Еремей 37 - Коми Библия 2023

Еремей ӧлӧдӧ Седекей ӧксыӧс

¹ Ехоякимлӧн Еконей пи пыдди вавилонса Навукодоносор ӧксы пуктіс Иуда муын ӧксыӧ Иосейлысь Седекей писӧ.

² Седекей, сылӧн кесъялысьясыс да Иуда войтыр эз кывзыны Господьлысь кывъяссӧ, мый Сійӧ висьталіс Еремей пророк пыр.

³ Седекей ӧксы мӧдӧдіс Еремей пророк дінӧ Шелемейлысь Ехукал писӧ да Софоний попӧс, Маасейлысь писӧ, медым найӧ шуисны пророклы: «Кевмысь миян вӧсна Господьлы, миян Енлы!»

⁴ Еремей сэки оліс войтыр пӧвстын, сійӧс абу на вӧлі пуксьӧдӧма дзескыдінӧ.

⁵ Сійӧ кадас фараонлӧн тышкайӧзыс петісны Египетысь. Калдеяса тышкайӧз, кодъяс кытшалісны Ерусалим, кылісны та йылысь да ылыстчисны Ерусалим дорысь.

⁶ Еремей пророклы вӧлі Господьсянь кыв:

⁷ «Господь, Израильлӧн Ен, тадзи висьталӧ: иудаса ӧксылы, коді мӧдӧдіс юавны Менсьым, висьталӧй, мый фараонлӧн тышкайӧзыс, кодъяс вӧлі локтӧны тіянлы отсӧг вылӧ, бӧр бергӧдчасны асланыс муӧ, Египетӧ.

⁸ А калдеяса тышкайӧз бӧр локтасны татчӧ, кытшаласны тайӧ карсӧ, босьтасны сійӧс да сотасны.

⁹ Господь тадзи висьталӧ: энӧ ылӧдлӧй асьнытӧ, энӧ шуалӧй, калдеяса тышкайӧз пӧ вешъясны миян дінысь. Найӧ оз мунны.

¹⁰ Ті кӧ весиг пасьвартінныд калдеяса став тышкайӧзсӧ, кодъяс тышкасьӧны тіянлы паныд, и налӧн ловйӧн колины сӧмын доймӧмаяс, найӧ эськӧ чеччисны, петісны асланыс чомъясысь да тайӧ карсӧ сотісны биӧн».

Еремейӧс дзескыдінӧ пуксьӧдӧм

¹¹ Калдеяса тышкайӧз вешйисны Ерусалим дорысь, ӧд фараонлӧн тышкайӧзыс петісны иудаса тышкайӧзлы отсӧг вылӧ.

¹² Сэки Еремей кӧсйис мунны Ерусалимысь Венямин муӧ, медым дзебсьыны войтыр пӧвстӧ.

¹³ Еремей вӧлі петӧ Венямин дзиръяӧд, но карсӧ видзысьяслӧн Ирей нима веськӧдлысь, Хананей Шелемейлӧн пиыс, кутіс сійӧс да шуис: «Тэ кӧсъян пышйыны калдеяса тышкайӧз дінӧ!»

¹⁴ Еремей вочавидзис сылы: «Тайӧ ылӧг! Ме ог кӧсйы пышйыны на дінӧ». Но Ирей эз кывзы Еремейӧс, а босьтіс да вайӧдіс сійӧс юралысьяс дінӧ.

¹⁵ Найӧ скӧрмисны Еремей вылӧ, нӧйтісны сійӧс да пуксьӧдісны Ионафан гижалысьлӧн керкаӧ, мый вӧлі дзескыдін пыдди.

¹⁶ Еремейӧс пуксьӧдісны гӧбӧч гуӧ да колисны сэтчӧ дыр кад кежлӧ.

¹⁷ Седекей ӧксы тшӧктіс вайӧдны Еремейӧс. Сійӧс вайӧдісны ӧксы керкаӧ, и ӧксы гусьӧн юаліс сылысь: «Вӧлі-ӧ Господьсянь кыв?» «Вӧлі, – вочавидзис Еремей. – Тэнӧ лоӧ сетӧма вавилонса ӧксы киӧ».

¹⁸ Еремей нӧшта шуис Седекей ӧксылы: «Мыйӧн ме мыжми тэ водзын, тэнад кесйӧгъяс водзын да тайӧ войтырыс водзын? Мыйла ті пуксьӧдінныд менӧ дзескыдінӧ?

¹⁹ Кӧні тіян пророкъясныд, кодъяс юӧртлісны тіянлы, мый вавилонса ӧксы оз пет тышӧ тіянлы да тайӧ муыслы паныд?

²⁰ Ӧні, ӧксыӧй-ыджыдӧй, кывзы менӧ, эн ӧтдорт менсьым корӧмӧс. Бӧр эн ысты менӧ Ионафан гижалысьлӧн керкаӧ, ӧд ме кула сэні».

²¹ Седекей ӧксылӧн тшӧктӧм серти Еремейӧс йӧртісны ӧксы керка видзысьяслӧн йӧрӧ. Нянь пӧжалысьяслӧн улич вылысь ӧтчыдысь луннас вайлісны сылы ӧти кӧрыш нянь, кытчӧдз карас эз помась няньыс. Тадзи Еремей колис ӧксы керка видзысьяслӧн йӧрӧ.