Еврейяслы 11 - Коми Библия 2023

Эскӧм йылысь

¹ Эскӧмыс – виччысянторлӧн збыльмӧм да аддзытӧмсӧ аддзӧм.

² Миян пӧльяс эскисны, та вӧсна найӧ шогмисны Енлы.

³ Эскӧмӧн ми гӧгӧрвоам, мый ентыкӧлаыс артмӧма Ен кывйӧн. Тадзи аддзытӧмсьыс лои аддзанаыс.

⁴ Эскӧмӧн Авель вайис Енлы бурджык вись Каин дорысь. Авельлӧн эскӧм вӧсна Енмыс сибӧдіс сылысь висьсӧ да лыддис сійӧс веськыдӧн. Эскӧмыс вӧсна Авель весиг кулӧм бӧрас сёрнитӧ.

⁵ Эскӧм вӧсна Енокӧс вӧлі кыпӧдӧма енэжас кулӧмсӧ тӧдлытӧг. Сійӧ эз ло, ӧд Енмыс босьтіс сійӧс Ас дінас. Таӧдз на Еноклы вӧлі шуӧма, мый сійӧ шогмана Енмыслы.

⁶ Эскытӧгыд Енмыслы он шогмы. Ӧд Ен дінӧ локтысьлы колӧ эскыны, мый Енмыс эм, и мый Сійӧс корсьысьлы Сійӧ сетӧ тырдон.

⁷ Эскӧм вӧсна Нойлы вӧлі водзвыв сетӧма тӧдны аддзытӧмсӧ. Сійӧ кывзысис Енмыслысь да вӧчис ковчег, медым мездыны ассьыс гортсасӧ. Эскӧмнас сійӧ мыждіс муюгыдсӧ, эскӧм вӧсна сылы вичмис Енсянь веськыдлун.

⁸ Эскӧм вӧсна Ӧвраам кывзысис Енмыслысь да муніс кӧсйысьӧм муӧ. Сійӧ эз тӧд, кытчӧ мунӧ, но муніс.

⁹ Эскӧмӧн Ӧвраам овмӧдчис кӧсйысьӧм муӧ да локтысь моз оліс сэні чомъясын. Сы моз олісны чомъясын Исаак да Яков, кодъяслы тшӧтш вӧлі сетӧма Енлысь кӧсйысьӧмсӧ.

¹⁰ Ӧвраам виччысис зумыд подула кар, кодӧс Серпасалысьыс да Вӧчысьыс – Ачыс Енмыс.

¹¹ Сарра эз вермы вайны кага, но эскӧм вӧсна сійӧ пондіс нӧбасьны да ыджыд арлыдыс вылӧ видзӧдтӧг чужтіс кага. Сійӧ тӧдіс, мый сылы Кӧсйысьысьыс эскана.

¹² Тадзи ӧти мортсянь, Ӧвраамсянь, коді вӧлі пӧрысь нин, чужис сы мында олысь, мыйта енэжас лыдтӧм-тшӧттӧм кодзулыс да саридз дорын лыаыс.

¹³ Тайӧ эскысьясыс эз удитны босьтны Енсянь кӧсйысьӧмасӧ, но найӧ помӧдз видзисны эскӧмсӧ. Найӧ сӧмын ылісянь аддзылісны Енсянь кӧсйысьӧмасӧ да нимкодясисны сыӧн. Ас йывсьыныс найӧ шуалісны, ми пӧ тайӧ му вылас ветлысь-мунысьяс.

¹⁴ Тадзи шуӧмнас найӧ петкӧдлісны, мый корсьӧны аслыныс му.

¹⁵ Найӧ кӧ мӧвпалісны сійӧ муыс йылысь, кытысь петісны, эськӧ бӧр на вермисны бергӧдчыны сэтчӧ.

¹⁶ Но найӧ кӧсйисны овмӧдчыны бурджык муӧ – енэжӧ. Та вӧсна Енмыс оз яндысь шуны Асьсӧ налӧн Енмӧн, ӧд Сійӧ дасьтіс налы кар.

¹⁷ Эскӧмӧн Ӧвраам вайис вись пыдди Исаакӧс, кор Енмыс кӧсйис тӧдмавны сылысь эскӧмсӧ. Ӧвраам дась вӧлі сетны вись пыдди ассьыс ӧтка писӧ, кодӧс Енмыс сылы кӧсйысьліс.

¹⁸ Исаак йылысь Ӧвраамлы вӧлі шуӧма: «Исааксянь чужысьясӧс шуасны тэнад ныв-пиӧн».

¹⁹ Ӧвраам эскис, мый Енмыс вына ловзьӧдны весиг кулӧмысь. Дзик тадзи и артмис. Исаакӧс вӧлі бӧр сетӧма Ӧвраамлы, быттьӧ сійӧ ловзис кулӧмысь.

²⁰ Эскӧмӧн Исаак бурсиис Яковӧс да Исавӧс водзӧ олӧмас.

²¹ Кулігас Яков эскӧмӧн бурсиис Ӧсиплысь пиянсӧ да бедь вылас мыджсьӧмӧн юрбитіс Енлы.

²² Эскӧмӧн Ӧсип кулӧм водзвылас висьталіс пияныслы Израиль войтырлӧн Египетысь петӧм йылысь да тшӧктіс петкӧдны налы ассьыс лыяссӧ.

²³ Эскӧмӧн Мӧисейлӧн бать-мамыс дзеблалісны сійӧс чужӧм бӧрас куим тӧлысь чӧж. Найӧ аддзисны, мый кагаыс зэв мича, да эз повзьыны ӧксылӧн тшӧктӧмысь.

²⁴ Эскӧмӧн Мӧисей быдмӧм бӧрас дугдіс шуны асьсӧ фараон нывлӧн пиӧн.

²⁵ Сійӧ лыддис, мый бурджык Ен войтыркӧд нуны сьӧкыдсӧ, дженьыдик кад мыжа олӧмнас нимкодясьӧм дорысь.

²⁶ Кристос вӧсна лёкӧдӧмсӧ Мӧисей лыддис ыджыдджык озырлунӧн египетса став озырлун дорысь. Ӧд сійӧ тӧдіс, мый сылы лоӧ сетӧма тырдон.

²⁷ Эскӧмӧн Мӧисей петіс Египетысь, эз повзьы ӧксылӧн скӧрлунысь. Сійӧ вӧлі зумыд, ӧд видзӧдіс Тыдавтӧмыс вылӧ.

²⁸ Эскӧмӧн Мӧисей тшӧктіс пасйыны Израиль войтырлы Ыджыд лун да мавтыштны ӧдзӧс куричьяссӧ вирӧн, медым Андел-Бырӧдысь эз ви Израиль войтырлысь медводдза чужысьяссӧ.

²⁹ Эскӧмӧн Израиль войтыр вуджис Гӧрд саридз вомӧн. Найӧ мунісны сэті косінті моз. Египетсаяс тшӧтш на моз кӧсйисны вуджны, но ставныс вӧйисны.

³⁰ Эскӧм пыр киссисны Ерикон карса стенъяс сизим лун чӧж сійӧс кытшовтӧм бӧрын.

³¹ Эскӧм вӧсна Раав нима кырсалысь ань эз кув эскытӧмъяскӧд ӧтвыв, ӧд сійӧ бур сьӧлӧмӧн сибӧдіс израильса кыйӧдчысьясӧс.

³² Мый нӧшта содтыны татчӧ? Кадыс меным оз тырмы висьтавны Гедеон, Варак, Самсон, Еффай, Давид, Самуил да [мукӧд] пророкъяс йылысь.

³³ Эскӧмӧн найӧ тышын босьтісны йӧз муяс, ставсӧ вӧчисны веськыда, сибӧдісны Енсянь кӧсйысьӧмасӧ, лӧньӧдісны левъясӧс,

³⁴ кусӧдісны яр би, видзисны асьнысӧ шыпуртысь, вынтӧммиганыс найӧ ёнмылісны, тышын вӧліны вынаӧсь, йӧз муысь воысь тышкасьысьясӧс бӧр вӧтлісны асланыс муысь,

³⁵ ӧткымын аньлысь матыссасӧ ловзьӧдісны кулӧмысь. Мукӧдсӧ вӧлі дойдалӧма кувтӧдзыс, ӧд найӧ эз кӧсйыны босьтны мортсянь вӧзйӧм мездлунсӧ, но кӧсйисны босьтны бурджыксӧ – ловзьӧмсӧ.

³⁶ Ӧтиясӧс нӧйтісны орсӧн, лёкӧдісны да чептӧн дорӧмӧн видзисны дзескыдінын.

³⁷ Мӧдъясӧс изъялісны, быд ногыс дойдалісны, пилитісны шӧрипӧв да виисны шыпуртӧн. Коймӧдъяс ветлісны кӧза да ыж ку паськӧмӧн, пыкисны гӧльлун, найӧс нӧйтісны да вӧтлісны.

³⁸ Муюгыдыс эз сулав тайӧ йӧзыс дон, кодъяслы ковмис овны овтӧминын да керӧсын, кырта горсйын да му потасын.

³⁹ Эскӧм вӧсна ставныс найӧ вӧліны шогманаӧсь Енмыслы, но некод на пиысь эз босьт Енлысь кӧсйысьӧмасӧ.

⁴⁰ Енмыс дасьтӧма миянлы ёна бурджыктор, та вӧсна найӧ сӧмын миянкӧд ӧтвыв воасны тыр-бурас.