Езекиль 1 - Коми Библия 2023

Ен петкӧдчӧ Аслас дзирдлунӧн Езекильлы

¹ Комынӧд воӧ нёльӧд тӧлысьлӧн витӧд лунӧ, кор ме вӧлі Кевар ю бокын пленӧ босьтӧмаяс пӧвстын, енэжыс воссис, и ме аддзылі Енсянь петкӧдчылӧм.

² Тайӧ вӧлі Еконей ӧксыӧс пленӧ босьтӧмсянь витӧд воӧ.

³ Калдея муын Кевар ю бокын меным, Езекиль поплы, Буз пилы, вӧлі Господьсянь кыв, и Сылӧн киыс вӧлі ме вылын.

⁴ Ме аддзи, мый войвывсянь кыпӧдчис ён тӧвныр. Сійӧ локтіс ыджыд кымӧрӧн да сявкйысь чардбиӧн. Кымӧрыс ставнас югъяліс-дзирдаліс.

⁵ Кымӧр пытшкас вӧлі би, и сэні биас мыйкӧ югъяліс-дзирдаліс. Би пытшкас тыдалісны нёль ловъя олысь. Мыгӧрнас найӧ вӧліны морт кодьӧсь.

⁶ Быдӧнлӧн вӧлі нёль чужӧм да нёль борд.

⁷ Кокныс вӧлі веськыд, а кок подныс вӧлі ӧшлӧн кодь, югъяліс ыргӧн моз. [Налӧн бордныс вӧлі кокньыд.]

⁸ Нёльнан боксяньыс налӧн борд уланыс вӧліны мортлӧн кодь кияс.

⁹ Нёльнанныслӧн вӧліны чужӧмъяс да бордъяс. Борднаныс найӧ инмисны ӧта-мӧдныслы. Муніганыс налы эз ковмы бергӧдчыны, ӧд найӧ мунісны сэтчӧ, кытчӧ видзӧдіс чужӧмныс.

¹⁰ Быдӧнлӧн вӧлі мортлӧн кодь чужӧм, веськыдладорас левлӧн кодь, шуйгаладорас ӧшлӧн кодь. Нӧшта быдӧнлӧн вӧлі кутшлӧн кодь чужӧм бӧрсяньыс.

¹¹ Татшӧм вӧлі налӧн чужӧмныс. Борднысӧ найӧ вӧлі шевкнитӧмаӧсь вывлань, и тайӧ кык борднас найӧ инмисны ӧта-мӧдныслы, а мӧд кык борднас вевттисны ассьыныс мыгӧрнысӧ.

¹² Найӧ мунісны сэтчӧ, кытчӧ видзӧдіс чужӧмныс. Кытчӧ веськӧдіс найӧс Лов, сэтчӧ найӧ и мунісны. Налы эз ковмыв бергӧдчынысӧ.

¹³ Тайӧ ловъя олысьясыс чужӧм-мыгӧрнаныс вӧліны биа ӧгыр кодьӧсь, ӧзъялысь би кывъяс кодьӧсь. На костті ветлӧдліс ыпъялысь би, а бисьыс петавліс чардби.

¹⁴ Ловъя олысьяс чардби моз тюръялісны ӧтарӧ-мӧдарӧ.

¹⁵ Ме аддзи, мый быд ловъя олысь улын вӧлі гӧгыль. Гӧгыльяс сулалісны му вылын.

¹⁶ Тайӧ нёльнан гӧгыльыс вӧліны ӧткодьӧсь. Найӧ вӧліны хризолитысь вӧчӧмтор кодьӧсь да сы моз югъялісны. Быд гӧгыль пытшкын вӧлі нӧшта гӧгыль.

¹⁷ Гӧгыльяс вермисны тюрны нёльнанлаӧ, и налы эз ковмыв бергӧдчынысӧ.

¹⁸ Нёльнан гӧгыль кытшыс вӧлі ыджыд да повзьӧдана, и тырӧма синъясӧн.

¹⁹ Ловъя олысьяскӧд тюрисны и гӧгыльясыс. А ловъя олысьяслӧн му вывсянь кыпӧдчигӧн гӧгыльясыс тшӧтш кыпӧдчисны.

²⁰ Ловъя олысьяс мунлісны сэтчӧ, кытчӧ Лов кӧсйис мунны. А ловъя олысьяскӧд тшӧтш кыпӧдчывлісны и гӧгыльяс, ӧд ловъя олысьяслӧн лолыс вӧлі тайӧ гӧгыльясас.

²¹ Кор ловъя олысьясыс мунісны, гӧгыльясыс тшӧтш мунісны, а кор сувтісны, гӧгыльясыс тшӧтш сувтісны. А кор ловъя олысьясыс кыпӧдчисны му вывсянь, накӧд кыпӧдчисны тшӧтш гӧгыльясыс, ӧд гӧгыльясас вӧлі ловъя олысьяслӧн ловныс.

²² Ловъя олысьяслӧн юр весьтын вӧлі мегыр сяма вевт, сійӧ измар моз шемӧсмӧданаа дзирдаліс.

²³ Вевт улас быд ловъя олысь вӧлі шевкнитӧма ӧта-мӧдыслы инмысь бордсӧ, а мӧд кык борднас вевттьӧма ассьыс мыгӧрсӧ.

²⁴ Ме кылі налӧн бордъяслысь шысӧ. Сійӧ вӧлі бузгысь ыджыд ва кодь, Ставсӧвермысьлӧн гӧлӧс шы кодь. Ловъя олысьяслӧн муніганыс борд шыныс вӧлі уна лыда тышкайӧзлӧн восьлалӧм шы кодь. А кор найӧ сувтлісны, борднысӧ лэдзлісны.

²⁵ Ловъя олысьяслӧн сувтӧм да борднысӧ лэдзӧм бӧрын налӧн вевт вывсянь юргис гӧлӧс шы.

²⁶ Тайӧ вевт весьтас тыдаліс сапфирысь вӧчӧм юралан пуклӧс кодь, кӧні пукаліс Кодкӧ морт кодь.

²⁷ Ме аддзи, мый коссяньыс вылӧджык Сійӧ югъяліс-дзирдаліс, быттьӧ би пытшкын ыпъяліс. А коссяньыс улӧджык Сійӧ ставнас вӧлі би пытшкын. Сы гӧгӧр ставыс югъяліс-дзирдаліс.

²⁸ Сійӧс кытшалысь дзирдалӧмыс вӧлі зэр дырйи кымӧръясын мыччысьӧм ӧшкамӧшка кодь.