Езекиль 27 - Коми Библия 2023

Тир кар йылысь бӧрдӧдчанкыв

¹ Меным вӧлі Господьсянь кыв:

² «Морт пиӧй, сьыв Тир йылысь бӧрдӧдчанкыв.

³ Висьтав саридз шӧрын сулалысь да саридздорса войтыръяскӧд вузасьысь Тир карлы, мый Господь Ыджыдыс тадзи висьталӧ: Тир кар, тэ шуан асьтӧ медмичаӧн.

⁴ Тэ сулалан саридз шӧрын, лэптысьясыд вӧчисны тэнӧ вывті мичаӧн.

⁵ Тэнсьыд дорыштӧ вӧчисны Сенирысь вайӧм кипарис пуысь, шолгатӧ – ливанса сус пуысь,

⁶ пелысъястӧ – васанса тупуысь, джоджъястӧ – киттимса діяс вылысь вайӧм бук пуысь, тэнӧ мичмӧдісны слӧн лыӧн.

⁷ Тэнсьыд тӧвдӧратӧ вурӧма серлӧдлӧм дӧраысь, Египетысь вайӧм шабді дӧраысь, сійӧ – тэнад пасыд. Гӧрдовлӧз да пемыдгӧрд дӧраяс вайисны Элиша ді вылысь, наысь вӧчисны тэныд вевттьӧд-лэбувъяс.

⁸ Сынысьясыд вӧліны Сидон да Арвад каръясысь, а тэнад кужысь йӧзыд вӧліны бӧжалысьясӧн.

⁹ Гевалса юрнуӧдысьяс да кужысь йӧз дзоньтавлісны письтӧминъястӧ, саридз вывті кывтысь корабльяс локтісны тэ дінӧ вузасьны-ньӧбасьны.

¹⁰ Персияысь, Лудысь да Ливияысь айулов кесъялісны тэнад тышкайӧз пӧвстын. Сайӧдъяснысӧ да юртупкӧдъяснысӧ найӧ ӧшлывлісны, медым тэ дзирдалін.

¹¹ Арвадсаяс сулалісны стен вылад, медым тэнад тышкайӧзкӧд видзны тэнӧ, гамадсаяс сулалісны башняяс вылад. Ньӧвпуртӧснысӧ найӧ ӧшлывлісны стен гӧгӧрыд, ёнджыка на мичмӧдісны тэнӧ.

¹² Тэнад вӧлі уна вузӧс, та вӧсна Фарсис ньӧбасис тэнсьыд. Сійӧ мынтысьліс тэныд эзысьӧн, кӧртӧн, свинечӧн да озысьӧн.

¹³ Яван, Тувал да Мешек тэнсьыд ньӧбасигӧн мынтысьлісны тэныд кесйӧгъясӧн да ыргӧн дозмук-кӧлуйӧн.

¹⁴ Тогарма рӧдысь петысьяс вайлісны мулъясӧс, тарантасӧ доддялан вӧвъясӧс да верзьӧмаяслы вӧвъясӧс, медым тэнсьыд ньӧбасигӧн мынтысьны наӧн.

¹⁵ Дедансаяс да діяс вылын олысь войтыръяс вузасисны тэкӧд. Найӧ мынтысьлісны тэныд слӧн лыӧн да эбен пуӧн.

¹⁶ Арамейяс ньӧбасьлісны тэнсьыд, ӧд тэнад вӧлі уна вузӧс. Найӧ мынтысьлісны карбункулӧн, пемыдгӧрд да серлӧдлӧм дӧраясӧн, вӧсни шабді дӧраӧн, кораллӧн да рубинӧн.

¹⁷ Иуда да Израиль муяс ньӧбасьлісны тэнсьыд. Найӧ мынтысьлісны тэныд миннитса шобдіӧн, юмовторъясӧн, маӧн, олив выйӧн да чӧскыд мавтасъясӧн.

¹⁸ Дамаск ньӧбасис тэнсьыд, ӧд тэнад лыдтӧм-тшӧттӧм вузӧсыд кыскис сійӧс тэ дінӧ. Ачыс сійӧ вузаліс тэныд хелбонса вина да еджыд вурун.

¹⁹ Тэнсьыд ньӧбасигӧн дансаяс да Узал муысь явансаяс мынтысьлісны тэныд дорӧм кӧртӧн, кассияӧн да чӧскыда ӧвтысь турунӧн.

²⁰ Дедансаяс вузалісны тэныд ӧныр улӧ вевттьӧдъяс.

²¹ Аравия да кедарса ӧксыяс вузавлісны тэныд ыжъяс, межъяс да кӧзаяс.

²² Саваса да рамаса вузасьысьяс ньӧбасиганыс мынтысьлісны тэныд медбур чӧскыд ӧвтанторъясӧн, дона изъясӧн да зарниӧн.

²³ Харан, Кане да Эден, Сава, Ассур да Килмад вузасисны тэкӧд.

²⁴ Найӧ вузавлісны тэныд дона паськӧм, гӧрдовлӧз да серлӧдлӧм дӧраяс, уна рӧма джодждӧраяс, гартӧм ён гезъяс.

²⁵ Фарсисса корабльяс новлӧдлісны тэнсьыд вузӧстӧ. Тэ вӧлін тырӧдз сӧвтӧма, вӧлін саридз шӧрын кывтысь сьӧкыд корабль.

²⁶ Тэнад сынысьясыд петкӧдісны тэнӧ восьса саридзӧ, но сэні кыпӧдчис асыв тӧв да жугӧдіс тэнӧ.

²⁷ Озырлуныд да вузӧсыд, тэнад кывтысьясыд, сынысьясыд да бӧжалысьясыд, тэнсьыд письтӧминъястӧ дзоньталысьясыд, вузасьысьясыд да тышкайӧзыд – ставӧн, коді ветліс корабль вылын, саридз пыдӧсӧ вӧйисны сійӧ лунӧ, кор тэ усин.

²⁸ Сынысь-бӧжалысьясыд горзӧны, налӧн горзӧмысь саридздорса муяс дзӧрӧны-тіралӧны.

²⁹ Корабльяс вылысь чеччӧны кывтысьяс, сынысь-бӧжалысьяс сулалӧны саридз дорын.

³⁰ Найӧ ёна горзӧны, курыда бӧрдӧны тэ вӧсна, юрнысӧ коялӧны муӧн, туплясьӧны пӧим пытшкын.

³¹ Юрнысӧ тэ вӧсна кушӧдз шырӧны, пасьталӧны шогалан паськӧм, курыда бӧрдӧны.

³² Тэ вӧсна ойзӧны-бӧрдӧны, тэ йылысь сьылӧны татшӧм бӧрдӧдчанкыв: – Некутшӧм кар он ӧткодяв Тиркӧд, кодӧс бырӧдӧма саридз шӧрын.

³³ Саридзті тэ новлӧдлін ассьыд вузӧстӧ, вердін-пасьтӧдін войтыръясӧс. Аслад лыдтӧм-тшӧттӧм озырлунӧн да вузӧсӧн тэ озырмӧдін мувывса ӧксыясӧс.

³⁴ Но саридзлӧн ыджыд гыыс жугӧдіс тэнӧ, нуис став йӧзтӧ да вузӧстӧ ва пыдӧсӧ.

³⁵ Тэ йылысь кылігӧн саридз дорын олысьяс весьӧпӧрисны, налысь ӧксыяссӧ тіралӧм босьтіс, чужӧмныс вежсис.

³⁶ Войтыръяс пӧвстысь вузасьысьяс пондасны шутьлявны сыысь, мый лои тэкӧд. Ӧд тэ лоин повзьӧдчанторйӧн, тэ пыр кежлӧ бырин».