Езекиль 15 - Коми Библия 2023

Ерусалим – шогмытӧм пу кодь

¹ Меным вӧлі Господьсянь кыв:

² «Морт пиӧй, вӧрса пуяс дорысь мыйӧн бурджык виноград пу?

³ Сыысь ӧмӧй позьӧ мыйкӧ вӧчны? Весиг кӧлуй ӧшӧдан тув сыысь он вӧч.

⁴ Кор сійӧс шыбитӧны биӧ, сійӧ сотчӧ кыкнан помсяньыс, сэсся сотчӧ шӧрыс. А мый кольӧ, сыысь нинӧм он вӧч.

⁵ Сотчытӧдзыс кӧ эз шогмы сыысь мыйкӧ вӧчны, сотчӧм бӧрас ӧмӧй шогмас?

⁶ Та вӧсна Господь Ыджыдыс тадзи висьталӧ: кыдзи Ме сета билы ньылыштны виноград пу вӧрса пуяскӧд, сідзи Ме сета билы ньылыштны Ерусалимын олысьясӧс.

⁷ Ме сувта налы паныд. Найӧ вермасны петны биысь, но мӧд би ньылыштас найӧс. Кор Ме сувта налы паныд, сэки ті тӧдмаланныд, мый Ме – Господь.

⁸ Найӧ эновтісны Менӧ, та вӧсна Ме вӧча налысь мусӧ овтӧминӧн, – висьталӧ Господь Ыджыдыс».