Езекиль 17 - Коми Библия 2023

Кык кутш да виноград йылысь нӧдкыв

¹ Меным вӧлі Господьсянь кыв:

² «Морт пиӧй, нӧдкыв нӧд Израиль войтырлы, висьтав велӧданвисьт.

³ Шу налы: – Господь Ыджыдыс тадзи висьталӧ: Ливан керӧс вылӧ ыджыд кутш пуксис, сійӧ вӧлі ыджыд бордъяса, уна рӧма гӧныс вӧлі пашкыр да кузь. Сійӧ чегис сус пулысь йывсӧ,

⁴ нетшыштіс медвылыс петассӧ, лэбӧдіс сійӧс Ханаан муӧ, пуктіс вузасьысьяслӧн карӧ.

⁵ Кутш босьтіс сэтчӧс муысь кӧйдыс, кӧдзис сійӧс бур муӧ, баддьӧс моз пуктіс ыджыд ва бокӧ.

⁶ Кӧйдысысь быдмис виноград пу, пашкыр, но ляпкыд. Сылӧн вожъясыс нюжӧдчисны кутшлань, вужйыс вӧлі му пытшкас. Виноград пу быдмис-туис, петасъясыс паськалісны.

⁷ Но сэні вӧлі мӧд ыджыд кутш, сійӧ вӧлі ыджыд бордъяса да пашкыр гӧна. Виноград пу ассьыс вужсӧ сылань веськӧдіс, тшӧтш вожъяссӧ сылань нюжӧдіс, медым тайӧ кутшыс киськалас сійӧс.

⁸ Виноградсӧ вӧлі пуктӧма бур муӧ, ыджыд ва бокӧ, медым сійӧ выль вож сетас да уна вотӧс ваяс, медым бур виноград пуӧн лоас.

⁹ Шу Израиль войтырлы, мый Господь Ыджыдыс тадзи висьталӧ: – Мый лоас виноград пуыскӧд? Сылысь вужсӧ перъясны, вотӧссӧ нетшкасны, вожъясыс да петасъясыс косьмасны. Пуыс ставнас косьмас, и оз ков ыджыд вын, оз ков уна йӧз, медым сійӧс нетшыштны.

¹⁰ Сійӧ вужъясьӧма да быдмӧ. Но мый лоас сыкӧд? Асыв тӧв петас да косьтас сійӧс. Кӧні быдмис, сэні и косьмас».

¹¹ Меным вӧлі Господьсянь кыв:

¹² «Тайӧ асныра войтырыс оз ӧмӧй гӧгӧрво, мый йылысь тайӧ нӧдкывйыс? Висьтав налы: вавилонса ӧксы локтіс Ерусалимӧ, босьтіс пленӧ ӧксыӧс да юралысьяссӧ и нуӧдіс найӧс Вавилонӧ.

¹³ Сійӧ бӧрйис иудаса ӧксы рӧдысь мортӧс, сёрнитчис сыкӧд да тшӧктіс сылы кыв сетны. Вавилонса ӧксы нуӧдіс пленӧ став юралысь-веськӧдлысьсӧ,

¹⁴ медым войтырыс эз кыпӧдчы сылы паныд, а кывзысис сылысь да оліс сёрнитчӧм серти.

¹⁵ Но иудаса ӧксы кыпӧдчис вавилонса ӧксылы паныд. Сійӧ мӧдӧдіс ассьыс йӧзсӧ Египетӧ, медым найӧ ваясны сэтысь вӧвъясӧс да уна лыда тышкайӧзӧс. Но лоӧ-ӧ сылы бур? Сёрнитчӧмсӧ торкысь морт оз пышйы мыждӧмысь.

¹⁶ Ме Ачым кыв сетӧмӧн шуа, – висьталӧ Господь Ыджыдыс, – мый сійӧ кулас вавилонса ӧксылӧн муын. Ӧд та вылӧ видзӧдтӧг, мый вавилонса ӧксы пуктіс сійӧс Иудалӧн коляс войтырлы ӧксыӧ, сійӧ торкис кыв сетӧмсӧ да вавилонса ӧксыкӧд сёрнитчӧмсӧ.

¹⁷ Кор вавилонсаяс лэптасны Ерусалим кар гӧгӧр тымӧдъяс, медым бырӧдны уна йӧзӧс, фараон аслас уна да вына тышкайӧзыскӧд оз отсав сылы тышын.

¹⁸ Иудаса ӧксы нинӧмӧ пуктіс кыв сетӧмсӧ да торкис вавилонса ӧксыкӧд сёрнитчӧмсӧ, мый ки сетӧмӧн вынсьӧдіс. Та вӧсна сійӧ оз пышйы мыждӧмысь.

¹⁹ Господь Ыджыдыс тадзи висьталӧ: Ме Ачым кыв сетӧмӧн шуа, мый мынтыся сылы уджъясыс серти. Ӧд Ме водзын сетӧм кывсӧ сійӧ нинӧмӧ пуктіс да Ме водзын вынсьӧдӧм сёрнитчӧмсӧ торкис.

²⁰ Ме шыбита Ассьым тывйӧс сы вылӧ, и сійӧ веськалас Менам тывйӧ. Ме нуӧда сійӧс Вавилонӧ, сэні мыжда сійӧс, ӧд сійӧ эновтіс Менӧ.

²¹ Иудаса ӧксылӧн тышкайӧзыс пышъясны, но шыпурт улӧ шедасны, а ловйӧн кольӧмаясӧс разӧдасны нёльнан му пельӧсӧ. Сэки ті тӧдмаланныд, мый тайӧс висьталі Ме, Господь.

²² Господь Ыджыдыс тадзи висьталӧ: Ме чега джуджыд сус пулысь туган йывсӧ, сӧмын на мыччысьӧм петассӧ, да пукта сійӧс быдмыны муӧ джуджыд керӧс вылӧ.

²³ Израильса джуджыд керӧс вылын сійӧ пашкыртчас-быдмас, сетас коль, лоас ыджыдсьыс-ыджыд сус пуӧн. Сылӧн увъяс вылас поздысясны лэбачьяс, вожъяслӧн вуджӧр улӧ вӧчасны аслыныс оланін.

²⁴ Сэки вӧрса став пуыс тӧдмалас, мый Ме – Господь. Джуджыд пуяссӧ вӧча ляпкыдӧн, а ляпкыд пуяссӧ вӧча джуджыдӧн. Ме кӧ кӧсъя, веж пу косьмӧ, а кос пу вежӧдӧ. Тайӧс висьтала Ме, Господь. Мый шуи, вӧча».