Еремей 34 - Коми Библия 2023

Седекей ӧксылы Енсянь кыв

¹ Кор вавилонса Навукодоносор ӧксы аслас тышкайӧзкӧд да сылӧн киподувса муясысь тышкайӧзкӧд кытшаліс Ерусалим кар да сы гӧгӧрысь каръяссӧ, сэки Еремейлы вӧлі Господьсянь кыв:

² «Господь, Израильлӧн Ен, тадзи висьталӧ: мун да юӧрт иудаса Седекей ӧксылы, мый Господь тадзи висьталӧ: Ме сета тайӧ карсӧ вавилонса ӧксы киӧ, и сійӧ сотас карсӧ биӧн.

³ Тэ он вермы пышйыны, тэнӧ босьтасны да сетасны сылӧн киӧ. Тэныд ковмас аддзысьны да сёрнитны вавилонса ӧксыкӧд, и тэнӧ нуӧдасны Вавилонӧ.

⁴ Но тэ, иудаса Седекей ӧксы, кывзы Господьлысь кывсӧ! Господь тэныд тадзи висьталӧ: тэ он кув шыпуртысь,

⁵ тэ кулан лӧня. Батьясыдлы моз, кодъяс тэӧдз ӧксыалісны, тэныд тшӧтш сотасны чӧскыд ӧвтанторъяс тэнӧ гуалігӧн да кутасны бӧрдны тэ йылысь: ”Курыд шог, ыджыдӧй!” Тайӧс Ме кӧсйыся, – висьталӧ Господь».

⁶ Тайӧ кывъяссӧ Еремей пророк висьталіс иудаса Седекей ӧксылы Ерусалимын.

⁷ Буретш тайӧ кадас вавилонса ӧксылӧн тышкайӧзыс кытшалісны Ерусалим, Лакиш да Азека каръяс. Иудаса став каръяс пӧвстысь сӧмын тайӧ изкаръяссӧ абу вӧлі пасьвартӧма.

Кесйӧгъясӧс лэдзӧм йылысь сёрнитчӧмсӧ торкӧм

⁸ Еремейлы вӧлі Господьсянь кыв сы бӧрти, кор Седекей ӧксы сёрнитчис ерусалимса войтыркӧд кесйӧгъясӧс лэдзӧм йылысь.

⁹ Ставныслы колӧ вӧлі лэдзны вӧля вылӧ ассьыныс еврей кесйӧгъяснысӧ, тшӧтш кесйӧг аньяснысӧ. Некодлы оз позь вӧлі уджӧдны иудей воксӧ кесйӧгӧс моз.

¹⁰ Став юралысьясыс да став войтырыс, кодъяс сёрнитчисны ӧксыкӧд, мый лэдзасны кесйӧгъяснысӧ вӧля вылӧ да оз кутны уджӧдны найӧс кесйӧгӧс моз, кывзысисны да лэдзисны ассьыныс кесйӧгъяснысӧ.

¹¹ Но бӧрынджык найӧ вежисны шуӧмнысӧ, бӧр бергӧдісны ассьыныс кесйӧгъяснысӧ, кодъясӧс водзынджык лэдзисны вӧля вылӧ, да уджӧдісны найӧс кесйӧгӧс моз.

¹² Сэки Еремейлы вӧлі Господьсянь кыв:

¹³ «Господь, Израильлӧн Ен, тадзи висьталӧ: кор Ме петкӧді тіянлысь батьяснытӧ Египет муысь, кӧні вӧліны найӧ кесйӧг туйынӧсь, Ме кӧрталі накӧд йитӧд. Ме тшӧкті налы

¹⁴ сизимӧд вонас лэдзны вӧля вылӧ ассьыныс еврей вокъяснысӧ, кодъяс асьнысӧ вузалісны кесйӧг пыдди. Татшӧм мортыс мед кесъялас квайт во, а сэсся сійӧс колӧ лэдзны вӧля вылӧ. Но тіян батьясныд эз кывзыны Менӧ, эз сибӧдны Менсьым кывъясӧс.

¹⁵ А ті мӧд нога вӧчинныд, вӧчинныд Менам син водзын шогманасӧ: лэдзинныд вӧля вылӧ ассьыныд кесйӧг-вокъяснытӧ, кыдзи сёрнитчинныд Ме водзын Менам нимлы сиӧм керкаын.

¹⁶ Но сэсся ті вежинныд ассьыныд шуӧмнытӧ да янӧдінныд Менсьым нимӧс – ті бӧр бергӧдінныд ассьыныд кесйӧгъяснытӧ, кодъясӧс налӧн кӧсйӧм серти лэдзинныд вӧля вылӧ. Кесйӧгъясӧс моз ті бара уджӧданныд найӧс.

¹⁷ Та вӧсна Господь тадзи висьталӧ: сыысь, мый ті энӧ кывзӧй Менӧ, энӧ лэдзӧй вӧля вылӧ вокъяснытӧ да матыссаяснытӧ, Ме лэдза тіянӧс вӧля вылӧ, – висьталӧ Господь, – ті куланныд шыпуртысь, пӧрӧс висьӧмысь да тшыглунысь. Став мувывса войтыръяслы Ме вӧча тіянӧс повзьӧдчанторйӧн.

^18-19 Иудаса да ерусалимса юралысьяс, ыджыд чина йӧз, попъяс да тайӧ мусьыс став войтырыс торкисны сёрнитчӧмнысӧ да эз вӧчны сы серти, мый Ме водзын кӧсйысисны вӧчны, кор шӧрипӧв керыштісны ӧшпи туша да мунісны керыштӧм кык юкӧн костӧдыс. Найӧс ставнысӧ Ме сета

²⁰ вӧрӧг киӧ, сійӧ йӧзыслы, кодъяс корсьӧны босьтны налысь олӧмсӧ. Налӧн шойясӧн кутасны пӧткӧдчыны кырныш-варыш да зверъяс.

²¹ Иудаса Седекей ӧксыӧс да юралысьясӧс Ме сета вӧрӧг киӧ, сійӧ йӧзыслы, кодъяс корсьӧны босьтны налысь олӧмсӧ, да вавилонса ӧксылӧн тышкайӧзлы, кодъяс ӧні вешйисны тіян дінысь.

²² Ме бӧр вайӧда найӧс тайӧ карыс дорӧ, – висьталӧ Господь. – Менам тшӧктӧм серти найӧ уськӧдчасны тайӧ карыс вылӧ, босьтасны сійӧс да сотасны биӧн. Иудаса каръясӧс Ме вӧча овтӧминӧн, сэні оз коль олысьыс».