Езекиль 12 - Коми Библия 2023

Ерусалимын олысьяс йылысь пас

¹ Меным вӧлі Господьсянь кыв:

² «Морт пиӧй, тэ олан асныра войтыр пӧвстын. Налӧн эм син, медым аддзыны, но найӧ оз аддзыны. Налӧн эм пель, медым кывны, но найӧ оз кывны, ӧд найӧ асныра войтыр.

³ Морт пиӧй, лӧсьӧд ноп да луннас налӧн син водзын пленӧ босьтӧм морт моз мӧдӧдчы мунны мӧдлаӧ. Гашкӧ, тайӧ войтырыс гӧгӧрвоас, мый найӧ асныраӧсь.

⁴ Луннас налӧн син водзын петкӧд кӧлуйтӧ, кутшӧмӧс босьтӧны пленӧ мунігӧн. А рытнас налӧн син водзын пленӧ босьтӧмаяс моз ачыд пет.

⁵ Налӧн син водзын керка стенмад вӧч аслыд петан розь да петкӧд сэті ассьыд кӧлуйтӧ.

⁶ Пемдігас налӧн син водзын босьт ноптӧ пельпом вылад да петкӧд сійӧс. Шогалысь моз тупкы чужӧмтӧ, медым эн аддзы мусӧ, ӧд тэнӧ Ме пукті Израиль войтырлы пасӧн».

⁷ Ме ставсӧ вӧчи сідзи, кыдзи меным вӧлі тшӧктӧма. Луннас ме петкӧді ассьым кӧлуйӧс, кутшӧмӧс босьтӧны пленӧ мунігӧн. Рытнас аслам киӧн вӧчи керка стенмам петан розь, и пемдігас петкӧді нопйӧс да ставныслӧн син водзын босьті сійӧс пельпом вылам.

⁸ Асывнас меным вӧлі Господьсянь кыв:

⁹ «Морт пиӧй, юаліс-ӧ тэнсьыд тайӧ асныра Израиль войтырыс, мый тэ вӧчан?

¹⁰ Шу налы, мый Господь Ыджыдыс тадзи висьталӧ сы йылысь, мый виччысьӧ ерусалимса юралысьӧс да сэні олысь израильсаясӧс.

¹¹ Шу налы, мый тэ эм налы пас, и мый тэ вӧчан, сійӧ накӧд лоӧ. Найӧс босьтасны да нуӧдасны пленӧ.

¹² Накӧд тшӧтш юралысьныс босьтас нопсӧ пельпом вылас да петас карсьыс рытъя пемыднас. Карса стенмас сылы вӧчасны петан розь. Сійӧ тупкас чужӧмсӧ, медым оз аддзы мусӧ.

¹³ Ме шыбита Ассьым тывйӧс сы вылӧ, и сійӧ веськалас Менам тывйӧ. Ме нуӧда сійӧс Вавилонӧ, калдея войтырлӧн муӧ, но сійӧ оз аддзыв тайӧ мусӧ. Сэні сійӧ кулас.

¹⁴ Юралысьныс дор сулалысьясӧс, сылысь отсасьысьяссӧ да тышкайӧзсӧ, Ме тӧвйыв разӧда и бӧрсяньыс шыпуртӧн вӧтча.

¹⁵ Кор Ме разӧда найӧс войтыръяс пӧвстӧ да шердъя мукӧд муясӧ, сэки найӧ тӧдмаласны, мый Ме – Господь.

¹⁶ Но ӧткымынӧс на пиысь Ме видза шыпуртысь, тшыгъялӧмысь да пӧрӧс висьӧмысь, медым найӧ висьталасны асланыс зывӧк уджъясныс йылысь войтыръяслы, кодъяс пӧвстӧ овмӧдчасны. Сэки тӧдмаласны, мый Ме – Господь».

¹⁷ Меным вӧлі Господьсянь кыв:

¹⁸ «Морт пиӧй, сёй няньтӧ полӧмпырысь, ю ватӧ тіралӧмӧн да майшасьӧмпырысь.

¹⁹ Тайӧ муас олысь Израиль войтырлы висьтав, мый висьталӧ Господь Ыджыдыс Ерусалимын олысьяс да Израиль му йылысь. Найӧ майшасьӧмпырысь кутасны сёйны ассьыныс няньсӧ, полӧмпырысь юны васӧ. Найӧ виалӧны-дзескӧдӧны, та вӧсна налысь мусӧ ставнас лоӧ куштӧма.

²⁰ Олан каръясныс киссясны, муныс овтӧммас. Сэки ті тӧдмаланныд, мый Ме – Господь».

²¹ Меным вӧлі Господьсянь кыв:

²² «Морт пиӧй, Израиль муын тіян ветлӧ татшӧм шусьӧг: ”Колясны лунъяс, а Енсянь петкӧдчылӧмъяс оз збыльмыны”.

²³ Та вӧсна шу войтырыслы, мый Господь Ыджыдыс тадзи висьталӧ: тайӧ шусьӧг ветлӧмлы Ме пукта пом, и сійӧс вунӧдасны Израильын. Шу налы, мый матыстчӧны лунъяс, и Енсянь петкӧдчылӧмъяс збыльмасны.

²⁴ Израиль войтыр пӧвстын оз нин ло петкӧдчылӧмыс да водзвыв юӧртӧмыс, мый эськӧ оз збыльмы.

²⁵ Мый Ме, Господь, висьтала, сійӧ збыльмас, и дыр виччысьны оз ков. Асныра войтырӧй, тіян олан лунъясӧ Ме висьтала Ассьым кывйӧс да збыльмӧда сійӧс, – висьталӧ Господь Ыджыдыс».

²⁶ Меным вӧлі Господьсянь кыв:

²⁷ «Морт пиӧй, Израиль войтыр шуӧ, мый тэ аддзылан Енсянь петкӧдчылӧмъяс, а найӧ дыр на оз збыльмыны, ӧд тэ пророкалан локтана кадъяс йылысь.

²⁸ Та вӧсна шу налы, мый Господь Ыджыдыс тадзи висьталӧ: талунсянь Менсьым кывйӧс збыльмӧдӧм оз ло ылыстӧма. Мый висьтала, сійӧ збыльмас, – висьталӧ Господь Ыджыдыс».