Еремей 46 - Коми Библия 2023

Египет йылысь пророкалӧм

¹ Еремей пророклы вӧлі мукӧд войтыръяс йылысь Господьсянь кыв.

² Иудаса Ехояким ӧксылӧн, Иосей пилӧн, нёльӧд веськӧдлан воӧ, кор вавилонса Навукодоносор ӧксы пасьвартіс египетса Неко фараонлысь тышкайӧзсӧ Каркемисын, Ефрат ю дорын, Еремейлы вӧлі Египет йылысь да египетса тышкайӧз йылысь Господьсянь кыв:

³ – Дасьтӧй ичӧт и ыджыд сайӧдъяс, петӧй тышӧ!

⁴ Доддялӧй вӧвъяснытӧ, сӧлӧй тарантасӧ! Пасьталӧй юртупкӧднытӧ, ёсьтӧй шынытӧ, пасьталӧй кӧрт кышӧднытӧ!

⁵ Но мый Ме аддза? Найӧ повзьӧмаӧсь, бӧр бергӧдчӧны, налысь вына шыпуртаяссӧ пасьвартӧмаӧсь. Найӧ пышйӧны, бӧрлань оз видзӧдны, найӧс быд боксянь повзьӧдлӧны, – висьталӧ Господь. –

⁶ Тэрыб кока оз вермы пышйыны, вына морт оз мездмы. Войвылын, Ефрат ю дорын, найӧ крукасясны да усясны.

⁷ Коді нӧ Нил ю моз кыпӧдчӧ, ызгысь ва моз кыпӧдчӧ?

⁸ Египет кыпӧдчӧ Нил ю моз, ызгӧ визув ва моз. Сійӧ шуӧ: «Ме кыпӧдча да вевття мусӧ, Ме бырӧда каръяс да сэні олысьяссӧ».

⁹ Рӧдтӧй, вӧвъяс, тӧвзьӧй, тарантасъяс! Петӧй тышӧ, вына шыпуртаяс, петӧй сайӧдъясӧн, эфиопияса да ливияса тышкайӧз, петӧй зэвтӧм ньӧввужъясӧн, лудса тышкайӧз!

¹⁰ Тайӧ луныс – Господьлӧн лун, Господь Саваофлӧн водзӧс перъян лун. Сійӧ мынтысяс Аслас вӧрӧглы, Сылӧн шыпуртыс пондас виавны – пӧттӧдзыс юас налысь вирсӧ. Ӧд войвыв муын, Ефрат ю дорын, тайӧ вир кисьтӧмыс лоӧ вись вайӧм Ыджыдыслы, Господь Саваофлы.

¹¹ Египет ныв, мун Галаадӧ, вай сэтысь бурдӧдчан вый. Но весьшӧрӧ тэ дасьтан бурдӧдчанторъяс, тэнад дойыд оз бурд.

¹² Тэнӧ янӧдӧм йылысь кылісны войтыръяс, тэнад горзӧмыд тыртіс ставнас мусӧ. Тэнад вына тышкайӧзыд крукасисны ӧта-мӧдас, ставныс ӧтлаын усисны.

¹³ Господь висьталіс Еремей пророклы, мый вавилонса Навукодоносор ӧксы локтас да пазӧдас Египет му.

¹⁴ – Висьталӧй Египетын, юӧртӧй Мигдолын, Мемфисын и Тафнисын, тшӧктӧй египетсаяслы чеччыны да дасьтысьны, ӧд шыпурт бырӧдӧ на гӧгӧрысь ставсӧ.

¹⁵ Египет, тэнад вына ыджыдалысьыд усьӧма, ӧд Господь уськӧдіс сійӧс.

¹⁶ Господь унаӧс уськӧдіс, найӧ усьласисны ӧта-мӧд выланыс да шуалісны: «Чеччӧй, бӧр бергӧдчамӧй ас войтыр дінӧ, мунам асланым чужан муӧ, пышъям дзескӧдысьлӧн шыпуртысь».

¹⁷ Фараон йылысь горзӧны: «Фараон, египетса ӧксы, нинӧм абусӧ больгӧ, сійӧ воштіс сылы индӧм кадсӧ».

¹⁸ Ме кыв сета, – висьталӧ Ӧксы, кодлӧн нимыс Господь Саваоф, – мый локтас вӧрӧг, коді керӧсъяс пӧвстын сулалысь Тавор керӧс кодь, саридз весьтын сулалысь Кармил керӧс кодь.

¹⁹ Чукӧрт ассьыд кӧлуйтӧ, Египет ныв, дасьтысьӧй мунны пленӧ, Египетын олысьяс! Ӧд Мемфис лоӧ овтӧминӧн, сэні оз коль олысьыс.

²⁰ Египет – мичасьыс-мича кукань, войвывсянь лэбзьӧ сыланьӧ лӧдз чукӧр.

²¹ Египетлӧн медалӧм тышкайӧзыс тшӧгӧдӧм ӧшпиян кодьӧсь, но весиг найӧ уськӧдчисны пышйыны. Найӧ котӧртӧны, оз сувтлыны, ӧд воис найӧс бырӧдан луныс, воис найӧс мыждан кадыс.

²² Змей моз чушкӧ Египет, вына вӧрӧг уськӧдчӧ Египет вылӧ, вӧр пӧрӧдысь моз локтӧ черъясӧн.

²³ Вӧрӧг пӧрӧдас Египетлысь сук вӧрсӧ, – висьталӧ Господь. – Вӧрӧглӧн лыдыс саранча дорысь на унджык, сылысь тышкайӧзсӧ он вермы лыддьынысӧ.

²⁴ Египет нылӧс лоӧ янӧдӧма, сійӧс лоӧ сетӧма войвывса войтырлӧн киӧ.

²⁵ Господь Саваоф, Израильлӧн Ен, висьталӧ: Ме мыжда Но карлысь Амон идолсӧ, фараонӧс, Египет му, сылысь енъяссӧ да ӧксыяссӧ. Ме мыжда фараонӧс да сы вылӧ лача кутысьясӧс.

²⁶ Найӧс Ме сета налысь олӧмсӧ босьтны кӧсйысьяслӧн киӧ, сета вавилонса Навукодоносор ӧксы киӧ да сылы кесъялысьяслӧн киӧ. Но та бӧрти Египетын воддза мозыс бара кутасны овны, – висьталӧ Господь.

Израиль войтырлы бурӧдан кывъяс

²⁷ – Эн пов, Менам Яков кесйӧгӧй, эн пов, Израиль! Ме вайӧда тэнӧ ылі муысь, мезда тэсянь чужысьясӧс пленысь. Яковлӧн рӧдыс бӧр локтас, сійӧ кутас овны лӧня да повтӧг, сійӧс некод оз кут повзьӧдлыны.

²⁸ Эн пов, Менам Яков кесйӧгӧй, – висьталӧ Господь, – Ме тэкӧд! Ме бырӧда став войтыръяссӧ, кодъяс пӧвстӧ разӧді тэнӧ. Тэнӧ Ме ог бырӧд, но мыжда тэнӧ веськыдлунӧй серти, мыждытӧг тэнӧ ог коль.