Эсфир 5 - Коми Библия 2023

Эсфир лӧсьӧдӧ ӧксылы да Аманлы гаж

¹ Коймӧд луннас Эсфир [дугдіс кевмысьны, пӧрччис шогалан паськӧмсӧ да] пасьталіс ассьыс ӧксы паськӧмсӧ. [Эсфир лои шензьӧдана мича ӧксы-аньӧн. Ставсӧ аддзысь да мездысь Ен дінӧ шыасьӧмӧн сійӧ босьтіс аскӧдыс кык кесйӧг аньӧс, ӧти вылас сійӧ мыджсис, медым мунны ӧксы-ань восьласӧн, а мӧдыс бӧрсяньыс кутіс сылысь платтьӧ бӧжсӧ. Эсфир дзоридзаліс аслас мичлунӧн. Чужӧм вылас тыдаліс сэтшӧм долыдлун, мый тыдавлӧ муслунӧн тырӧм мортлӧн. Но сьӧлӧмсӧ Эсфирлысь вӧлі топӧдӧма полӧм.] Эсфир локтіс ӧксылӧн пытшкӧс йӧрӧ да сувтіс ӧксы керкаӧ пыранін водзӧ. Ӧксы сэки пукаліс ӧксы керкаын юралан пуклӧсын, пыран ӧдзӧслы воча. [Ӧксыалан паськӧма, зарниӧн да дона изъясӧн мичмӧдӧм ӧксы вӧлі повзьӧдана.] Кор ӧксы аддзис йӧрын сулалысь Эсфир ӧксы-аньӧс, сійӧ бурсьӧлӧмтчис Эсфир дінӧ. [Югъялан чужӧмсӧ бергӧдӧмӧн ӧксы зэв скӧра видзӧдліс. Эсфир ӧксы-аньлӧн вежсис чужӧмыс, сійӧ садьсӧ воштіс да лёсмуніс-усис аслас кесйӧг ань вылӧ. Сэки Енмыс небзьӧдіс ӧксылысь сьӧлӧмсӧ. Ӧксы дзик пыр чеччис аслас юралан пуклӧсысь да сывйыштіс Эсфирӧс. Сывъяс кутіс, кытчӧдз сійӧ эз во ас садяс. Сэсся ӧксы бурӧдігмоз меліа шуаліс: «Эсфир, мый тэкӧд? Ме ӧд тэныд вок кодь. Эн пов. Тэ он кув, ӧд тэ ӧксы-ань. Матыстчы ме дінӧ».]

² Ӧксы нюжӧдіс Эсфирлань зарни бедьсӧ, мый киас кутіс. Эсфир матыстчис да инмӧдчыліс бедь помас. [Ӧксы инмӧдліс бедьсӧ Эсфирлы сьыліас, окыштіс сійӧс да шуис: «Висьтав, мый тэкӧд?» Эсфир шуис: «Ыджыдӧй, кор ме видзӧдлі тэ вылӧ, тэ вӧлін Ен андел кодь. Тэнад дзирдалӧмысь полӧмӧйла ме шӧйӧвоши. Ыджыдӧй, тэ шензьӧдана! Тэнад чужӧм вылын тыдалӧ ыджыд буралӧм». Сёрнитігкостіыс Эсфир лигышмуніс да усис. Ӧксы шӧйӧвошис. Ӧксылӧн кесъялысьяс ставныс пондісны отсавны Эсфирлы.]

³ Ӧксы юаліс: «Мый тэ кӧсъян, Эсфир ӧксы-аньӧй? Кутшӧм тэнад корӧмыд? Весиг аслам мулысь джынсӧ сета тэныд».

⁴ Эсфир вочавидзис: «[Талун менам гажӧдчан лун.] Шогмана кӧ ӧксылы, талун мед локтас Аманкӧд гаж вылӧ. Тайӧ гажсӧ ме дасьті ӧксылы».

⁵ Ӧксы тшӧктіс дзик пыр вайӧдны Аманӧс, медым вӧчны Эсфирлӧн кӧсйӧм серти. Сэсся ӧксы да Аман локтісны Эсфирлӧн гаж вылӧ.

⁶ Вина юӧм дырйи ӧксы юаліс Эсфирлысь: «Мый тэ кӧсъян? Ставсӧ вӧча. Кутшӧм тэнад корӧмыд? Весиг аслам мулысь джынсӧ сета тэныд».

⁷ Эсфир вочавидзис: «Менам корӧм-кӧсйӧмӧй татшӧм:

⁸ ӧксы кӧ бур сьӧлӧма ме дінӧ да лыддьӧ шогманаӧн вӧчны менам корӧм-кӧсйӧм серти, мед [аски бара] локтас Аманкӧд гаж вылӧ, мый ме дасьта налы. Аски ме вочавидза ӧксылы».

Аман дасьтысьӧ ӧшӧдны Мардокейӧс

⁹ Сійӧ лунӧ Аман петіс Эсфир дорысь долыда нимкодясьӧмӧн. Но кор аддзис ӧксылы кесъялысь Мардокейӧс, коді эз сувт да эз тірав-пов сы водзын, тырис Мардокей дінӧ лӧглунӧн.

¹⁰ Но Аман кутчысис. Кор локтіс гортас, корис ассьыс ёртъяссӧ да Зереш гӧтырсӧ.

¹¹ Аман ошйысис налы аслас ыджыд озырлунӧн, ошйысис, мый сылӧн уна пи, и мый ӧксы ыдждӧдліс сійӧс да кыпӧдіс аслас юралысьясысь да веськӧдлысьясысь медвылӧ.

¹² Сэсся Аман содтіс: «Эсфир ӧксы-ань некодӧс эз кор аслас гаж вылӧ, сӧмын ӧксыӧс да менӧ. Аски бара корис локны ӧксыкӧд.

¹³ Но ӧксылы кесъялысь Мардокей нима иудейӧс аддзигӧн менам став долыдлунӧй вошӧ».

¹⁴ Сэки Зереш гӧтырыс да ёртъясыс шуисны Аманлы: «Тшӧкты сувтӧдны ветымын гырддза судта пу сюръя. Асывнас ӧксылы шу, мед тшӧктас ӧшӧдны сэтчӧ Мардокейӧс. Сэки нимкодь сьӧлӧмӧн верман мунны ӧксыкӧд гаж вылад». Аманлы сьӧлӧм вылас воис татшӧм вӧзйӧмыс, и сійӧ тшӧктіс сувтӧдны пу сюръя.