Еремей 50 - Коми Библия 2023

Вавилон йылысь пророкалӧм

¹ Господь висьталіс Еремей пророк пыр Вавилон кар да Калдея му йылысь татшӧм кыв:

² – Юӧртӧй войтыръяслы, кыпӧдӧй дӧрапас, юӧртӧй, энӧ дзебӧй, висьталӧй тадзи: Вавилон карӧс босьтӧма, Вил идолӧс янӧдӧма, Мардук идолӧс пасьвартӧма, вавилонса идолъясӧс янӧдӧма, сылысь бӧлбанъяссӧ жугӧдӧма.

³ Войвывсянь Вавилон вылӧ уськӧдчас войтыр, вӧчас Вавилон му овтӧминӧн. Некод оз кут овны сэні, йӧз и ыж-мӧс пышъясны сэтысь.

⁴ Сійӧ лунъясас, сійӧ кадас, – висьталӧ Господь, – локтасны Израиль да Иуда войтыръяс. Найӧ мунасны бӧрдӧмӧн, кутасны корсьны Господьӧс, ассьыныс Енсӧ.

⁵ Найӧ пондасны корсьны Сионӧ мунан туй, сылань чужӧмнысӧ бергӧдӧмӧн найӧ шуасны: «Мунамӧй Господь дінӧ, огӧ вунӧдӧй пыр кежлӧ кӧрталӧм йитӧдсӧ».

⁶ Менам войтырӧй вӧлі вошӧм ыж чукӧр кодь, видзысьясныс кежӧдісны найӧс туйсьыс, разӧдісны керӧсвыв му пасьтала. Найӧ шӧйтісны-ветлӧдлісны керӧсъяс да ыбъяс вывті, вунӧдісны ассьыныс оланінсӧ.

⁷ Накӧд паныдасьысьяс уськӧдчывлісны на вылӧ, найӧс мустӧмтысьяс шуавлісны, ми пӧ абу мыжаӧсь, ӧд найӧ мыж вӧчисны веськыдлуныслӧн оланінлы паныд да Господьлы паныд, код вылӧ батьясныс лача кутісны.

⁸ Пышйӧй Вавилонысь, мунӧй Калдея муысь, кӧзаяс моз мунӧй ыж чукӧр водзын.

⁹ Войвыв муысь Ме вайӧда уна лыда войтыръясӧс, и найӧ кытшаласны да босьтасны Вавилон. Найӧ бура лыйсьӧны ньӧввужйысь, налӧн ньӧвъясыс веськалӧны коланаинӧ.

¹⁰ Калдея муӧс лоӧ куштӧма, и сійӧс куштысьяс пӧтасны, – висьталӧ Господь.

¹¹ Ті, Менсьым войтырӧс куштысьяс, гажӧдчинныд-нимкодясинныд, видз вылӧ лэдзӧм кукань моз ризъялінныд, тышӧ петысь вӧв моз корскинныд.

¹² Но тіян мамныд ёна яналас, тіянӧс чужтысьлы юръяндзим лоӧ. Войтыръяс пӧвстын вавилонсаяс лоӧны медічӧт войтырӧн, налӧн муыс лоӧ овтӧмин, кушин да кос му.

¹³ Господьлӧн скӧралӧм вӧсна сэні оз ло олысьыс, сійӧ лоӧ овтӧминӧн. Вавилонӧс бырӧдӧмысь сы дорті мунысьясӧс полӧм босьтас.

¹⁴ Кытшалӧй Вавилон кар, ньӧввужйысь лыйсьысьяс, лыйлӧй сэтчӧ, энӧ жалитӧй ньӧвъяснытӧ, ӧд Вавилон мыж вӧчис Господьлы паныд.

¹⁵ Быд боксянь горзӧмӧн уськӧдчӧй Вавилон вылӧ! Вавилон сетчӧ, башняясыс усьӧны, стенъяссӧ жуглӧны, ӧд Господь водзӧс перйӧ сылысь. Водзӧс перйӧй! Вӧчӧй сылы сійӧ жӧ, мый сійӧ вӧчис.

¹⁶ Бырӧдӧй Вавилонысь нянь кӧдзысьясӧс, бырӧдӧй чарлаӧн вундысьясӧс. Дзескӧдысьлӧн шыпуртысь быдӧн мед бергӧдчас аслас войтыр дінӧ, пышъяс аслас муӧ.

¹⁷ Израиль войтыр разалӧм ыж чукӧр кодь, левъяс вӧтлісны сійӧс. Водзынджык сійӧс вильӧдіс ассурса ӧксы, сэсся вавилонса Навукодоносор ӧксы чегъяліс сылысь лыяссӧ.

¹⁸ Та вӧсна Господь Саваоф, Израильлӧн Ен, тадзи висьталӧ: Ассурса ӧксыӧс моз Ме мыжда вавилонса ӧксыӧс да сылысь мусӧ.

¹⁹ Израиль войтырӧс Ме бӧр бергӧда аслас йирсянінӧ, сійӧ пондас йирсьыны Кармил да Васан ыбъяс вылын, кутас пӧткӧдчыны Ефрем да Галаад керӧсвыв муясын.

²⁰ Сійӧ лунъясас, сійӧ кадас, – висьталӧ Господь, – кутасны корсьны Израиль войтырлысь лёк вӧчӧмъяссӧ, но весьшӧрӧ, кутасны корсьны Иуда войтырлысь мыжъяссӧ, но оз аддзыны, ӧд Ме прӧстита найӧс, кодъясӧс ловйӧн коля.

²¹ Тышӧ петӧй Мератаим мулы паныд, Пекодын олысьяслы паныд, виӧй найӧс, бырӧдӧй ставсӧ, мый на бӧрти коляс, – висьталӧ Господь. – Ставсӧ вӧчӧй Менам тшӧктӧм серти.

²² Тайӧ муас кылӧ тышлӧн шы, ставсӧ жуглӧны-пазйӧны.

²³ Став мусӧ пазӧдысь мӧлӧтӧс жугӧдӧма-чегӧма! Вавилон лои повзьӧдчанторйӧн войтыръяс пӧвстын.

²⁴ Ме пукті тэныд нальк, Вавилон, и тэ тӧдлытӧг шедін сэтчӧ. Тэнӧ аддзисны да кутісны, ӧд тэ кыпӧдчин Господьлы паныд.

²⁵ Ыджыдыс, Господь Саваоф, восьтіс Ассьыс видзанінъяссӧ, босьтіс сэтысь Ассьыс скӧрлуна тышкасянторъяссӧ, медым Калдея муын вӧчны Ассьыс уджсӧ.

²⁶ Уськӧдчӧй Калдея му вылӧ быд боксянь, восьтӧй сылысь амбаръяссӧ, босьтӧй сэтысь ставсӧ да чукӧртӧй кольтаясӧс моз, дзикӧдз бырӧдӧй ставсӧ, медым нинӧм эз коль.

²⁷ Виӧй вавилонса тышкайӧзӧс, ӧшъясӧс моз начкӧй найӧс. Курыд шог вавилонсаяслы, ӧд воис налӧн луныс, найӧс мыждан кадыс.

²⁸ Кылӧ пышйӧмаяслӧн гӧлӧс шыныс, найӧ мездмӧмаӧсь Вавилонысь. Сионын найӧ висьталӧны, мый Господь, миян Енным, водзӧс перйис Аслас крамыс вӧсна.

²⁹ Чуксалӧй Вавилонлы паныд ньӧввужйӧн лыйсьысьясӧс, кытшалӧй Вавилон кар, медым некод эз пышйы сэтысь. Мынтысьӧй сылы уджъясыс серти, вӧчӧй сыкӧд сідзи, кыдзи сійӧ вӧчис. Ӧд сійӧ кыпӧдчис Господьлы паныд, Израильлӧн вежа Енлы паныд.

³⁰ Сылӧн изэрдъяс вылын усясны зонъяс, сійӧ лунӧ сылысь тышкайӧзсӧ лоӧ виӧма, – висьталӧ Господь.

³¹ Ышнясьысь, Ме сувта тэныд паныд, – висьталӧ Ыджыдыс, Господь Саваоф, – воис тэнад луныд, тэнӧ мыждан кадыд.

³² Ышнясьысь крукасяс да усяс, некод оз лэпты сійӧс. Сылысь каръяссӧ Ме сота, на гӧгӧрысь ставсӧ би ньылыштас.

³³ Господь Саваоф тадзи висьталӧ: – Израиль да Иуда войтыръясӧс дзескӧдӧны, пленӧ нуӧдысьяс чорыда чабыртӧмаӧсь найӧс, оз кӧсйыны лэдзны.

³⁴ Но найӧс Мездысьыс вына, Сылӧн нимыс – Господь Саваоф. Сійӧ доръяс найӧс да налӧн мулы сетас лӧньлун, а Вавилонын олысьяслы ыстас полӧм-тіралӧм.

³⁵ Калдея войтыр весьтӧ кыпӧдӧма шыпурт, – висьталӧ Господь, – кыпӧдӧма шыпурт Вавилонын олысьяс весьтӧ, налӧн юралысьяс да тӧдысьяс весьтӧ.

³⁶ Шыпурт кыпӧдӧма больгысьяс весьтӧ, и найӧ йӧймасны. Шыпурт кыпӧдӧма вавилонса тышкайӧз весьтӧ, и найӧ шӧйӧвошасны.

³⁷ Шыпурт кыпӧдӧма вавилонса вӧвъяс да тарантасъяс весьтӧ, йӧз муысь локтӧм шыпуртаяс весьтӧ, и найӧ аньяс моз повзясны. Шыпурт кыпӧдӧма вавилонсаяслӧн озырлун весьтӧ, и найӧс лоӧ куштӧма.

³⁸ Юясыс косьмасны, ваыс бырас, ӧд Вавилон – идолъяслӧн му. Идолъяс вӧсна сэні олысьяс вежӧрнысӧ воштӧмаӧсь.

³⁹ Сэні пондасны овны шакалъяс да овтӧминса зверъяс, сэтчӧ овмӧдчасны страусъяс, йӧзыс сэтчӧ оз нин овмӧдчыны, нэмъяс чӧж сэні некод оз кут овны.

⁴⁰ Кыдзи Енмыс бырӧдіс Содом, Гомора да орчча каръяссӧ, – висьталӧ Господь, – тадзи жӧ Вавилонын оз ло олысьыс, сэтчӧ некод оз овмӧдчы.

⁴¹ Войвывсянь локтӧны тышкайӧз, му помсянь ӧксыяскӧд локтӧ уна лыда войтыр.

⁴² Налӧн кианыс ньӧввуж да шы, найӧ скӧрӧсь, некодӧс оз жалитны, налӧн гӧлӧс шыныс бузгысь саридзлӧн кодь. Найӧ рӧдтӧны вӧвъяс вылын, дасьӧсь тышкасьны тэкӧд, Вавилон ныв.

⁴³ Вавилонса ӧксы кыліс на йылысь юӧр, и сылӧн киыс вынтӧммис, шогыс суис сійӧс, дойыс топӧдіс сійӧс кага чужтысь аньӧс моз.

⁴⁴ Йӧрдан юдорса вӧрысь веж йирсянінӧ петысь лев моз Ме виччысьтӧг вӧтла вавилонсаясӧс асланыс муысь. Ме пукта налы юралысьӧ сійӧс, кодӧс Ме бӧръя. Эм-ӧ кодкӧ Ме кодьыс? Коді вермас тшӧктыны Менӧ вочавидзны ёрд водзын? Сюрас ӧмӧй сэтшӧм юралысь, коді вермас Меным паныд кыпӧдчыны?

⁴⁵ Кывзӧй, мый Господь шуис Вавилон йылысь, мый шуис вӧчны Калдея муын олысьяслы. Весиг налысь медічӧтъяссӧ пышйӧдасны, налысь оланінъяссӧ куштасны.

⁴⁶ Вавилон кар босьтӧм шыысь муыс сыркмунлас, войтыръяс кыласны вавилонсаяслысь горзӧмсӧ.