Эсфир 8 - Коми Библия 2023

Иудейяслӧн мездмӧм

¹ Сійӧ жӧ лунӧ Артаксеркс ӧксы сетіс Эсфир ӧксы-аньлы Аманлысь, иудейясӧс мустӧмтысьлысь, овмӧссӧ. Эсфир висьталіс ӧксылы, кодӧн лоӧ сылы Мардокей, и Мардокей пырис ӧксы дінӧ.

² Ӧксы пӧрччис чунькытшсӧ, мый бӧр босьтіс Аманлысь, да сетіс сійӧс Мардокейлы. А Эсфир пуктіс Мардокейӧс веськӧдлыны Аман овмӧсӧн.

³ Эсфир бара шыасис аслас могӧн ӧксы дінӧ. Сылы кок дорас уськӧдчӧмӧн Эсфир бӧрдӧмӧн корис, мед ӧксы видзас иудейясӧс лёксьыс, мый мӧвпыштӧма вӧлі вӧчны Агагсянь чужысь Аман.

⁴ Ӧксы нюжӧдіс зарни бедьсӧ Эсфирлань. Эсфир чеччис да сувтіс ӧксы водзӧ.

⁵ Сэсся шуис: «Ӧксылы кӧ шогмана, да сійӧ кӧ бур сьӧлӧма ме дінӧ, и тайӧ могсӧ кӧ ӧксы лыддьӧ веськыдӧн, да ме кӧ сылӧн синлы вая нимкодьлун, мед гижас тшӧктӧм, мый Агагсянь чужысь Аммедат Аманлӧн гижӧдыс да ӧксыув муясысь иудейясӧс бырӧдӧм йылысь шуӧмыс абу нин вына.

⁶ Кыдзи нӧ ме верма видзӧдны менсьым войтырӧс суӧм шог вылӧ? Верма ӧмӧй видзӧдны ассьым рӧдӧс бырӧдӧм вылӧ?»

⁷ Артаксеркс ӧксы шуис Эсфир ӧксы-аньлы да иудей Мардокейлы: «Аманлысь овмӧссӧ ме сеті нин Эсфирлы, и Аманӧс иудейяс вылӧ кисӧ лэптӧмысь ӧшӧдӧма нин пу сюръя вылӧ.

⁸ Ті асьныд гижӧй иудейяс йылысь тшӧктӧм, кутшӧм тіянлы колӧ. Гижӧй сійӧс ӧксы нимсянь да ӧксылӧн чунькытшнас пуктӧй вынсьӧдана пас. Ӧксы нимсянь гижӧм да ӧксы чунькытшӧн вынсьӧдӧм гижӧдсӧ некод вежны оз вермы».

⁹ Коймӧд сиван тӧлысьлӧн кызь коймӧд лунӧ чукӧртісны ӧксылысь гижалысьясӧс. Мардокейлысь тшӧктӧмсӧ гижисны иудейяслы, ыджыдалысьяслы, сатрапъяслы да ӧксыув муясын юралысьяслы Индиясянь Эфиопияӧдз, сё кызь сизим муӧ – быдлаӧ сэні олысьяслӧн шыпасъясӧн да быд войтырлӧн чужан кыв вылын. Иудейяслы тшӧтш гижисны налӧн шыпасъясӧн да налӧн кыв вылын.

¹⁰ Мардокей гижис Артаксеркс ӧксы нимсянь, вынсьӧдіс гижӧдсӧ ӧксылӧн чунькытшнас да ыстіс сійӧс верзьӧмаяскӧд ӧксылӧн медбур вӧвъяс вылын.

¹¹ Гижӧдас вӧлі юӧртӧма, мый быд карын олысь иудейяслы ӧксы лэдзӧ чукӧртчыны да дорйыны асьнысӧ, вины да бырӧдны на вылӧ уськӧдчысьясӧс быд муысь да быд войтыр пӧвстысь, весиг аньясӧс челядьныскӧд, а эмбурсӧ налысь мырддьыны.

¹² Тайӧс позис вӧчны Артаксеркслӧн быд ӧксыув муын ӧти и сійӧ жӧ лунӧ – дас кыкӧд адар тӧлысьлӧн дас коймӧд лунӧ. [Гижӧдас вӧлі пасйӧма: «Артаксеркс ыджыд ӧксы чолӧмалӧ Индиясянь Эфиопияӧдз сё кызь сизим му вылын ыджыдалысь сатрапъясӧс да миянлысь кывзысьысь войтырӧс. Бурсӧ вӧчысьяслӧн мелілунысь да налӧн пыдди пуктӧмысь унаӧн юрнысӧ вылӧ лэптӧны. Найӧ зільӧны вӧчны лёксӧ оз сӧмын миян киподувса йӧзлы, но весиг асланыс бур вӧчысьяслы, ӧд налы нинӧм оз тырмы. Найӧ бурсӧ сибӧдны оз кужны, вунӧдӧны аттьӧавны да ошйысьӧны вывтіасьӧмнас. Найӧ чайтӧны, мый пышъясны лёксӧ мустӧмтысь да ставсӧ аддзысь Енлӧн мыждӧмысь. Ыджыдалысьяс, кодъяс эскӧны асланыс ёртъясныслы да пуктӧны найӧс веськӧдлыны, асланыс ёртъяслӧн туйдӧдӧм вӧсна тшӧкыда лоӧны мыжаӧсь мыжтӧм йӧзлысь вирсӧ кисьтӧмысь да вежны позьтӧм лёк вӧчӧмысь. Тайӧ ёртъясыс наяна пӧръясьӧны, ылӧдлӧны ассьыныс ыджыдалысьяссӧ, кодъяс восьса сьӧлӧмаӧсь на дінӧ. Татшӧмторсӧ позьӧ аддзыны оз сӧмын важдырся лоӧмторъясысь, но и талун ті аддзанныд шогмытӧм веськӧдлысьяслысь лёк вӧчӧмсӧ. Та вӧсна водзӧвылӧ тӧждысям сы йылысь, мый миян юраланінын став йӧзыс вермасны овны повтӧг да лӧня. Огӧ лэдзӧй пыртны вежсьӧмъяс, но сюся видлалам миян водзӧ пуктӧм могъяс. Шуны кӧ Аммедатлӧн Аман пи йылысь, коді Македонияысь, сійӧ мӧд вира, абу Персия войтырысь. Миян бур оласногысь сійӧ вӧлі ёна ылын, но ми быд войтырӧс моз сибӧдім сійӧс бур сьӧлӧмӧн. Ставныс сійӧс пыдди пуктісны, ыдждӧдлӧмӧн шуисны миян батьӧн. Сійӧ вӧлі ӧксы бӧрся медыджыд морт. Но вылӧ кыпӧдчӧмнас сійӧ зілис вины миянӧс да пуксьыны миян пыдди ӧксыӧ. А миянӧс мездысь да дугдывтӧг бурсӧ вӧчысь Мардокейӧс, миянлысь сӧстӧм сьӧлӧма Эсфир ӧксы-аньӧс да налысь став войтырсӧ Аман быд ногыс миянӧс ылӧдлӧмӧн корис бырӧдны. Тадзи сійӧ кӧсйис кольны миянӧс ӧткӧн да Персия мунымӧс сетны Македония войтырлы. Но ми аддзам, мый иудейяс, кодъясӧс тайӧ лёк вӧчысьыс кӧсйис бырӧдны, абу лёк йӧз, найӧ олӧны медся веськыд тшӧктӧмъяс серти. Найӧ юрбитӧны медвылысса да медыджыд ловъя Енлы, коді веськӧдліс батьяснымӧн да ӧні веськӧдлӧ миянӧн, медым миян муын вӧлі лӧнь олӧм. Та вӧсна ті бура вӧчанныд, онӧ кӧ збыльмӧдӧй Аммедат Аманлысь гижӧдсӧ. Таысь сійӧс гортсаясыскӧд ӧшӧдӧма Енлӧн кӧсйӧм серти Суза кар дзиръя дорын. Енмыс, коді ставыс вылын ыджыдалӧ, нюжмасьтӧг мыждіс сійӧс колана ногӧн. Тайӧ гижӧдсӧ ӧшлӧй быдлаӧ йӧзаинъясӧ. Лэдзӧй иудейяслы кутчысьны асланыс оласногӧ. Дас кыкӧд адар тӧлысьлӧн дас коймӧд лунӧ, кор на вылӧ уськӧдчасны, отсалӧй налы дорйысьны тайӧ сьӧкыд кадас. Ӧд Енмыс, коді ыджыдалӧ ставыс вылын, аслас бӧрйӧм войтырлы кулӧм пыдди лӧсьӧдіс нимкодясьӧм. Сідзкӧ, тайӧ тӧдчана лунӧ мукӧд гажӧдчан лунъясӧ моз ёна нимкодясьӧй, медым ӧні и водзӧ оз ло вунӧдӧма миянӧс мездӧм да Персия войтыр дінӧ бур сьӧлӧмаясӧс мездӧм йылысь, оз ло вунӧдӧма миянӧс бырӧдны лӧсьӧдчысьяслӧн кулӧм йылысь. Быд кар да быд му, кӧні оз вӧчны тайӧ гижӧдыс серти, лоӧ жалиттӧг бырӧдӧма шыпуртӧн да биӧн. Сэні некод оз кут овны, весиг лэбачлы да пемӧслы зывӧк лоӧ сэтчӧ локны».]

¹³ Тайӧ гижӧдсӧ индӧдӧс моз колӧ вӧлі юӧртны ӧксыув муясын олысь войтыръяслы, медым индӧм лунӧ иудейяс вӧліны дасьӧсь водзӧс перйыны найӧс мустӧмтысьяслысь.

¹⁴ Ӧксылӧн тэрыб вӧвъяс вылын верзьӧмаяс дзик пыр тӧвзисны юӧртны ӧксылысь тшӧктӧмсӧ. Юӧртісны тшӧтш Суза изкарын.

¹⁵ Кор Мардокей петіс ӧксы дінысь, сы вылын вӧлі ӧксылӧн еджыд да гӧрдовлӧз рӧма паськӧм, вӧсни шабдіысь пемыдгӧрд кышан, юр вылас ыджыд зарни юркытш. Суза карын олысьяс гажӧдчисны да нимкодясисны.

¹⁶ Иудейяслӧн олӧмыс югдіс, локтіс долыдлун да пыдди пуктӧм.

¹⁷ Быд муын да быд карын – быдлаын, кӧні юӧртісны ӧксылысь тшӧктӧмсӧ, иудейяслӧн вӧлі нимкодьлун да долыдлун, найӧ сёйисны-юисны да гажӧдчисны. Мукӧд войтыръясысь унаӧн лоисны иудейясӧн, ӧд полісны наысь.