Езекиль 24 - Коми Библия 2023

Пӧрт йылысь велӧданвисьт

¹ Ӧкмысӧд вонас дасӧд тӧлысьлӧн дасӧд лунӧ меным вӧлі Господьсянь кыв:

² «Морт пиӧй, пасйы-гиж тайӧ лунсӧ, ӧд талун вавилонса ӧксы кытшӧ босьтас Ерусалим кар.

³ Тайӧ асныра войтырыслы висьтав велӧданвисьт. Шу налы, мый Господь Ыджыдыс тадзи висьталӧ: – Босьт пӧрт, кисьт сэтчӧ ва да пукты сійӧс би вылӧ.

⁴ Пукты пӧртйӧ медбур яй – лядьвей да пуліпом. Тырт пӧртсӧ медбур лыясӧн,

⁵ пукты лыяс вылӧ медбур ыж яй, пу, кытчӧдз весиг лыясыс оз пусьыны.

⁶ Господь Ыджыдыс тадзи висьталӧ: – Курыд шог вир кисьтысь карлы! Курыд шог пӧртйыслы, кодлӧн пытшкӧсыс няйтысла пурзьӧма. Перъяв пӧртсьыс яйтор бӧрся яйтор, эн пудъясь да эн бӧрйысь.

⁷ Ерусалим кар тырӧма вирӧн, вир кисьтісны изъяс вылӧ, муыс эз тупкы сійӧс.

⁸ Ме коли вирсӧ изъяс вылас, эг вевттьы сійӧс, медым скӧрмӧмӧн водзӧс перйыны Ерусалимын олысьяслысь.

⁹ Господь Ыджыдыс тадзи висьталӧ: – Курыд шог вир кисьтысь карлы! Ме ӧзта ыджыд бипур.

¹⁰ Содты пессӧ, ёнджыка ӧзты бипурсӧ, пу яйсӧ лысьыс торъявтӧдз. Ваыс мед бырас, лыыс мед сотчас.

¹¹ Куш пӧртсӧ пукты ӧгыр вылас, медым ыргӧныс доналас, медым сотчас-сылас сэтысь став пежыс, став пурзьӧм няйтыс.

¹² Ме весьшӧрӧ мырси, а пурзьӧм няйтыс пӧртсьыс эз вушйы, весиг биыс эз весав сійӧс.

¹³ Тэнад пежыд зывӧктана. Ме сӧстӧммӧдлі тэнӧ, но тэ эн сӧстӧммы аслад пежсьыд. Кытчӧдз Ме став скӧрлунӧс тэ вылӧ ог кисьт, тэ он сӧстӧммы.

¹⁴ Тайӧс висьтала Ме, Господь. Мый шуи, вӧча, ог веж Ассьым шуӧмӧс, ог жалит, ог бурсьӧлӧмтчы. Тэнӧ лоӧ мыждӧма лёк оласногыд да уджъясыд серти, – висьталӧ Господь Ыджыдыс».

Езекильлӧн шогалӧм – Израиль войтырлы пас

¹⁵ Меным вӧлі Господьсянь кыв:

¹⁶ «Морт пиӧй, Ме виччысьтӧг босьта тэнсьыд сьӧлӧм гажӧдысьтӧ, но тэ эн бӧрд, синватӧ эн кисьт.

¹⁷ Ас кежсьыд сьӧлӧмад шогсьы, кулӧма вӧсна бӧрдӧдчӧм эн вӧч. Шогалысьяслы вайӧм нянь эн сёй, чужӧмтӧ эн тупкы, быд лунӧ моз ов юркӧртӧдӧн да кӧмӧн».

¹⁸ Асывнас на ме сёрниті войтыркӧд, а рытнас кувсис менам гӧтырӧй. Мӧд луннас ме вӧчи сідзи, кыдзи вӧлі тшӧктӧма меным.

¹⁹ Войтырыс юасис: «Висьтав миянлы, мыйла тэ тадзи вӧчан?»

²⁰ Ме вочавидзи налы: «Меным вӧлі Господьсянь кыв.

²¹ Господь Ыджыдыс тшӧктіс меным висьтавны Израиль войтырлы, мый Сійӧ тадзи висьталӧ: Ме сета пежавны Ассьым вежаинӧс – тіянлысь син гажӧданторнытӧ да сьӧлӧм бурӧданторнытӧ, тіянлысь зумыд пыкӧднытӧ, мыйӧн ті ошйысянныд. Ныв-пиныд, кодъясӧс ті колинныд карас, куласны шыпурт помысь.

²² Сэки ті вӧчанныд ме моз, кыдзи ме талун вӧчи. Чужӧмнытӧ онӧ тупкӧй да шогалысьяслы вайӧм нянь онӧ сёйӧй.

²³ Юрвевттьӧдныд лоас юр выланыд, кӧмныд – коканыд, ті онӧ кутӧй шогсьыны-бӧрдны, но асланыд мыжъяс вӧсна косьманныд-сісьманныд, матысса водзаныд кутанныд ышлолавны.

²⁴ Езекиль лоӧ тіянлы пасӧн. Ставсӧ, мый сійӧ вӧчис, ті тшӧтш кутанныд вӧчны. Кор тайӧ збыльмас, сэки ті тӧдмаланныд, мый Ме – Господь Ыджыдыс.

²⁵ А тэ, морт пиӧй, кывзы. Сійӧ лунӧ Ме мырддя Израиль войтырлысь ныв-пинысӧ – зумыд пыкӧднысӧ, лов гажӧдысьнысӧ да сьӧлӧм бурӧдысьнысӧ.

²⁶ Сійӧ жӧ лунӧ локтас тэ дінӧ Ерусалимысь пышйӧм морт, и сійӧ ставсӧ юӧртас тэныд.

²⁷ Сійӧ лунӧ, кор тайӧ пышйӧм мортыс локтас, воссяс тэнад кыв-ворыд, и тэ пондан сёрнитны. Тэ лоан аслад войтырлы пасӧн, и найӧ тӧдмаласны, мый Ме – Господь».