Эсфир 6 - Коми Библия 2023

Ӧксы бурӧн мынтысьӧ Мардокейлы

¹ Сійӧ войнас ӧксы эз вермы унмовсьны. Ӧксы тшӧктіс [кесйӧгыслы] вайны каднебӧг. Кор сійӧс лыддисны ӧксылы,

² аддзисны сэтысь пасйӧд: Мардокей, вӧлӧм, юӧртлӧма, мый Бигтан да Тереш евнукъяс, кодъяс видзисны ӧксылысь вежӧсъяс, кӧсйӧмаӧсь вины Артаксеркс ӧксыӧс.

³ Ӧксы юаліс: «Кутшӧм ногӧн донъялӧма-нимӧдӧма Мардокейӧс таысь?» Ӧксы бердын кесъялысьяс вочавидзисны: «Кольӧма донъявтӧг».

⁴ [Кор ӧксы вӧлі юасьӧ Мардокейлӧн бур вӧчӧм йылысь, йӧрӧ пырис Аман.] Ӧксы юаліс: «Коді сэні йӧрас?» Ӧксы керкалӧн ортсы йӧрӧ вӧлі локтӧма Аман сёрнитны ӧксыкӧд, медым ӧшӧдны Мардокейӧс пу сюръя вылӧ, мый Аман сувтӧдіс сылы.

⁵ Кесъялысьяс вочавидзисны ӧксылы: «Йӧрад Аман сулалӧ». «Мед пырас», – шуис ӧксы.

⁶ Кор Аман пырис, ӧксы юаліс сылысь: «Висьтав, мый позьӧ вӧчны сійӧ мортыслы, кодӧс ӧксы кӧсйӧ донъявны?» Аман ас кежас мӧвпыштіс: «Буракӧ, ӧксы кӧсйӧ менӧ донъявны? А кодӧс сэсся меысь кындзи?»

⁷ Сэсся вочавидзис ӧксылы: «Сійӧ мортыслы, кодӧс ӧксы кӧсйӧ донъявны,

⁸ мед ваясны ӧксы паськӧм, мый ӧксы пасьтавліс, да ӧксы юркытшӧн мичмӧдӧм вӧв, код вылын ӧксы ветліс.

⁹ Паськӧмсӧ да вӧвсӧ мед ваяс ӧксылӧн медыджыд юралысьясысь ӧти. Сійӧ мортсӧ, кодӧс ӧксы кӧсйӧ донъявны, мед пасьтӧдасны, пуксьӧдасны вӧв вылӧ да петкӧдасны карса изэрд вылӧ. Сы водзын мед гораа юӧртасны: ”Тадзи вӧчӧны сылы, кодӧс ӧксы кӧсйӧ донъявны!”»

¹⁰ Ӧксы шуис Аманлы: «[Бур вӧзйӧм]. Дзик пыр босьт паськӧмсӧ да вӧвсӧ, кыдзи тэ ачыд вӧзйин, да ставсӧ вӧч аслад шуӧм серти Мардокей нима иудейлы, коді кесъялӧ меным».

¹¹ Аман босьтіс ӧксы паськӧм да вӧв, пасьтӧдіс Мардокейӧс, петкӧдіс сійӧс вӧв вылын карса изэрд вылӧ да мунігмозыс сы водзын юӧртіс: «Тадзи вӧчӧны сылы, кодӧс ӧксы кӧсйӧ донъявны!»

¹² Та бӧрын Мардокей бӧр локтіс ӧксы керкаӧ, а Аман шогсьӧмысла юрсӧ тупкӧмӧн тэрмасьӧмӧн муніс гортас.

¹³ Аман висьталіс Зереш гӧтырыслы да аслас ёртъяслы, мый сыкӧд лои. Сылӧн сюсь мывкыда ёртъясыс да Зереш гӧтырыс шуисны сылы: «Иудейясысь кӧ тайӧ Мардокейыс, код вӧсна пондін усьны, тэ сійӧс он вермы, а ачыд дзикӧдз усян [ӧд сыкӧд ловъя Ен]».

¹⁴ Налӧн сёрнитігкості локтісны ӧксылӧн евнукъяс, мед тэрмасьӧмӧн вайӧдны Аманӧс Эсфирлӧн дасьтӧм гаж вылӧ.