Еремей 8 - Коми Библия 2023

¹ Сійӧ кадас, – висьталӧ Господь, – иудаса ӧксыяслысь, юралысьяслысь, попъяслысь да пророкъяслысь лыяссӧ и Ерусалим карын олысьяслысь лыяссӧ босьтасны дзебанінъясысь.

² Лыяссӧ разӧдасны шонді, тӧлысь да енэжвыв кодзувъяс улӧ, кодъясӧс найӧ радейтісны, кодъяслы кесъялісны да юрбитісны-копрасисны и кодъяссянь корсьысисны туйдӧдӧм. Налысь лыяссӧ оз чукӧртны, оз гуавны, найӧ кутасны куйлыны му вылас да пӧрасны куйӧдӧ.

³ А тайӧ лёк йӧз пӧвстсьыс ловйӧн кольӧмаяслы кулӧмыс лоӧ мусаджык олӧм дорсьыс. Тадзи лоӧ быдлаын, кытчӧ Ме вӧтла найӧс, – висьталӧ Господь Саваоф».

Господь мыждӧ Ассьыс войтырсӧ

⁴ Висьтав налы, мый Господь тадзи висьталӧ: – Мортыс кӧ усьӧ, оз ӧмӧй чеччы? Сійӧ кӧ ылалӧ туй вывсьыс, оз ӧмӧй бӧр бергӧдчы?

⁵ Мыйла тайӧ войтырыс бергӧдчӧма Меысь, мыйла Ерусалимын олысьяс эновтӧмаӧсь Менӧ? Найӧ зумыда кутчысьӧны ылӧгас, оз кӧсйыны бӧр бергӧдчыны.

⁶ Ме сюся кывза найӧс, но збыльсӧ найӧ оз висьтавны, некод оз каитчы аслас лёк вӧчӧмысь, некод оз шу: «Мый нӧ ме вӧчи!» Тышӧ петысь вӧв моз быдӧн котӧртӧ аслас туйӧд.

⁷ Аист тӧдӧ ассьыс кадсӧ, гулю, чикыш да тури тшӧтш тӧдӧны, кор налы бергӧдчыны гортаныс, но Менам войтырӧй оз тӧд Менсьым Индӧдӧс.

⁸ Ті шуаннныд, ми пӧ мывкыда йӧз, миян пӧ эм Господьлӧн Индӧдыс. Но, збыльвылас, Индӧдӧ велӧдысьяс Индӧдсӧ гижигӧн бергӧдісны сійӧс ылӧгас.

⁹ Мывкыдаяс яналасны, повзясны да веськаласны тывйӧ. Налӧн мывкыдлуныс абу, ӧд найӧ ӧтдортісны Господьлысь кывсӧ.

¹⁰ Та вӧсна налысь гӧтырнысӧ Ме сета мукӧдлы, налысь видз-мунысӧ – выль кӧзяинъяслы, ӧд ичӧтсянь гырысьӧдз ставныс найӧ ылӧдлӧмӧн озырмӧдчӧны, пророкъяс и попъяс – ставныс пӧръясьӧны.

¹¹ Найӧ чайтӧны, мый кокньыда бурдӧдӧны Менам войтырлысь дойяссӧ, шуалӧны: «Лӧнь олӧм, лӧнь олӧм!», а лӧнь олӧмыс абу.

¹² Яндысьтӧг найӧ вӧчӧны зывӧксӧ, нинӧмысь оз повны, весиг оз гӧрдӧдны. Та вӧсна найӧ усясны усьӧмаяс пӧвстӧ, крукасясны, кор Ме мыжда найӧс, – висьталӧ Господь.

¹³ Виноградӧс моз Ме чукӧрта найӧс, медым мӧдӧдны пленӧ, – висьталӧ Господь, – вожъяс вылас оз коль весиг ӧти тусь, инжир пу вылын оз коль вотӧсыс, коръясыс косьмасны. Ставсӧ, мый Ме сеті налы, лоӧ мырддьӧма.

¹⁴ – Мый нӧ ми пукалам? Чукӧртчӧй, мунамӧй изкаръясӧ, и сэні кулам. Господь, миян Енным, шуис бырӧдны миянӧс, Сійӧ юктӧдӧ миянӧс яд сора ваӧн, ӧд ми мыж вӧчим Господьлы паныд.

¹⁵ Ми виччысим лӧнь олӧм, но бурыс эз во, ми виччысим бурдӧм, но миянӧс полӧм босьтӧ.

¹⁶ Дан чужанкотырлӧн мусянь кылӧ вӧвъяслӧн корскӧмыс, ужъяслӧн гӧрдлӧмысь муыс тіралӧ. Вӧрӧг локтіс бырӧдны тайӧ мусӧ да ставсӧ, мый тані быдмӧ, сійӧ бырӧдӧ Ерусалим кар да сэні олысьясӧс.

¹⁷ – Ме мӧдӧда тіян пӧвстӧ яда змейясӧс, – висьталӧ Господь, – найӧ пондасны чушкыны тіянӧс, и нимкыв лыддьӧмныд оз вермы сувтӧдны найӧс.

¹⁸ – Шогӧй топӧдӧ менӧ, менам сьӧлӧмӧй бӧрдӧ!

¹⁹ – Ылі муысь Ме кыла Аслам войтырлысь отсӧг йылысь горзӧмсӧ: «Сионын ӧмӧй абу Господьыс, сэні ӧмӧй абу ӧксыыс?» Мыйла найӧ скӧрмӧдісны Менӧ асланыс идолъясӧн, мукӧд войтыръяслӧн шогмытӧм идолъясӧн?

²⁰ – Вундан кадыс помасис, гожӧмыс колис, но ми абу на мездмӧмаӧсь.

²¹ Менам войтырлӧн дойясыс вайӧны меным дой, менам сьӧлӧмӧй шогсьӧ, полӧмыс топӧдӧ менӧ.

²² Галаадын ӧмӧй абу бурдӧдчан выйыс, сэні ӧмӧй абу бурдӧдысьыс? Мыйла менам войтырлӧн оз бурдны дойясыс?