Эсфир 9 - Коми Библия 2023

Иудейяслӧн вермӧм

¹ Дас кыкӧд адар тӧлысьлӧн дас коймӧд лунӧ воис кад збыльмӧдны ӧксылысь тшӧктӧмсӧ. Иудейясӧс мустӧмтысьяс лача кутісны, мый дзик сійӧ лунӧ вермасны найӧс. Но артмис мӧдарӧ – иудейяс вермисны мустӧмтысьяснысӧ.

² Артаксеркслӧн ӧксыув муясын олысь иудейяс чукӧртчисны асланыс каръясын, медым уськӧдчыны на вылӧ, кодъяс кӧсйисны лёк вӧчны иудейяслы. Некод эз сувт иудейяслы паныд, ӧд ставныс полісны наысь.

³ Мардокейысь полӧмнысла ӧксыув муясын юралысьяс, сатрапъяс, ыджыдалысьяс да ӧксылӧн чина йӧз сувтісны иудейяс дор.

⁴ Мардокей вӧлі ӧксы керкаын ыджыд мортӧн. Сійӧс нимӧдісны быд муын, ӧд сылӧн ыджыдалӧмыс ӧтарӧ вынсяліс.

⁵ Иудейяс пасьвартісны вӧрӧгнысӧ, виалісны-бырӧдісны найӧс шыпуртӧн да вӧчисны мустӧмтысьясныскӧд, мый кӧсйисны.

⁶ Суза изкарын иудейяс виисны витсё мортӧс.

⁷ Виисны тшӧтш Паршандатӧс, Далфонӧс, Асфатӧс,

⁸ Поратӧс, Адальӧс, Аридатӧс,

⁹ Пармаштӧс, Арисайӧс, Аридайӧс да Вайзатӧс.

¹⁰ Тайӧ дас мортыс вӧліны Аммедат Аманлӧн, иудейясӧс мустӧмтысьлӧн, пиян. Найӧс виисны, но налысь овмӧс-эмбурсӧ эз босьтны.

¹¹ Сійӧ жӧ лунӧ ӧксылы юӧртісны Суза юркарын виӧмаяслысь лыдсӧ.

¹² Ӧксы висьталіс Эсфир ӧксы-аньлы: «Суза изкарын иудейяс виисны витсё мортӧс, тшӧтш Аманлысь даснан писӧ. А мукӧд ӧксыув муясын мый на вӧчисны! Висьтав, мый тэ кӧсъян? Ставсӧ сета тэныд. Кутшӧм корӧм тэнад? Ставсӧ вӧча».

¹³ Эсфир вочавидзис: «Ӧксылы кӧ шогмана, мед лэдзас Суза карын олысь иудейяслы аски тшӧтш талунъя моз вӧчны. И Аманлысь даснан писӧ мед ӧшӧдасны пу сюръя вылӧ».

¹⁴ Ӧксы тшӧктіс вӧчны тайӧс. Суза карын юӧртісны ӧксылысь тшӧктӧмсӧ, а Аманлысь даснан писӧ ӧшӧдісны пу сюръя вылӧ.

¹⁵ Адар тӧлысьлӧн дас нёльӧд лунӧ Суза карын олысь иудейяс бара чукӧртчисны да виисны куимсё мортӧс, но налысь овмӧс-эмбурсӧ эз босьтны.

¹⁶ Мукӧд ӧксыув муясын олысь иудейяс тшӧтш чукӧртчисны, мед дорйыны асьнысӧ да мынтӧдчыны вӧрӧгысь. Иудейяс виисны найӧс мустӧмтысьяс лыдысь сизимдас вит сюрс мортӧс, но налысь овмӧс-эмбурсӧ эз босьтны.

¹⁷ Тайӧ вӧлі адар тӧлысьлӧн дас коймӧд лунӧ. Дас нёльӧд луннас найӧ шойччисны – гажӧдчисны да нимкодясисны.

¹⁸ А Суза карын олысь иудейяс чукӧртчылісны дорйыны асьнысӧ дас коймӧд и дас нёльӧд лунъясӧ, а дас витӧд луннас найӧ шойччисны – гажӧдчисны да нимкодясисны.

¹⁹ Та вӧсна ылысса кар-сиктъясын олысь иудейяс пасйӧны тайӧ лунсӧ адар тӧлысьлӧн дас нёльӧд лунӧ. Сэки найӧ нимкодясьӧны, гажӧдчӧны да ысталӧны матыссаясыслы чӧскыдторъяс. [Ыджыд каръясын нимкодясьӧны да гажӧдчӧны адар тӧлысьлӧн дас витӧд лунӧ, и сэки найӧ ысталӧны матыссаясыслы козинъяс.]

Пурим гаж йылысь тшӧктӧм

²⁰ Мардокей гижис тайӧ лоӧмторъяс йылысь да ысталіс гижӧдсӧ Артаксеркс ӧксыув муясӧ матын и ылын олысь иудейяслы.

²¹ Сійӧ тшӧктіс налы быд во адар тӧлысьӧ пасйыны дас нёльӧд да дас витӧд лунъяс.

²² Ӧд тайӧ лунъясӧ иудейяс мынтӧдчисны вӧрӧгысь, тайӧ тӧлысяс шогыс бергӧдчис налы нимкодясьӧмӧ, бӧрдӧмыс – гажӧдчӧмӧ. Мед тайӧ лунъясӧ найӧ гажӧдчасны да нимкодясясны, мед ысталасны матыссаясыслы чӧскыдторъяс да гӧльяслы козинъяс.

²³ Иудейяс водзӧ пондісны вӧчны сійӧ, мый заводитісны нин, и мый йылысь Мардокей гижліс налы.

²⁴ Агагсянь чужысь Аммедатлӧн Аман пиыс, иудейясӧс мустӧмтысь, кӧсйис дзикӧдз бырӧдны найӧс. Аман пудъясис найӧс пасьвартан да бырӧдан лун вӧсна.

²⁵ Но кор Эсфир локтіс ӧксы водзӧ, ӧксы тшӧктіс гижны выль гижӧд, медым лёкыс, мый Аман кӧсйис вӧчны иудейяслы, сылы аслыс бергӧдчас, и медым сійӧс пияныскӧд ӧшӧдасны пу сюръя вылӧ.

²⁶ Та вӧсна тайӧ лунъясыслы сетӧма ”пурим” ним, артмӧма ”пур” кывйысь [еврей ”пур” кывйыслӧн вежӧртасыс ”пудъясянтор”]. Гижӧд вылӧ, аддзылӧмторъяс да лоӧмторъяс вылӧ подуласьӧмӧн

²⁷ иудейяс тшӧктісны, мый быд во индӧм кадӧ налы, налӧн ныв-пилы да накӧд ӧтувтчысь йӧзлы гижӧд серти колӧ пасйыны тайӧ кык лунсӧ.

²⁸ Чужысьяссянь чужысьясӧдз быд рӧдын мед тӧд выланыс кутӧмӧн пасъясны тайӧ лунъяссӧ быд муын да быд карын. Иудейяс мед оз вежны пурим лунъяссӧ, а насянь чужысьяс мед оз вунӧдны тайӧ гажсӧ.

²⁹ Эсфир ӧксы-ань, Абихайллӧн нылыс, гижис иудей Мардокейкӧд мӧд гижӧд да аслас нимӧн вынсьӧдіс ставсӧ, мый вӧлі гижӧма пурим йылысь.

³⁰ Лӧньлун вайысь гижӧдсӧ ысталісны иудейяслы Артаксеркслӧн сё кызь сизим ӧксыув муӧ,

³¹ медым вынсьӧдны пурим лунъяс пасйӧмсӧ иудей Мардокейлӧн да Эсфир ӧксы-аньлӧн урчитӧм кадӧ. Иудейяс асьныс кӧсйысисны да водзӧ чужысьяслы колисны тшӧктӧм – пасйыны тайӧ лунъяссӧ видзалӧмӧн да бӧрдӧмӧн.

³² Тадзи Эсфирлӧн тшӧктӧмыс вынсьӧдіс пурим пасйӧмсӧ, и тайӧ тшӧктӧмсӧ вӧлі гижӧма небӧгӧ.