӧліны таса ӧшиньяс, найӧ видзӧдісны йӧрлань. Пыранінлӧн стенъясӧ вӧлі серпасалӧма пальмаяс.

¹⁷ Морт вайӧдіс менӧ ортсы йӧрӧ. Йӧр гӧгӧрыс вӧлі вольсалӧма изъяс, и сэні сулаліс керка, кӧні сьӧрсьӧн-бӧрсьӧн вӧлі комын жыр.

¹⁸ Тайӧ улысса изэрдыс заводитчис пыранінлӧн бокыса стен бердсянь. Изэрдлӧн пасьтаыс вӧлі пыранін кузьта кодь.

¹⁹ Морт мурталіс кузьтасӧ улысса пыранін дорсянь пытшкӧс йӧр дорӧдз, сійӧ вӧлі сё гырддза. Асыввыв пыранінсянь и войвыв пыранінсянь пытшкӧс йӧр дорӧдз кузьтаыс вӧлі ӧткодь.

²⁰ Морт мурталіс ортсы йӧрӧ нуӧдысь войвыв пыранінсӧ.

²¹ Пыранінын вӧлі ӧтар бокас куим жыр, мӧдар бокас тшӧтш куим жыр. Пыранінлӧн стенъясыс да посводзыс вӧліны асыввыв пыранінлӧн кодьӧсь. Пыраніныс кузьтанас вӧлі ветымын гырддза, а пасьтанас – кызь вит гырддза.

²² Ӧшиньясыс, посводзыс да пальма серпасъясыс вӧліны асыввыв пыранінлӧн кодьӧсь. Пыранінӧ кайис сизим тшупӧда сод, а мӧд помас вӧлі посводз.

²³ Асыввыв да войвыв пыранінъяслы воча вӧліны пытшкӧс йӧрӧ пырананінъяс. Войвыв пыранінсянь пытшкӧс йӧр пыранінӧдз вӧлі сё гырддза.

²⁴ Морт нуӧдіс менӧ лунвывладорӧ, и сэтысь ме аддзи лунвыв пыранін. Морт мурталіс пыранінлысь стенъяссӧ да посводзсӧ, и найӧ вӧліны мукӧд пыраніныслӧн кодьӧсь.

²⁵ Лунвыв пыранінлӧн да посводзыслӧн ӧшиньясыс вӧліны мукӧд пыраніныслӧн кодьӧсь. Пыраніныс кузьтанас вӧлі ветымын гырддза, а пасьтанас – кызь вит гырддза.

²⁶ Пыранінӧ кайис сизим тшупӧда сод, а мӧд помас вӧлі посводз. Пыранінлӧн ӧтар-мӧдар бок стенъясӧ вӧлі серпасалӧма пальмаяс.

²⁷ Лунвывладорсянь тшӧтш вӧлі пытшкӧс йӧрӧ пыранін. Морт мурталіс кузьтасӧ лунвыв пыранін дорсянь пытшкӧс йӧр пыранін дорӧдз, сійӧ вӧлі сё гырддза.

²⁸ Морт вайӧдіс менӧ пытшкӧс йӧрӧ лунвыв пыранінӧд да мурталіс сійӧс. Сійӧ вӧлі мукӧд пыраніныс кодь.

²⁹ Сылӧн бокыса жыръясыс, стенъясыс да посводзыс вӧліны мукӧд пыраніныслӧн кодьӧсь. Пыранінын да посводзын вӧліны ӧшиньяс быд боксянь. Пыраніныс кузьтанас вӧлі ветымын гырддза, а пасьтанас – кызь вит гырддза.

³⁰ Быд посводз кузьтанас вӧлі кызь вит гырддза, а пасьтанас – вит гырддза.

³¹ Посводзыс видзӧдіс ортсы йӧрӧ. Пыранінлӧн стенъясӧ вӧлі серпасалӧма пальмаяс. Пыранінӧ кайис кӧкъямыс тшупӧда сод.

³² Морт вайӧдіс менӧ пытшкӧс йӧрӧ асыввыв пыранінӧд да мурталіс сійӧс. Сійӧ вӧлі мукӧд пыраніныс кодь.

³³ Сылӧн бокыса жыръясыс, стенъясыс да посводзыс вӧліны мукӧд пыраніныслӧн кодьӧсь. Пыранінын да посводзын вӧліны ӧшиньяс быд боксянь. Пыраніныс кузьтанас вӧлі ветымын гырддза, а пасьтанас – кызь вит гырддза.

³⁴ Посводзыс видзӧдіс ортсы йӧрӧ. Пыранінлӧн ӧтар-мӧдар бок стенъясӧ вӧлі серпасалӧма пальмаяс. Пыранінӧ кайис кӧкъямыс тшупӧда сод.

³⁵ Морт вайӧдіс менӧ войвыв пыранінӧ да мурталіс сійӧс, сійӧ вӧлі мукӧд пыраніныс кодь.

³⁶ Сэні тшӧтш вӧліны бокыса жыръяс, стенъяс да посводз. Пыранінын вӧліны ӧшиньяс быд боксянь. Пыраніныс кузьтанас вӧлі ветымын гырддза, а пасьтанас – кызь вит гырддза.

³⁷ Посводзыс видзӧдіс ортсы йӧрӧ. Пыранінлӧн ӧтар-мӧдар бок стенъясӧ вӧлі серпасалӧма пальмаяс. Пыранінӧ кайис кӧкъямыс тшупӧда сод.

³⁸ Пыранінын вӧлі торъя вежӧс, кӧні мыськалісны сотан висьяс.

³⁹ Пыранінлӧн посводзын ӧтарладорас сулаліс кык пызан, и мӧдарладорас – кык пызан. На вылын начкылісны сотан висьяс, мыжысь висьяс да мыж вештан висьяс.

⁴⁰ Войвыв пыранін ортсыас, посводз стен бокас, сулаліс кык пызан, и мӧдар стен бокас сулаліс кык пызан.

⁴¹ Вись начкан пызаныс ставнас вӧлі кӧкъямыс. Нёль пызан вӧлі пыранін ӧтар стен бокас, и нёль пызан – мӧдар стен бокас.

⁴² Нӧшта сэні вӧлі нёль пызан сотан да мукӧд висьяслы, тшӧтш пуртъяслы да мукӧд начкысянторъяслы. Пызанъяссӧ вӧлі вӧчӧма кералӧм изйысь, налӧн кузьтаыс и пасьтаыс вӧлі гырддза да джын, а джудждаыс – ӧти гырддза.

⁴³ Посводз пытшкӧс стен гӧгӧр вӧлі тувъялӧма ки пыдӧс ыджда кӧрттувъяс. Пызанъяс вылӧ пуктылісны висьяслысь яйсӧ.

⁴⁴ Пытшкӧс йӧрын, пыранінъяс сайын, вӧліны сьылысьяслы ӧти вежӧса керкаяс. Ӧти керкаыс вӧлі войвыв пыранін бердын, и сылӧн ӧдзӧсыс видзӧдіс лунвывлань. Мӧд керкаыс вӧлі лунвыв пыранін бердын, и сылӧн ӧдзӧсыс видзӧдіс войвывлань.

⁴⁵ Морт шуис меным: «Лунвылӧ видзӧдысь керкаыс – крамын кесъялысь попъяслы.

⁴⁶ Войвылӧ видзӧдысь керкаыс – висьпуктанін дорын кесъялысь попъяслы, Садок рӧдысь петысьяслы. Левий чужанкотырысь сӧмын найӧ вермӧны матыстчыны Господь дінӧ, медым кесъявны Сылы».

⁴⁷ Морт мурталіс пытшкӧс йӧр. Йӧрыс вӧлі нёль пельӧса, сылӧн пасьтаыс и кузьтаыс вӧлі сё гырддза. Крам водзын сулаліс висьпуктанін.

⁴⁸ Морт вайӧдіс менӧ крам посводзӧ да мурталіс сылысь ӧдзӧсдор стенсӧ. Ӧтар-мӧдар бокас стенмыс вӧлі вит гырддза кызта да куим гырддза пасьта.

⁴⁹ Посводзыс кузьтанас вӧлі кызь гырддза, а пасьтанас – дас ӧти гырддза. Посводзӧ кайис дас тшупӧда сод. Посводз ӧдзӧс дорын сулаліс кык сюръя, ӧтиыс сулаліс ӧтар стен бокас, мӧдыс – мӧдар стен бокас.