Езекиль 37 - Коми Библия 2023

Косьмӧм лыяса ковтыс

¹ Господьлӧн киыс вӧлі ме вылын. Аслас Ловнас Господь нуӧдіс менӧ да сувтӧдіс ковтыс шӧрӧ. Тайӧ ковтысыс вӧлі тырӧма морт лыясӧн.

² Господь кытшлӧдліс-новлӧдліс менӧ лыдтӧм-тшӧттӧм лыясыс гӧгӧр. Лыясыс вӧліны дзик косьмӧмаӧсь.

³ Господь юаліс: «Морт пиӧй, ловзясны-ӧ тайӧ лыясыс?» Ме вочавидзи: «Господьӧй Ыджыдӧй, тайӧс Тэ Ачыд тӧдан».

⁴ Сійӧ шуис меным: «Пророкав тайӧ косьмӧм лыясыслы. Тшӧкты налы кывзыны Господьлысь кывсӧ.

⁵ Господь Ыджыдыс тадзи висьталӧ тайӧ лыяслы: Ме пукта тіян пытшкӧ лов, и ті ловзянныд.

⁶ Ме зэвта тіянӧс сӧнъясӧн, вевття тіянӧс яйӧн да кучикӧн. Ме пукта тіян пытшкӧ лов, и ті ловзянныд. Сэки ті тӧдмаланныд, мый Ме – Господь».

⁷ Ме пророкалі, кыдзи вӧлі меным тшӧктӧма. Менам висьталігкості кыліс гольгӧм шы, кор лыясыс ӧта-мӧд дінас кутісны матыстчыны да йитчыны.

⁸ Ме аддзи, кыдзи найӧ зэвтчисны сӧнъясӧн, сэсся вевттьысисны яйӧн да кучикӧн. Но лолыс на пытшкын эз вӧв.

⁹ Господь шуис меным: «Пророкав ловлы, морт пиӧй! Пророкалӧмӧн шу ловлы, мый Господь Ыджыдыс тадзи висьталӧ: лов, лок нёльнан пельӧссянь да пӧльышт олӧмсӧ тайӧ виӧмаяс пытшкӧ, медым найӧ ловзясны».

¹⁰ Ме пророкалі Господьлӧн тшӧктӧм серти. Лов пырис виӧмаяс пытшкӧ, и найӧ ловзисны да сувтісны кок выланыс. Тайӧ вӧлі лыдтӧм-тшӧттӧм йӧз чукӧр.

¹¹ Господь шуис меным: «Морт пиӧй, тайӧ лыясыс – Израиль войтыр. Найӧ шуӧны, миян лыясным пӧ косьмисны, лачаным воши, миянлы воис пом.

¹² Та вӧсна пророкав налы, мый Господь Ыджыдыс тадзи висьталӧ: Менам войтырӧй, Ме восьта тіянлысь гуястӧ, петкӧда тіянӧс сэтысь да вайӧда тіянӧс Израиль муӧ.

¹³ Кор Ме восьта тіянлысь гуястӧ да петкӧда тіянӧс сэтысь, ті, Менам войтырӧй, тӧдмаланныд, мый Ме – Господь.

¹⁴ Ассьым лолӧс Ме пукта тіян пытшкӧ, и ті ловзянныд. Ме овмӧда тіянӧс асланыд муӧ. Сэки ті тӧдмаланныд, мый тайӧс висьталі Ме, Господь. Мый шуи, вӧча, – висьталӧ Господь».

Кык войтырысь лоӧ ӧти войтыр

¹⁵ Меным вӧлі Господьсянь кыв:

¹⁶ «Морт пиӧй, босьт бедь да гиж сэтчӧ: ”Иуда чужанкотыр да сыкӧд ӧтувтчӧм израильса чужанкотыръяс”. Сэсся босьт мӧд бедь да гиж сэтчӧ: ”Ӧсип”. Тайӧ лоӧ Ефремлӧн да сыкӧд ӧтувтчӧм израильса чужанкотыръяслӧн бедь.

¹⁷ Бедьяссӧ топӧд ӧта-мӧд бердас, медым тэнад киын найӧ вӧліны кыдзи ӧти бедь.

¹⁸ Кор тэнад войтырыд юалас, мый тайӧ,

¹⁹ шу налы, мый Господь Ыджыдыс тадзи висьталӧ: Ме босьта Ефремлысь да сыкӧд ӧтувтчӧм израильса чужанкотыръяслысь бедьсӧ, кытчӧ гижӧма ”Ӧсип”, да йита сійӧс Иудалӧн беддьыскӧд. Аслам киын Ме вӧча найӧс ӧти беддьӧн.

²⁰ Тайӧ кык бедьсӧ, кытчӧ тэ гижин, кут киад став йӧзыслӧн син водзын

²¹ да шу, мый Господь Ыджыдыс тадзи висьталӧ: Ме босьта Израиль пиянӧс мукӧд войтыръяс пӧвстысь, чукӧрта найӧс быдлаысь да бӧр вайӧда асланыс муӧ.

²² Сэні, Израиль керӧсъяс вылын, Ме вӧча найӧс ӧти войтырӧн. Налӧн лоӧ ӧти ӧксы. Найӧ оз нин кутны юксьыны кык войтыр вылӧ да оз нин овны кык ӧксылӧн юралӧм улын.

²³ Найӧ оз нин кутны асьнысӧ пежавны идолъясӧн, зывӧкторъясӧн да быдсяма лёк вӧчӧмӧн. Ме мезда найӧс мыжъяссьыныс да сӧстӧммӧда найӧс. Найӧ лоӧны Менам войтырӧн, а Ме – налӧн Енмӧн.

²⁴ Менам Давид кесйӧгӧй лоӧ налӧн ӧксынас да видзысьнас. Найӧ пондасны овны Менам индӧд-тшӧктӧмъяс серти.

²⁵ Найӧ кутасны овны муын, мый Ме сеті Аслам Яков кесйӧглы. Сэні олісны налӧн батьясныс, и сэні пондасны овны найӧ да налӧн ныв-пиныс, и водзӧ нэмъяс чӧж – насянь чужысьяс. Менам Давид кесйӧгӧй лоӧ налӧн ӧксынас нэмъяс чӧж.

²⁶ Ме пыр кежлӧ кӧртала накӧд лӧньлун вайысь йитӧд да сета налы тайӧ мусӧ. Вӧча найӧс уна лыда войтырӧн да пыр кежлӧ сувтӧда на пӧвстӧ Ассьым вежаинӧс.

²⁷ Сійӧ лоӧ Менам оланінӧн на пӧвстын. Ме лоа налӧн Енмӧн, а найӧ лоӧны Менам войтырӧн.

²⁸ Менам вежаинӧй нэмъяс чӧж лоӧ на шӧрын. Та серти мукӧд войтыръяс тӧдмаласны, мый Ме, Господь, Израильӧс Вежӧдысь».