Езекиль 19 - Коми Библия 2023

Израильса ӧксыяс йылысь бӧрдӧдчанкыв

¹ Сьыв израильса ӧксыяс йылысь тайӧ бӧрдӧдчанкывсӧ:

² – Энь левъясысь тэнад мамыд вӧлі медбур, сійӧ куйліс левъяс пӧвстын, пиянсӧ быдтіс том левъяскӧд.

³ Ӧтиӧс тӧждысьӧмӧн вердіс, и сійӧ лои том лев, велаліс кыйсьыны, кутіс сёйны йӧзӧс.

⁴ Сы йылысь кылісны войтыръяс, найӧ лӧсьӧдісны сылы гу, и сійӧ усис сэтчӧ, сійӧс дорисны да нуӧдісны Египетӧ.

⁵ Лев мам виччысис, сэсся аддзис, мый лачасӧ воштіс, сэки босьтіс мӧд писӧ да быдтіс сійӧс.

⁶ Сійӧ лои том лев, ветлӧдліс ыджыд левъяскӧд, велаліс кыйсьыны, кутіс сёйны йӧзӧс.

⁷ Сійӧ жугліс овтӧм керкаяс, куштіс каръяс, сылӧн равзӧмысь тіраліс став мувывса олысьыс.

⁸ Сы вылӧ уськӧдчисны войтыръяс, матігӧгӧр муясын олысьяс, сы вылӧ шыбитісны тывнысӧ, сійӧ шедіс налӧн гуӧ.

⁹ Сійӧс дорисны чептӧн да пуксьӧдісны клеткаӧ, вайӧдісны вавилонса ӧксы дінӧ, йӧртісны изкарса дзескыдінӧ, медым израильса керӧсъяс вылын эз нин кыв сылӧн равзӧм шыыс.

¹⁰ Тэнад мамыд вӧлі виноград пу кодь, уна вожа да бур вотӧса, ӧд ыджыд ва дорӧ сійӧс вӧлі пуктӧма.

¹¹ Ёнӧсь вӧліны вожъясыс, юралан бедьяс наысь вӧчисны. Сійӧ пашкыртчис да вылӧ кыпӧдчис, лои джуджыд да уна вожа, та вӧсна ылӧдз тыдаліс.

¹² Но сійӧс лёкысь нетшыштісны, шыбитісны муӧ, и асыв тӧв косьтіс сылысь вотӧссӧ. Чегъялӧм ён вожъясыс косьмисны, найӧс би ньылыштіс.

¹³ Ӧні сійӧс пуктӧма овтӧминӧ, кос да ватӧм муӧ.

¹⁴ Сылӧн пучӧрысь ыпнитіс би, кутчысис вожъясас, ньылыштіс вотӧссӧ. Ён вожъясысь нинӧм эз коль, медым юралан бедь вӧчны. Тайӧ – бӧрдӧдчанкыв, сійӧс сьылӧны шог дырйи.