Езекиль 31 - Коми Библия 2023

Египетӧс сус пу моз пӧрӧдӧм

¹ Дас ӧтиӧд вонас коймӧд тӧлысьлӧн медводдза лунӧ меным вӧлі Господьсянь кыв:

² «Морт пиӧй, висьтав фараонлы, египетса ӧксылы, да сылӧн уна лыда войтырлы: Тэ вына. Кодкӧд ӧткодявны тэнӧ?

³ Ассуркӧд. Сійӧ коркӧ вӧлі ливанса сус пу кодь, мича вожъяса джуджыд пу, вуджӧрнас сайӧдысь, туганнас быдмис мукӧд пуясысь вылӧджык.

⁴ Сус пусӧ ва юкталіс, мупытшса ва быдтіс сійӧс. Визувтысь ва кытшаліс сылысь быдманінсӧ, ваыс вичмывліс тшӧтш мукӧд пуяслы.

⁵ Та вӧсна сус пу быдмис, мукӧд пуясысь лои джуджыд. Сылӧн быдмис уна вож, увъясыс нюжалісны, ӧд сылы тырмымӧн вӧлі ваыс.

⁶ Вожъясас поздысьлісны енэжвывса лэбачьяс, пу улас пиянасьлісны вӧрса пемӧсъяс, вуджӧр улас олісны вына войтыръяс.

⁷ Сійӧ вӧлі джуджыд да мича, вожъясыс нюжалісны, ӧд вужъясьӧма вӧлі ыджыд ва дорӧ.

⁸ Весиг Енлӧн сад йӧрын сус пуяс вӧліны ичӧтджыкӧсь, кипарислӧн эз вӧвны сэтшӧм вожъясыс, платан пулӧн – сэтшӧм увъясыс. Енлӧн сад йӧрын ни ӧти пу эз вӧв сы кодь мича.

⁹ Ме вӧчи сійӧс мичаӧн, быдті сылы уна вож. Эдэмын, Енлӧн сад йӧрын, быдмысь пуяс вежалісны сылы.

¹⁰ Господь Ыджыдыс тадзи висьталӧ: сус пуыс быдмис джуджыда, мукӧд пуясысь вылӧджык, да ышнясис.

¹¹ Та вӧсна Ме сеті сійӧс войтыръяс вылын ыджыдалысь киӧ, коді мынтысис сылы, кыдзи и коліс. Сылӧн лёк вӧчӧмыс вӧсна Ме ӧтдорті сійӧс.

¹² Йӧз муысь локтысьяс кералісны сійӧс, скӧрсьыс-скӧр войтыр колис сійӧс куйлыны керӧс вылӧ. Сылӧн вожъясыс усьласисны ковтысъясӧ, чегъясьӧм увъясыс – сёнъясӧ. Войтыръяс петісны сылӧн вуджӧр улысь, найӧ эновтісны сійӧс.

¹³ Пӧрӧдӧм сус пу вылӧ поздысисны енэжвывса лэбачьяс, увъясас овмӧдчисны вӧрса пемӧсъяс.

¹⁴ Тайӧ ставыс лои сы вӧсна, медым ва бокын быдмысь пуяс оз вылӧ кыпӧдчыны да туганнас мед оз нюжӧдчыны мукӧд пуясысь вылӧджык. Ваӧн юкталӧм ыджыд пуяс мед оз быдмыны вывті джуджыда. Ставныслы шуӧма кувны, найӧс лоӧ шыбитӧма му пыдӧсас, кулӧмаяс пӧвстӧ.

¹⁵ Господь Ыджыдыс тадзи висьталӧ: тайӧ сус пуыслысь пыдӧстӧминӧ мунан лунсӧ Ме вӧчи бӧрдан лунӧн. Ме тупки пыдӧстӧм йир да сувтӧді сылӧн валысь визувтӧмсӧ, и ваыс дугдіс визувтны. Ме пасьтӧді Ливанӧс сьӧд пемыдас, медым сійӧ шогаліс сус пуыс вӧсна. Став вӧрса пуыс косьмис сус пу вӧсна шогсигӧн.

¹⁶ Ме уськӧді сус пуӧс, шыбиті сійӧс пыдӧстӧминӧ кулӧмаяс пӧвстӧ. Сылӧн грымгысьӧм-усьӧмӧн Ме пыркниті войтыръясӧс. Эдэмса пуяс да медбур ливанса пуяс, ваӧн коркӧ юкталӧм пуяс, пондісны нимкодясьны му пыдӧсас.

¹⁷ Ӧд сус пуыскӧд лэччисны пыдӧстӧминӧ шыпурт помысь кулӧмаяс пӧвстӧ тшӧтш найӧ, кодъяс войтыръяс пӧвстысь ёртасисны сыкӧд да дзебсясисны сылӧн вуджӧр улын.

¹⁸ Ӧні тэ вына да нималана, но кутшӧм эдэмса пукӧд тэнӧ позьӧ ӧткодявны? Эдэмса пуясӧс моз тэнӧ тшӧтш лоӧ шыбитӧма му пыдӧсас, тэ пондан куйлыны вундыштчытӧмъяс пӧвстын да шыпурт помысь кулӧмаяс пӧвстын. Со мый виччысьӧ фараонӧс да сылысь уна лыда войтырсӧ, – висьталӧ Господь Ыджыдыс».