Езекиль 28 - Коми Библия 2023

Тир карса ӧксыӧс мыждӧм

¹ Меным вӧлі Господьсянь кыв:

² «Морт пиӧй, шу тирса юралысьлы, мый Господь Ыджыдыс тадзи висьталӧ: тэ вылӧ кыпӧдчин да шуин, ме пӧ ен, пукала пӧ саридз шӧрын енлӧн пуклӧсын. Но тэ сӧмын морт, абу ен, кӧть ассьыд вежӧртӧ ӧткодялан енлӧн вежӧрыскӧд.

³ Тэ лоин Даниилысь мывкыдджык на, став гусяторйыс тэныд лои восьса.

⁴ Аслад мывкыдлун да вежӧр отсӧгӧн тэ озырмӧдчин, чукӧртін аслыд зарни-эзысь.

⁵ Тэ кужӧмӧн вузасин, ёна озырмин да пондін ышнясьны.

⁶ Та вӧсна Господь Ыджыдыс тадзи висьталӧ: сы понда, мый тэ ассьыд вежӧртӧ ӧткодялан Енлӧн вежӧрыскӧд,

⁷ Ме вайӧда тэ вылӧ йӧз муысь скӧрсьыс-скӧр войтырӧс. Найӧ перъясны шыпуртнысӧ, медым бырӧдны тэнсьыд ыджыд мывкыдлунтӧ. Найӧ няйтӧ таляласны тэнсьыд нималӧмтӧ

⁸ да шыбитасны тэнӧ пыдӧстӧминӧ, и тэ кулан шыпурт помысь саридз шӧрын.

⁹ Шуан-ӧ сэки виысьыдлы, мый тэ ен? Виысь водзын тэ сӧмын морт, абу ен.

¹⁰ Тэ вундыштчытӧм морт моз кулан йӧз муысь локтысьяслӧн киысь. Тайӧс шуи Ме, – висьталӧ Господь Ыджыдыс».

¹¹ Меным вӧлі Господьсянь кыв:

¹² «Морт пиӧй, бӧрд тирса ӧксы вӧсна. Шу сылы, мый Господь Ыджыдыс тадзи висьталӧ: тэ вӧлін тыр-бур, зэв мывкыд да вывті мича.

¹³ Тэ олін Эдэмын, Енлӧн сад йӧрын. Тэнӧ мичмӧдісны дона изъяс: рубин, топаз, алмаз, хризолит, оникс, яшма, сапфир, карбункул да изумруд. Паськӧмтӧ вӧлі мичмӧдӧма зарниӧн. Ставыс тайӧ вӧлі дась нин сійӧ лунӧ, кор тэнӧ вӧлі вӧчӧма.

¹⁴ Тэ вӧлін мавтыштӧм херувим. Ме пукті тэнӧ видзысьӧ, и тэ олін Енлӧн вежа керӧс вылын, ветлӧдлін би моз югъялысь дона изъяс пӧвстті.

¹⁵ Тэнӧ вӧчан лунсянь тэ олін веськыда. Тадзи вӧлі сійӧ лунӧдз, кор тэ пытшкысь вӧлі аддзӧма лёксӧ.

¹⁶ Тэ ёна вузасин, тырин виалӧм-дзескӧдӧмӧн. Тэ мыж вӧчин. Та вӧсна тэ лоин Меным шогмытӧмӧн, и Ме шыбиті тэнӧ, видзысь херувимӧс, Енлӧн керӧс вылысь, би моз югъялысь дона изъяс пӧвстысь.

¹⁷ Мичлун пондаыд тэ вылӧ кыпӧдчин, нималӧм пондаыд воштін мывкыдлунтӧ. Таысь Ме шыбиті тэнӧ му вылӧ, янӧді ӧксыяс водзын.

¹⁸ Ылӧдчӧмӧн вузасигад тэ уна мыж вӧчин да пежалін ассьыд вежаинъястӧ. Ме ӧзта тэ пытшкӧ би, и сійӧ ньылыштас тэнӧ. Ме вӧча тэысь пӧим, и тэ кутан куйлыны му вылын став йӧзыслӧн син водзын.

¹⁹ Тэнӧ тӧдысь войтыръяс весьӧпӧрасны сыысь, мый лоӧ тэкӧд. Тэ лоан повзьӧдчанторйӧн, тэ пыр кежлӧ быран».

Сидон карӧс мыждӧм

²⁰ Меным вӧлі Господьсянь кыв:

²¹ «Морт пиӧй, бергӧд чужӧмтӧ Сидонлань да пророкав сылы паныд.

²² Шу, мый Господь Ыджыдыс тадзи висьталӧ: Ме паныд сувта тэныд, Сидон, да нимӧда Ачымӧс сы пыр, мый тэныд вӧча. Ме мыжда Сидонӧс да сэні петкӧдла Ассьым вежалунӧс. Сэки тэнад олысьясыд тӧдмаласны, мый Ме – Господь.

²³ Ме мӧдӧда Сидонӧ пӧрӧс висьӧм, сылӧн уличьяс вылын лоӧ вир кисьтӧм. Вӧрӧг уськӧдчас быд боксянь и виалас сидонсаясӧс. Сэки найӧ тӧдмаласны, мый Ме – Господь.

²⁴ Израиль войтырлӧн оз нин лоны сійӧс мустӧмтысь орччӧн олысьясыс, кодъяс ёсь лежнӧг моз сутшкалӧны-дойдалӧны. Сэки найӧ тӧдмаласны, мый Ме – Господь Ыджыдыс.

²⁵ Господь Ыджыдыс тадзи висьталӧ: Ме чукӧрта Израиль войтырӧс мукӧд войтыръяс пӧвстысь, кытчӧ найӧс вӧлі разӧдӧма. Та пыр Ме петкӧдла Ассьым вежалунӧс мукӧд войтыръяслӧн син водзын. Израиль войтыр пондас овны аслас муын, мый Ме сеті Аслам Яков кесйӧглы.

²⁶ Найӧ кутасны сэні повтӧг овны, лэптасны керкаяс да пуктасны виноград пуяс. Кутасны повтӧг овны, ӧд Ме мыжда на гӧгӧр олысь войтыръясӧс, кодъяс мустӧмтісны найӧс. Сэки найӧ тӧдмаласны, мый Ме – Господь, налӧн Ен».