Езекиль 39 - Коми Библия 2023

Гогӧс бырӧдӧм

¹ «Морт пиӧй, пророкав Гоглы паныд. Шу, мый Господь Ыджыдыс тадзи висьталӧ: Ме сувта тэныд паныд, Гог, мешек да тувал войтыръяслӧн медыджыд юралысь.

² Ме бергӧда тэнӧ, кыска тэнӧ ылі войвылысь да вайӧда Израиль керӧсъяс вылӧ.

³ Ме уськӧда шуйга кисьыд ньӧввужтӧ, веськыд кисьыд – ньӧвъястӧ.

⁴ Аслад тышкайӧзкӧд да тэкӧд локтысь войтыръяскӧд тэ усян Израиль керӧсъяс вылын. Ме сета тэнӧ кырныш-варышлы кокавны да зверъяслы сёйны.

⁵ Тэ усян ыб вылын. Тайӧс шуи Ме, – висьталӧ Господь Ыджыдыс.

⁶ Ме ыста би Магог му вылӧ да саридздорса муясын повтӧг олысь йӧз вылӧ. Сэки найӧ тӧдмаласны, мый Ме – Господь.

⁷ Аслам Израиль войтыр пӧвстын Ме восьта Ассьым вежа нимӧс и водзӧ ог лэдз янӧдны сійӧс. Сэки войтыръяс тӧдмаласны, мый Ме – Господь, Израильлӧн вежа Ен.

⁸ Тайӧ ставыс збыльмас, – висьталӧ Господь Ыджыдыс. – Воас сійӧ луныс, мый йылысь Ме висьталі.

⁹ Израильсаяс петасны каръяссьыныс, пестасны би да шыбитасны сэтчӧ вӧрӧглысь шыпуртъяссӧ, ичӧт да ыджыд сайӧдъяссӧ, ньӧввужъяссӧ да ньӧвъяссӧ, зоръяссӧ да шыяссӧ. Сизим во чӧж найӧ кутасны сотны вӧрӧглысь тышкасян кӧлуйсӧ.

¹⁰ Видз-муяс вылысь да вӧрысь налы оз ковмы ваявны пес, ӧд вӧрӧглӧн тышкасянторъясыс лоӧны налы пес пыдди. Израиль войтыр куштас найӧс, кодъяс сійӧс куштісны, мырддяс мырддялысьяслысь эмбурсӧ, – висьталӧ Господь Ыджыдыс.

¹¹ Сійӧ лунӧ Ме сета Гоглы дзебанін Израиль муысь, Ветлысь-мунысьяслӧн ковтысысь, саридзсянь асыввылысь. Ковтыссӧ кутасны нимтыны Гог тышкайӧзлӧн ковтысӧн, ӧд найӧс дзебасны сэтчӧ. Налӧн шойнаыс тупкас ветлысь-мунысьяслысь туйсӧ.

¹² Сизим тӧлысь чӧж Израиль войтырлы ковмас дзебны найӧс, медым сӧстӧммӧдны мусӧ.

¹³ Став войтырыс кутас дзебны найӧс. Сійӧ лунӧ, кор Ме петкӧдла Ассьым вынӧс, Израиль войтырлы лоӧ нималӧм, – висьталӧ Господь Ыджыдыс.

¹⁴ Сизим тӧлысь кольӧм бӧрын лоӧ индӧма йӧзӧс, кодъяс дугдывтӧг кутасны ветлӧдлыны, корсьны му вылын куйлысь шойяссӧ да дзебны найӧс. Тадзи сӧстӧммӧдасны мусӧ.

¹⁵ Корсьысьяс пӧвстысь кӧ кодкӧ аддзас морт лыяс, сэтчӧ сувтӧдас пас, медым сэсся гуасьысьяс дзебасны шойсӧ Гог тышкайӧзлӧн ковтысӧ,

¹⁶ кӧні сулалӧ Хамона нима кар. Тадзи лоӧ сӧстӧммӧдӧма мусӧ.

¹⁷ Тэныд, морт пиӧй, Господь Ыджыдыс тадзи висьталӧ: чукӧст быдласянь лэбачьясӧс да вӧрса зверъясӧс. Мед найӧ чукӧртчасны Менам вись дорӧ, мый Ме начка налы Израиль керӧсъяс вылын. Сэні найӧ кутасны яй сёйны да вир юны.

¹⁸ Найӧ кутасны сёйны вына тышкайӧзлысь яйсӧ, юны мувывса ӧксыяслысь вирсӧ. Тайӧ лоӧ васанса тшӧгӧдӧм межъяслӧн, баляпиянлӧн, кӧзаяслӧн да ӧшъяслӧн яй да вир кодьӧн.

¹⁹ Ме начка налы вись, и найӧ кутасны пӧттӧдзныс сёйны гос да коддзытӧдзныс юны вир.

²⁰ Менам пызан сайын найӧ пӧттӧдзныс сёясны вӧвъясӧс да верзьӧмаясӧс, вына шыпуртаясӧс да быдсикас тышкайӧзӧс, – висьталӧ Господь Ыджыдыс.

Господь чукӧртӧ Ассьыс войтырсӧ

²¹ Ме петкӧдла Ассьым дзирдлунӧс войтыръяс пӧвстын. Войтыръяс аддзасны Менсьым мыждӧмӧс да на вылӧ кыпӧдӧм киӧс.

²² Сійӧ лунсянь и водзӧ Израиль войтыр кутас тӧдны, мый Ме – Господь, налӧн Ен.

²³ Войтыръяс тӧдмаласны, мый Израиль войтырӧс вӧлі нуӧдӧма пленӧ асланыс мыж вӧсна – сыысь, мый эновтісны Менӧ. Та вӧсна Ме дзеби наысь Ассьым чужӧмбанӧс да сеті найӧс вӧрӧг киӧ, и найӧ ставныс кулісны шыпурт помысь.

²⁴ Налӧн пеж да мыж вӧчӧм вӧсна Ме дзеби Ассьым чужӧмбанӧс наысь.

²⁵ Та вӧсна Господь Ыджыдыс тадзи висьталӧ: ӧні Ме бӧр вайӧда пленысь Яковлысь рӧдсӧ, бурсьӧлӧмтча став Израиль войтыр дінӧ. Ме вежӧгтысь Ен, Ассьым вежа нимӧс дорйысь.

²⁶ Израиль войтырлы яндзим лоӧ Менӧ эновтӧмысь, кор асланыс муын найӧ кутасны повтӧг овны, и некод оз нин кут повзьӧдлыны найӧс.

²⁷ Ме бӧр вайӧда найӧс войтыръяс пӧвстысь, чукӧрта вӧрӧгъяслӧн муясысь, тадзи петкӧдла Ассьым вежалунӧс уна войтыръяслӧн син водзын.

²⁸ Ме некодӧс ог коль, а ставнысӧ бӧр чукӧрта асланыс муӧ мукӧд войтыръяс пӧвстысь, кытчӧ разӧдлі найӧс. Сэки израильсаяс тӧдмаласны, мый Ме – Господь, налӧн Ен.

²⁹ Ме ог нин кут дзебны Ассьым чужӧмбанӧс Израиль войтырысь, а кисьта на вылӧ Ассьым Лолӧс, – висьталӧ Господь Ыджыдыс».