Еврейяслы 3 - Коми Библия 2023

Исус – Мӧисейысь ыджыдджык

¹ Вокъяс, ме шыася тіян дінӧ, вежа войтыр да Енлӧн корӧмаяс дінӧ: видзӧдӧй Исус Кристос вылӧ. Сійӧс Енмыс мӧдӧдіс, Сійӧ – Аркирей, кодлы ми эскам.

² Енмыс сувтӧдіс Сійӧс Аркирейнас. Сійӧ кесъяліс Енмыслы кывзысьӧмӧн, кыдзи Мӧисей быд кадӧ кывзысьӧмӧн кесъяліс Ен керкаын.

³ Керка вӧчысьӧс ёнджыка ошкӧны керкасӧ дорысь. Тадзи Исусӧс ёнджыка шогмӧ ошкыны Мӧисейӧс дорысь.

⁴ Быд керкалӧн эм аслас вӧчысь, но Ставсӧвӧчысьыс – Ен.

⁵ Мӧисей кывзысьӧмӧн кесъяліс Ен керкаын, но сійӧ вӧлі сӧмын кесъялысь. Аслас олӧмнас сійӧ водзвыв петкӧдліс, мый Енмыс кӧсйис висьтавны бӧрынджык.

⁶ Ен керкаын Пиыс – Кристос, Сійӧ кывкутӧмӧн веськӧдлӧ ставнас Ен керканас. Ен керкаыс – тайӧ ми, лоам кӧ повтӧмӧсь да помӧдз кутам зумыда кутчысьны лачаас, мыйӧн ошйысям.

Энӧ чорзьӧдӧй сьӧлӧмнытӧ

⁷ Вежа Лов висьталӧ: – Талун, гӧлӧс шыӧс кылігӧн,

⁸ энӧ чорзьӧдӧй сьӧлӧмнытӧ, кыдзи ті вӧчинныд овтӧминын, кор кыпӧдчинныд Меным паныд да дӧзмӧдінныд Менӧ.

⁹ Сэні тіян батьясныд нелямын во чӧж аддзылісны Менсьым уджъясӧс, но дӧзмӧдісны Менӧ.

¹⁰ Ме дӧзми на вылӧ да шуи: сьӧлӧмнас найӧ ылалӧмаӧсь, Менсьым туйясӧс оз тӧдны.

¹¹ Та вӧсна Ме скӧрми на вылӧ да кыв сеті, мый найӧ оз пырны Менам шойччанінӧ.

¹² Вокъяс, видзчысьӧй, тіян пиысь мед некод эз вӧв эскытӧмӧн, эз ов лёк мӧвпъясӧн, медым энӧ кежӧй ловъя Енмысь.

¹³ Быд лун ышӧдӧй ӧта-мӧднытӧ, кытчӧдз позьӧ на шуны ”талун”, мед тіян пиысь некодлӧн эз чорзьы сьӧлӧмыс мыжыслӧн ылӧдлӧм вӧсна.

¹⁴ Ми кӧ водзысяньыс моз помӧдз кутам эскыны зумыда, сэки миянлы тшӧтш вичмас Кристослӧн озырлуныс.

¹⁵ Та йылысь шуӧма: – Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ, кыдзи ті вӧчинныд Сылы паныд кыпӧдчигӧн.

¹⁶ Ӧд Енлысь гӧлӧс шысӧ кылысьяс пиысь кодсюрӧ кыпӧдчисны Енмыслы паныд, но эз ставныс, кодъяс петісны Мӧисейкӧд Египетысь.

¹⁷ Код вылӧ нӧ Енмыс скӧраліс нелямын во чӧжсӧ? Эз-ӧ мыж вӧчысьяс вылӧ, кодъяслӧн лыясыс колины овтӧминӧ?

¹⁸ Кодлы нӧ Енмыс кыв сетіс, мый найӧ оз пырны Сылӧн шойччанінӧ? Эз-ӧ кывзысьтӧмъяслы?

¹⁹ Ми аддзам, мый эскытӧм вӧснаныс найӧ эз пырны Енлӧн шойччанінӧ.