Езекиль 29 - Коми Библия 2023

Египет йылысь водзвыв висьталӧм

¹ Дасӧд вонас дасӧд тӧлысьлӧн дас кыкӧд лунӧ меным вӧлі Господьсянь кыв:

² «Морт пиӧй, бергӧд чужӧмтӧ фараонлань, египетса ӧксылань, да пророкав сылы паныд да став Египетлы паныд.

³ Шу, мый Господь Ыджыдыс тадзи висьталӧ: Ме сувта тэныд паныд, фараон, египетса ӧксы. Тэ – ыджыд крокодил, куйлан Нил юын да шуан, юыс пӧ менам, ме пӧ ачым сійӧс аслым вӧчи.

⁴ Но Ме тэнад вомкӧтшӧ ыджыд вугыр пысала. Тэнад юысь черисӧ Ме ляска кучик бердад и перъя тэнӧ юсьыд тайӧ чериыскӧд.

⁵ Сэсся тэнӧ да тэнад юысь став черисӧ шыбита овтӧминӧ. Тэ кутан куйлыны видз вылын, некод оз вешты тэнӧ сэтысь ни оз дзеб тэнсьыд шойтӧ. Ме сета тэнӧ мувывса зверъяслы да енэжвывса лэбачьяслы сёян пыдди.

⁶ Сэки Египетын став олысьыс тӧдмалас, мый Ме – Господь. Египет, тэ вӧлін Израиль войтырлы вӧсньыдик бедь кодь мыджӧдӧн.

⁷ Кор Израиль войтыр кутчысис тэ дінӧ, тэ чегин да сатшин сылы пельпомас. Кор сійӧ мыджсис тэ вылӧ, тэ чегин, а сылӧн коскыс орис.

⁸ Та вӧсна Господь Ыджыдыс тадзи висьталӧ: Ме вайӧда тэ вылӧ шыпурт, бырӧда тэнсьыд йӧзтӧ да ыж-мӧстӧ.

⁹ Египет му лоӧ овтӧминӧн, пазӧдӧм муӧн. Сэки египетсаяс тӧдмаласны, мый Ме – Господь. Египет, тэ шуан, юыс пӧ менам, ме пӧ сійӧс вӧчи.

¹⁰ Та вӧсна Ме сувта тэныд да тэнад юлы паныд. Ме пазӧда Египет муӧс, вӧча сійӧс овтӧминӧн Мигдолсянь Сиенаӧдз, Эфиопия мудорӧдз.

¹¹ Морт ни ыж-мӧс оз кут ветлыны сэті, оз ло сэні олысьыс нелямын во чӧж.

¹² Египет муӧс Ме вӧча кушмӧм муяс пӧвстын овтӧминӧн. Сылӧн каръясын нелямын во чӧж оз ло олысьыс. Найӧ лоӧны мукӧд пазӧдӧм каръяс кодьӧсь. Ме разӧда египетса войтырӧс мукӧд войтыръяс пӧвстӧ, шердъя найӧс мукӧд муясӧ.

¹³ Господь Ыджыдыс тадзи висьталӧ: нелямын во мысти Ме чукӧрта египетса войтырӧс мукӧд войтыръяс пӧвстысь, кытчӧ найӧс вӧлі разӧдӧма.

¹⁴ Египетса войтырӧс бӧр вайӧда пленысь Патрос муӧ, налӧн чужанінӧ. Сэні налӧн лоӧ жебиник юраланін.

¹⁵ Налӧн юралӧмыс лоӧ медся вынтӧм, найӧ оз нин босьтны мукӧд войтыръясӧс асланыс кипод улӧ. Ме вӧча найӧс жеб войтырӧн, медым эз вермыны ыджыдавны мукӧд войтыръяс вылын.

¹⁶ Израиль войтыр лачасӧ оз нин кут Египет вылӧ. Египеткӧд лоӧмторйыс кутас казьтывны израильсаяслы мыжныс йылысь, мый отсӧгсӧ корисны Египетлысь. Сэки найӧ тӧдмаласны, мый Ме – Господь Ыджыдыс».

¹⁷ Кызь сизимӧд вонас медводдза тӧлысьлӧн медводдза лунӧ меным вӧлі Господьсянь кыв:

¹⁸ «Морт пиӧй, Тиркӧд тышкасигӧн вавилонса Навукодоносор ӧксы ёна уджӧдіс ассьыс тышкайӧзсӧ. Тышкайӧзлӧн юрсиныс гылалӧма, налысь пельпомнысӧ зыртӧма. Навукодоносорлы да сылӧн тышкайӧзыслы эз вичмы некутшӧм удждон Тиркӧд тышкасьӧмысь.

¹⁹ Та вӧсна Господь Ыджыдыс тадзи висьталӧ: Ме сета вавилонса Навукодоносор ӧксылы Египет муӧс. Сійӧ куштас-мырддяс Египетлысь озырлунсӧ, нуас сэтысь ставсӧ. Тайӧ и лоас сылӧн тышкайӧзыслы удждоннас.

²⁰ Удждон пыдди Ме сета Навукодоносорлы Египет му, ӧд сылӧн тышкайӧзыс уджалісны Меным, – висьталӧ Господь Ыджыдыс.

²¹ Сійӧ лунӧ Ме выльысь ёнмӧда Израиль войтырӧс. Тэныд, морт пиӧй, Ме сета сёрнитны на водзын. Сэки найӧ тӧдмаласны, мый Ме – Господь».