Еремей 42 - Коми Библия 2023

Еремей ӧлӧдӧ коляс войтырӧс Египетӧ мунӧмысь

¹ Карейлӧн Иоханан пиыс да Хошайлӧн Езаний пиыс, тшӧтш тышкайӧзӧн веськӧдлысьяс да став войтырыс ичӧтсянь гырысьӧдз локтісны

² да шуисны Еремей пророклы: «Корам тэнӧ, кывзы миянӧс да кевмысь Господьлы, аслад Енлы, миян вӧсна, тайӧ коляс йӧзыс вӧсна. Ми вӧлім унаӧн, а колим этшаӧн, тэ ӧд ачыд аддзан тайӧс.

³ Господь, тэнад Енмыд, мед петкӧдлас миянлы туйсӧ, кыті мунны да мый вӧчны».

⁴ Еремей пророк вочавидзис налы: «Ме кылі тіянӧс, ме кевмыся Господьлы, тіян Енлы, тіян корӧмныд серти. Ставсӧ, мый Господь висьталас, ме юӧрта тіянлы, ог дзеб тіянысь ни ӧти кыв».

⁵ Найӧ шуисны Еремейлы: «Господь мед лоӧ эскана да збыль аддзылысь-висьталысьӧн. Сійӧ мед висьталас миянлы паныд, ми кӧ огӧ вӧчӧй ставсӧ сідзи, кыдзи тшӧктӧ Господь, тэнад Енмыд.

⁶ Лоӧ-ӧ Господьлӧн кӧсйӧмыс миянлы сьӧлӧм серти али оз, но ми кывзысям Господьлысь, миян Енлысь, код дінӧ ми ыстам тэнӧ. Миянлы бур лоӧ, ми кӧ кывзысям Господьлысь, миян Енлысь».

⁷ Дас лун мысти Еремейлы вӧлі Господьсянь кыв.

⁸ Еремей корис ас дінас Карейлысь Иоханан писӧ, тышкайӧзӧн веськӧдлысьясӧс, кодъяс вӧліны сыкӧд, да став войтырсӧ ичӧтсянь гырысьӧдз.

⁹ Еремей шуис налы: «Господь, Израильлӧн Ен, код дінӧ ті мӧдӧдлінныд менӧ, медым ме висьталі Сылы тіянлысь корӧмнытӧ, тадзи висьталӧ:

¹⁰ ”Ті кӧ кольччанныд тайӧ муас, Ме ёнмӧда тіянӧс, ог пазӧд, Ме вужйӧда тіянӧс, ог нетшышт. Ме вӧчи тіянлы лёксӧ, и шогся та вӧсна.

¹¹ Ӧні ті поланныд вавилонса ӧксыысь. Энӧ полӧй сыысь, – висьталӧ Господь, – ӧд Ме тіянкӧд. Ме видза тіянӧс, мезда тіянӧс сылӧн киысь.

¹² Ме петкӧдла тіян дінӧ Ассьым буралӧмӧс – вавилонса ӧксы бурсьӧлӧмтчас тіян дінӧ и бӧр бергӧдас тіянӧс асланыд муӧ”.

¹³ Но ті кӧ онӧ кывзысьӧй Господьлысь, асланыд Енлысь, а шуанныд, тайӧ муас пӧ ми огӧ кӧсйӧй овны,

¹⁴ мунам пӧ да овмӧдчам Египет муӧ, кӧні оз ло тыш, кӧні огӧ кутӧй кывны буксан шылысь чуксалӧмсӧ да огӧ кутӧй тшыгъявны,

¹⁵ сідзкӧ, ті, Иудалӧн коляс войтырыс, кывзӧй ӧні Господьлысь кывсӧ. Господь Саваоф, Израильлӧн Ен, тадзи висьталӧ: ”Ті кӧ шуанныд мунны Египетӧ да овмӧдчанныд сэтчӧ,

¹⁶ сідзкӧ, шыпурт, мыйысь ті поланныд, да тшыглун, мыйысь тіянӧс полӧм босьтӧ, суасны тіянӧс Египет муын, и сэні ті куланныд.

¹⁷ Став йӧзыс, кодъяс мунасны да овмӧдчасны Египетӧ, куласны шыпуртысь, тшыглунысь да пӧрӧс висьӧмысь. Некод на пӧвстысь ловйӧн оз коль, некод оз пышйы шогысь, мый Ме мӧдӧда на вылӧ”.

¹⁸ Господь Саваоф, Израильлӧн Ен, тадзи висьталӧ: ”Кыдзи Менам скӧрлунӧй да ярлунӧй киссис ерусалимса олысьяс вылӧ, тадзи жӧ Менам скӧрлунӧй киссяс тіян вылӧ, кор ті воанныд Египетӧ. Тіянӧс пондасны ёрны да лёкӧдны-омӧльтны, ті лоанныд повзьӧдчанторйӧн, и водзӧ ті онӧ нин аддзылӧй тайӧ мусӧ”.

¹⁹ Иудалӧн коляс войтырыс, кывзӧй! Господь висьталӧ тіянлы: ”Энӧ мунӧй Египетӧ!” Тӧдӧй, талун ме ӧлӧді тіянӧс.

²⁰ Ті ылӧдлінныд асьнытӧ. Ті мӧдӧдінныд менӧ Господь Енныд дінӧ да коринныд кевмысьны ас вӧснаныд. Ті шуинныд, юӧрт пӧ миянлы ставсӧ, мый висьталас Господь, миян Ен, и ми пӧ сідзи вӧчам.

²¹ Талун ме юӧрті тіянлы, мый висьталіс Господь, тіян Енныд, но ті энӧ кывзысьӧй Сылысь. Господь мӧдӧдіс менӧ висьтавны тіянлы, но ті энӧ кывзӧй.

²² Сідзкӧ, тӧдӧй, ті куланныд шыпуртысь, тшыглунысь да пӧрӧс висьӧмысь сійӧ муас, кытчӧ ті кӧсъянныд мунны да овмӧдчыны».