Еремей 52 - Коми Библия 2023

Ерусалим кар босьтӧм

¹ Ӧксыӧ пуксигас Седекейлы вӧлі кызь ӧти арӧс. Дас ӧти во чӧж сійӧ юраліс Ерусалимын. Сылӧн мамыс вӧлі Хамуталь, Ливнаысь Еремейлӧн нылыс.

² Ехояким моз Седекей вӧчис Господь водзын шогмытӧмсӧ.

³ Иуда муын да Ерусалим карын олысьяс вылӧ Господьлӧн скӧрлуныс вӧлі сэтшӧм ыджыд, мый вӧтліс найӧс Аслас чужӧмбан водзысь. Седекей кыпӧдчис вавилонса ӧксылы паныд.

⁴ Та вӧсна Седекейлӧн ӧкмысӧд веськӧдлан воӧ дасӧд тӧлысьлӧн дасӧд лунӧ вавилонса Навукодоносор ӧксы аслас тышкайӧзкӧд уськӧдчис Ерусалим кар вылӧ. Найӧ кытшалісны карсӧ да лэптісны сы гӧгӧр тымӧд.

⁵ Карыс вӧлі кытшын Седекей ӧксылӧн дас ӧтиӧд веськӧдлан воӧдз.

⁶ Нёльӧд тӧлысьлӧн ӧкмысӧд лунӧ, кор карас войтырыс ёна тшыгъяліс, и налы нинӧм вӧлі сёйнысӧ,

⁷ карсӧ кытшалысь калдеяса тышкайӧз жугӧдісны карса стенсӧ. Войнас иудаса тышкайӧз петісны Ерусалим карысь дзиръяӧд, мый вӧлі кыкпӧвста стенмас ӧксылӧн сад дорын. Найӧ пышйисны Йӧрдан ковтыслань.

⁸ Но калдеяса тышкайӧз вӧтчисны Седекей ӧксы бӧрся да суӧдісны сійӧс Ерикон кардорса ковтысын. Ӧксылӧн тышкайӧзыс эновтісны сійӧс да пышйисны-разалісны.

⁹ Седекей ӧксыӧс кутісны да вайӧдісны вавилонса ӧксы дінӧ Ривлаӧ, Хамат муӧ. Сэні вавилонса ӧксы мыждіс Седекейӧс.

¹⁰ Ривлаын Седекейлӧн син водзын вавилонса ӧксы виис сылысь пиянсӧ. Виис тшӧтш иудаса став юралысьсӧ.

¹¹ Вавилонса ӧксы бытшкис Седекейлысь кыкнан синсӧ да дорис сійӧс ыргӧн чепъясӧн. Сэсся нуӧдіс сійӧс Вавилонӧ да йӧршитіс дзескыдінӧ. Сэні Седекей пукаліс кувтӧдзыс.

Ерусалимса крам бырӧдӧм да войтырӧс пленӧ нуӧдӧм

¹² Вавилонса Навукодоносор ӧксылӧн дас ӧкмысӧд веськӧдлан воӧ, витӧд тӧлысьлӧн дасӧд лунӧ, Ерусалимӧ локтіс Навузардан, ӧксыӧс видзысьяслӧн юралысь, вавилонса ӧксыӧс туйдӧдысь.

¹³ Сійӧ сотіс Ерусалимысь Господьлысь крамсӧ, ӧксылысь керкасӧ да став ыджыд керкасӧ.

¹⁴ Навузарданлӧн калдеяса тышкайӧзыс жугӧдісны Ерусалимӧс кытшалысь стенсӧ.

¹⁵ А карас кольӧм войтырсӧ, весиг гӧльясӧс да вавилонса ӧксы дор вуджӧм йӧзӧс, Навузардан, ӧксыӧс видзысьяслӧн юралысь, нуӧдіс Вавилонӧ.

¹⁶ Сӧмын гӧль йӧз пӧвстысь этшаникӧс Навузардан кольӧдіс уджавны виноград йӧрын да видз-му вылын.

¹⁷ Калдеяса тышкайӧз жуглісны Господьлӧн крамысь ыргӧн сюръяяссӧ, мыссян доз улысь джекъяссӧ да ыргӧн вайӧртӧдсӧ. Став ыргӧнсӧ нуисны Вавилонӧ.

¹⁸ Найӧ босьтісны тшӧтш пӧим чукӧртан воръяс, пӧим куралан зыръяс, пуртъяс, вир резан тасьтіяс, кӧшъяс да ыргӧнысь вӧчӧм мукӧд дозмуксӧ, мыйӧн вӧдитчисны крамын кесъялігӧн.

¹⁹ Ӧксыӧс видзысьяслӧн юралысь босьтіс зарниысь да эзысьысь вӧчӧм тасьтіяс, ӧгыр пӧртъяс, вир резан тасьтіяс, пӧим чукӧртан воръяс, бикокъяс, кӧшъяс да дозъяс.

²⁰ Кык сюръя, вайӧртӧд, сы улын сулалысь дас кык ыргӧн ӧш да джекъяс, мый вылын сулалісны мыссян дозъяс, коркӧ Господьлӧн крамӧ вӧчліс Соломон ӧксы. Тайӧ вӧчӧмторъясас ыргӧныс вӧлі сы мында, мый весиг эз позь веситнысӧ.

²¹ Быд сюръя вӧлі дас кӧкъямыс гырддза судта. А гӧгӧртны кӧ сюръясӧ, лоӧ дас кык гырддза. Сюръялӧн пытшкӧсыс вӧлі куш, а стенмыс вӧлі нёль чунь кызта.

²² Сюръя йылас вӧлі ыргӧнысь вӧчӧм юр, сылӧн судтаыс вӧлі вит гырддза. Юр гӧгӧрыс вӧліны чепъясысь вӧчӧм мичмӧданторъяс да гранат кодь сяръяс. Сюръяясыс вӧліны ӧткодьӧсь. Ставсӧ вӧлі вӧчӧма ыргӧнысь.

²³ Чепъясысь вӧчӧм мичмӧданторъяс вылын вӧлі гранат кодь сё сяр, на пиысь ӧкмысдас квайт сярыс ӧшалісны юр бокъясас.

²⁴ Навузардан, ӧксыӧс видзысьяслӧн юралысь, босьтіс Серай аркирейӧс да сылы отсасьысь Софоний попӧс, тшӧтш крам пыранін видзысь куим попӧс.

²⁵ Карсьыс босьтіс ыджыд чина мортӧс, коді кывкутіс тышкайӧз вӧсна, босьтіс ӧксылысь сизим туйдӧдысьӧс, кодъяс вӧлі кольӧмаӧсь на карас, тшӧтш тышкайӧзлӧн юралысьлысь гижалысьсӧ, коді пасъяліс небӧгӧ тышӧ мунысьясӧс. Нӧшта Навузардан босьтіс карсьыс квайтымын мортӧс, кодъяс шедісны сы киӧ.

²⁶ Ставнысӧ Навузардан, ӧксыӧс видзысьяслӧн юралысь, вайӧдіс вавилонса ӧксы дінӧ Ривлаӧ.

²⁷ Ривлаын, Хамат муын, вавилонса ӧксы виис найӧс. Тадзи Иуда войтырӧс вӧлі нуӧдӧма пленӧ аслас муысь.

²⁸ Аслас сизимӧд веськӧдлан воӧ Навукодоносор нуӧдіс Иуда муысь пленӧ куим сюрс кызь куим мортӧс.

²⁹ Навукодоносорлӧн дас кӧкъямысӧд веськӧдлан воӧ Ерусалимысь вӧлі нуӧдӧма кӧкъямыссё комын кык мортӧс.

³⁰ Навукодоносорлӧн кызь коймӧд веськӧдлан воӧ Навузардан, ӧксыӧс видзысьяслӧн юралысь, нуӧдіс Иуда муысь пленӧ сизимсё нелямын вит мортӧс. Ставнас вӧлі нуӧдӧма нёль сюрс квайтсё мортӧс.

Еконей ӧксы дінӧ бурсьӧлӧмтчӧм

³¹ Иудаса Еконей ӧксыӧс пленӧ нуӧдӧм бӧрын комын сизимӧд вонас дас кыкӧд тӧлысьлӧн кызь витӧд лунӧ вавилонса Эвил-Меродак ӧксы бурсьӧлӧмтчис иудаса Еконей ӧксы дінӧ да лэдзис сійӧс дзескыдінысь. Буретш тайӧ вонас Эвил-Меродак лоис ӧксыӧн.

³² Сійӧ бура сёрнитіс Еконейкӧд да пуктіс сійӧс Вавилонын олысь мукӧд ӧксыяс дорысь вылӧджык.

³³ Еконей пӧрччис дзескыдінын пукалан паськӧмсӧ да пасьталіс мӧд паськӧм. Сійӧ кадсяньыс да олӧм помӧдзыс Еконей сёйис-юис вавилонса ӧксылӧн пызан сайын.

³⁴ Вавилонса ӧксы сетіс сылы быд лун кежлӧ став коланаторсӧ, и тадзи вӧлі Еконейлӧн олӧм помӧдзыс.