Еремей 39 - Коми Библия 2023

Ерусалим кар босьтӧм

¹ Иудаса Седекей ӧксылӧн ӧкмысӧд веськӧдлан воӧ дасӧд тӧлысьӧ вавилонса Навукодоносор ӧксы аслас тышкайӧзкӧд уськӧдчис Ерусалим кар вылӧ да кытшаліс сійӧс.

² Седекейлӧн дас ӧтиӧд веськӧдлан воӧ нёльӧд тӧлысьлӧн ӧкмысӧд лунӧ карса стенсӧ жугӧдісны.

³ Вавилонса ӧксылӧн киподувса юралысьяс пырисны Ерусалимӧ да карса шӧр дзиръясянь пондісны юравны. Тайӧ вӧліны: Сим-Магирысь Нергал-Шар-Эцер, ыджыд чина йӧзӧн веськӧдлысь Неву-Сар-Секим, тышкайӧзӧн веськӧдлысь Нергал-Шар-Эцер да вавилонса ӧксылӧн киподувса мукӧд юралысьяс.

⁴ Найӧс аддзигӧн иудаса Седекей ӧксы да сылӧн тышкайӧзыс пышйисны. Войнас найӧ петісны карсьыс дзиръяӧд, мый вӧлі кыкпӧвста стенмас ӧксылӧн сад дорын. Седекей ӧксы аслас йӧзкӧд мӧдӧдчис Йӧрдан ковтыслань.

⁵ Но калдеяса тышкайӧз вӧтчисны на бӧрся да суӧдісны Седекейӧс Ерикон кардорса ковтысын. Седекейӧс кутісны да вайӧдісны вавилонса Навукодоносор ӧксы дінӧ Ривлаӧ, Хамат муӧ. Сэні Навукодоносор мыждіс Седекейӧс.

⁶ Ривлаын Седекейлӧн син водзын вавилонса ӧксы виис сылысь пиянсӧ. Виис тшӧтш иудаса став тӧдчана йӧзсӧ.

⁷ Вавилонса ӧксы бытшкис Седекейлысь кыкнан синсӧ да дорис сійӧс ыргӧн чепъясӧн, медым нуӧдны Вавилонӧ.

⁸ Ӧксылысь керкасӧ да войтырыслысь керкаяссӧ калдеяса тышкайӧз сотісны биӧн, Ерусалим карлысь стенъяссӧ жугӧдісны.

⁹ Карсьыс коляс войтырсӧ да вавилонса ӧксы дор вуджысьясӧс Навузардан, ӧксыӧс видзысьяслӧн юралысь, нуӧдіс пленӧ Вавилонӧ.

¹⁰ Сӧмын войтыр пӧвстысь медся гӧльяссӧ, кодъяслӧн нинӧм эз вӧв, Навузардан, ӧксыӧс видзысьяслӧн юралысь, кольӧдіс овны Иуда муӧ да сетіс налы виноград йӧръяс да видз-муяс.

¹¹ Навузарданлы, ӧксыӧс видзысьяслӧн юралысьлы, вавилонса Навукодоносор ӧксы Еремей йылысь шуис:

¹² «Босьт сійӧс да тӧждысь сы вӧсна, эн вӧч сылы некутшӧм лёктор. Вӧч сідзи, мый шуас сійӧ».

¹³ Ӧксыӧс видзысьяслӧн юралысь Навузардан, ыджыд чина йӧзӧн веськӧдлысь Невушазбан, тышкайӧзӧн веськӧдлысь Нергал-Шар-Эцер да вавилонса став юралысьыс

¹⁴ мӧдӧдісны йӧзӧс Еремейла. Найӧ вайӧдісны Еремейӧс ӧксы керка видзысьяслӧн йӧрысь да сетісны Гедалийлы, Шафан Ахикамлӧн пилы, кодлы вӧлі тшӧктӧма нуӧдны Еремейӧс ас ордас. Тадзи Еремей кольччис овны аслас войтыр пӧвстын.

¹⁵ Кор Еремейӧс вӧлі йӧртӧма ӧксы керка видзысьяслӧн йӧрӧ, сылы вӧлі Господьсянь кыв:

¹⁶ «Мун да висьтав эфиопияса Эведмелеклы, мый Господь Саваоф, Израильлӧн Ен, тадзи висьталӧ: Ме збыльмӧда Ассьым кывъясӧс тайӧ карыслы лёк вылӧ, а ог бур вылӧ. Воас лун, кор тэ аддзан тайӧс.

¹⁷ Но сійӧ лунӧ Ме мезда тэнӧ, – висьталӧ Господь, – тэнӧ оз ло сетӧма сійӧ йӧзыслӧн киӧ, кодъясысь тэ полан.

¹⁸ Ме мезда тэнӧ. Тэ он кув шыпуртысь, но видзан ассьыд олӧмтӧ, ӧд Ме вылӧ тэ лача кутан, – висьталӧ Господь».