Езекиль 10 - Коми Библия 2023

Енлӧн дзирдлуныс вешйӧ крамысь

¹ Ме аддзи, мый херувимъяслӧн юр весьтын вӧлі вевт, а сы вылын сулаліс сапфир изйысь вӧчӧм юралан пуклӧс сяма.

² Господь шуис шабді паськӧма мортлы: «Пыр гӧгыльяс костӧ, херувимъяс улӧ. Содз тырыд босьт херувимъяс костысь биа ӧгырсӧ да койышт кар вылас». Ме аддзи, мый сійӧ муніс.

³ Херувимъяс сулалісны крам лунвывладорын, кор шабді паськӧма морт пырис на улӧ. Крамлысь пытшкӧс йӧрсӧ вӧлі вевттьӧма кымӧр.

⁴ Господьлӧн дзирдлуныс кыпӧдчис херувимъяс вылысь да вуджис крам ӧдзӧслань. Крамсӧ тыртіс кымӧр, а крам йӧрыс тырис Господьлӧн дзирдлунӧн.

⁵ Херувимъяслӧн борд шыныс кыліс весиг ортсы йӧрӧдз, сійӧ вӧлі Ставсӧвермысь Енлӧн гӧлӧс шы кодь.

⁶ Кор шабді паськӧма мортлы Господь тшӧктіс мунны да босьтны гӧгыльяс костысь, херувимъяс шӧрысь, биа ӧгыр, сійӧ муніс да сувтіс гӧгыль дінас.

⁷ Херувимъясысь ӧтиыс нюжӧдіс кисӧ на костын ӧзйысь билань, босьтіс биа ӧгырсӧ да пуктіс шабді паськӧма мортлы соддзас. Сійӧ босьтіс ӧгырсӧ да петіс.

⁸ Херувимъяслӧн борд улын тыдаліс мортлӧн кодь ки.

⁹ Ме аддзи херувимъяс дорысь нёль гӧгыль, быд херувим дорын вӧлі ӧти гӧгыль. Гӧгыльясыс вӧліны хризолит из кодьӧсь.

¹⁰ Тайӧ нёльнан гӧгыльыс вӧліны ӧткодьӧсь, быд гӧгыль пытшкын вӧлі нӧшта гӧгыль.

¹¹ Гӧгыльяс вермисны тюрны нёльнанлаӧ, и найӧ эз бергӧдчывны. Найӧ тюрисны сэтчӧ, кытчӧ видзӧдісны херувимъяс.

¹² Херувимъяслӧн мыгӧрныс, мышкуныс, киныс, бордныс да став нёльнан гӧгыльыс вӧлі тырӧмаӧсь синъясӧн.

¹³ Ме кылі, мый тайӧ гӧгыльяссӧ шуисны галгалӧн.

¹⁴ Быд херувимлӧн вӧлі нёль чужӧм: херувим чужӧм, морт чужӧм, лев чужӧм да кутш чужӧм.

¹⁵ Тайӧ вӧліны сійӧ жӧ ловъя олысьясыс, кодъясӧс ме аддзылі Кевар ю бокысь. Херувимъяс кыпӧдчисны.

¹⁶ Налӧн мунігӧн накӧд тюрисны и гӧгыльясыс. Кор херувимъяс шевкнитісны борднысӧ да кыпӧдчисны му вывсянь, гӧгыльясыс на бердысь эз торъявны.

¹⁷ Кор херувимъяс сувтісны, гӧгыльясыс тшӧтш сувтісны. А кор херувимъяс кыпӧдчисны, накӧд кыпӧдчисны тшӧтш гӧгыльясыс, ӧд гӧгыльясас вӧлі ловъя олысьяслӧн ловныс.

¹⁸ Господьлӧн дзирдлуныс вешйис крам ӧдзӧс дорысь да вуджис херувимъяс вылӧ.

¹⁹ Херувимъяс шевкнитісны борднысӧ да менам син водзын кыпӧдчисны му вывсянь. Гӧгыльясыс кыпӧдчисны накӧд. Херувимъяс сувтісны Господьлӧн крамӧ пыран асыввыв дзиръя дорӧ, и Израиль Енлӧн дзирдлуныс вӧлі на вылын.

²⁰ Тайӧ вӧліны сійӧ жӧ ловъя олысьясыс, кодъясӧс ме аддзылі Кевар ю бокын да кодъяс весьтын вӧлі Израильлӧн Ен. Ме гӧгӧрвои, мый тайӧ херувимъяс.

²¹ Быдӧнлӧн вӧлі нёль чужӧм да нёль борд, а борд уланыс вӧлі мортлӧн кодь ки.

²² Чужӧмнас да мыгӧрнас найӧ вӧліны сэтшӧмӧсь жӧ, кутшӧмъясӧс ме аддзылі Кевар ю бокысь. Быдӧн муніс сэтчӧ, кытчӧ видзӧдіс чужӧмыс.