Еремей 38 - Коми Библия 2023

Еремейӧс шыбитӧны косьмӧм юкмӧсӧ

¹ Маттанлӧн Шефатай пиыс, Пашхурлӧн Гедалий пиыс, Шелемейлӧн Ехукал пиыс да Малкийлӧн Пашхур пиыс кывлісны, мый висьталіс Еремей став войтырыслы:

² «Господь тадзи висьталӧ: ”Коді кольччас тайӧ карас, сійӧ кулас шыпуртысь, тшыглунысь да пӧрӧс висьӧмысь. А коді сетчас калдеяса тышкайӧзлӧн киӧ, сійӧ ловйӧн коляс да видзас ассьыс олӧмсӧ”.

³ Господь тадзи висьталӧ: ”Тайӧ карсӧ лоӧ сетӧма вавилонса ӧксылӧн тышкайӧз киӧ. Вавилонса ӧксы босьтас тайӧ карсӧ”».

⁴ Юралысьяс шуисны ӧксылы: «Тайӧ мортсӧ колӧ вины. Ӧд сылӧн кывъясысь карас кольӧм тышкайӧз да став войтырыс эбӧссьыс усьӧны. Тайӧ мортыс оз бурсӧ кӧсйы тайӧ войтырыслы, а сӧмын лёксӧ».

⁵ Седекей ӧксы шуис: «Сійӧ тіян киын, ме нинӧм ог вермы вӧчны тіянлы паныд».

⁶ Найӧ босьтісны Еремейӧс да гезйӧн лэдзисны сійӧс Малкийлӧн юкмӧсӧ. Малкий вӧлі ӧксылӧн пиыс, и сылӧн юкмӧсыс сулаліс ӧксы керка видзысьяслӧн йӧрын. Ваыс сэні эз вӧв, вӧлі сӧмын нюйт. Еремей вӧйис тайӧ нюйтас.

⁷ Эфиопияса Эведмелек нима ыджыд чина морт, коді кесъяліс ӧксы керкаын, кывліс, мый Еремейӧс шыбитӧмаӧсь юкмӧсӧ. Ӧксы тайӧ кадас пукаліс Веняминлӧн дзиръя дорын.

⁸ Эведмелек петіс ӧксы керкаысь. Сійӧ локтіс ӧксы дінӧ да шуис:

⁹ «Ӧксыӧй-ыджыдӧй, тайӧ йӧзыс лёктор вӧчисны Еремей пророклы, шыбитісны сійӧс юкмӧсӧ. Сійӧ кулас сэні тшыгйысла, ӧд карас няньыс абу нин».

¹⁰ Ӧксы шуис эфиопияса Эведмелеклы: «Босьт аскӧдыд комын мортӧс да лэпты Еремей пророкӧс юкмӧсысь, медым эз кув сэні».

¹¹ Эведмелек босьтіс аскӧдыс йӧзӧс, локтіс ӧксылӧн керкаӧ да пырис паськӧм видзанінӧ. Сэтысь босьтіс киссьӧм кӧлуй да гезйӧн лэдзис юкмӧсӧ Еремейлы.

¹² Эфиопияса Эведмелек шуис Еремейлы: «Киняулӧдыд гартышт асьтӧ гезнас, а киссьӧм кӧлуйсӧ гез улас сюйышт». Еремей дзик сідзи и вӧчис.

¹³ Еремейӧс гезйӧн кыпӧдісны юкмӧсысь да колисны ӧксы керка видзысьяслӧн йӧрӧ.

Седекей ӧксы сёрнитӧ Еремейкӧд

¹⁴ Седекей ӧксы мӧдӧдіс мортӧс, коді вайӧдіс Еремей пророкӧс ӧксы дінӧ Господьлӧн крамӧ коймӧд пыранін дорӧ. Сэні ӧксы шуис Еремейлы: «Ме мыйсюрӧ юала тэнсьыд, а тэ меысь нинӧм эн дзеб».

¹⁵ Еремей вочавидзис Седекейлы: «Ме кӧ висьтала тэныд, тэ ӧд сетан менӧ вины. Ме кӧ туйдӧда тэнӧ, тэ ӧд он кывзы менӧ».

¹⁶ Седекей ӧксы гусьӧн кыв сетіс Еремейлы: «Ловъя Господь водзын, коді сетіс миянлы олӧм, ме кыв сета, мый ог лэдз тэнӧ вины, ог сет тэнӧ налы, кодъяс кӧсйӧны босьтны тэнсьыд олӧмтӧ».

¹⁷ Еремей шуис Седекейлы: «Господь Ен Саваоф, Израильлӧн Ен, тадзи висьталӧ: ”Тэ кӧ сетчан вавилонса ӧксылӧн киподувса юралысьяслы, тэ ловйӧн колян, и тайӧ карсӧ оз сотны биӧн. Тэ да тэнад гортсаыд ловйӧн колянныд.

¹⁸ А он кӧ сетчы вавилонса ӧксылӧн киподувса юралысьяслы, сэки тайӧ карсӧ лоӧ сетӧма калдеяса тышкайӧзлӧн киӧ. Найӧ сотасны тайӧ карсӧ биӧн, и тэ он мездмы налӧн киысь”».

¹⁹ Седекей ӧксы шуис Еремейлы: «Ме пола иудаса йӧзысь, кодъяс вуджисны калдеяса тышкайӧз дор. Калдеяса тышкайӧз кӧ сетасны менӧ налӧн киӧ, найӧ косявласны менӧ».

²⁰ Еремей шуис Седекейлы: «Оз сетны. Кывзы Господьӧс. Кывзы, мый ме висьтала тэныд. Сэки тэныд бур лоӧ, и тэ ловйӧн колян.

²¹ А он кӧ сетчы вавилонса ӧксылӧн киподувса юралысьяслы, сэки инас сійӧ, мый Господь петкӧдліс меным:

²² став аньяссӧ, кодъяс колины иудаса ӧксылӧн керкаӧ, нуӧдасны вавилонса ӧксылӧн киподувса юралысьяс дінӧ. Тайӧ аньясыс шуасны иудаса ӧксы йылысь: – Тэнад ёртъясыд ылӧдлісны тэнӧ, найӧ вермисны тэнӧ. Кор тэнад кокыд вӧйис нюйт пытшкӧ, найӧ бергӧдісны тэлань мышнысӧ.

²³ Став тэнсьыд гӧтыръястӧ да челядьтӧ нуӧдасны калдея войтыр дінӧ, и ачыд тэ он жӧ мездмы налӧн киысь. Тэ шедан вавилонса ӧксы киӧ, а тайӧ карсӧ сотасны биӧн».

²⁴ Седекей шуис Еремейлы: «Миян сёрни йылысь мед некод оз тӧд, сэки тэ ловйӧн колян.

²⁵ Юралысьяс кӧ кывласны, мый ме сёрниті тэкӧд, найӧ локтасны тэ дінӧ да шуасны, висьтав пӧ миянлы, мый тэ шуин ӧксылы, и мый тэныд вочавидзис ӧксы. Миянысь пӧ нинӧм эн дзеб, сэки ми огӧ виӧй тэнӧ.

²⁶ А тэ налы шу, мый тэ ёна корин ӧксыӧс, медым сійӧ эз бергӧд тэнӧ бӧр Ионафанлӧн керкаӧ, медым тэ сэні эн кув».

²⁷ Юралысьяс локтісны Еремей дінӧ да кутісны юасьны сылысь. Еремей вочавидзис налы сідзи, кыдзи тшӧктіс ӧксы. Кывшутӧг юралысьяс колисны Еремейӧс, ӧд эз тӧдмавны, мый йылысь сійӧ сёрнитіс ӧксыкӧд.

²⁸ Еремей оліс ӧксы керка видзысьяслӧн йӧрын сійӧ лунӧдзыс, кор калдеяса тышкайӧз босьтісны Ерусалим кар.