Еремей 28 - Коми Библия 2023

Хананей пророк паныд сувтӧ Еремейлы

¹ Иудаса Седекей ӧксылӧн нёльӧд веськӧдлан воӧ, витӧд тӧлысьӧ, Господьлӧн крамын попъяс да став войтырыс дырйи Азурлӧн Хананей пиыс, Гаваонысь пророк, шуис меным:

² «Господь Саваоф, Израильлӧн Ен, тадзи висьталӧ: Ме жугӧда вавилонса ӧксылысь сийӧссӧ!

³ Кык во мысти Ме бӧр бергӧда тайӧ карас Господьлӧн крамлысь став дозмук-кӧлуйсӧ, мый вавилонса Навукодоносор ӧксы босьтіс татысь да нуис Вавилонӧ.

⁴ Иудаса Еконей ӧксыӧс, Ехоякимлысь писӧ, да ставнысӧ, кодъясӧс Иудаысь вӧлі нуӧдӧма пленӧ Вавилонӧ, Ме бӧр вайӧда тайӧ муас, – висьталӧ Господь, – ӧд Ме жугӧда вавилонса ӧксылысь сийӧссӧ».

⁵ Но Еремей пророк вочавидзис Хананей пророклы попъяс да став войтырыс дырйи, кодъяс сулалісны Господьлӧн крамын.

⁶ Еремей пророк шуис: «Господь мед вӧчас дзик тадзи. Господь мед збыльмӧдас тэнсьыд пророкалӧмтӧ да Вавилонысь бӧр бергӧдас татчӧ Господьлӧн керкалысь дозмук-кӧлуйсӧ да пленӧ нуӧдӧмаясӧс.

⁷ Но кывзы, мый ме висьтала тэныд да став войтырыслы.

⁸ Пророкъяс, кодъяс вӧліны водзысяньыс, тэӧдз и меӧдз на, водзвыв юӧртісны уна муяслы тыш, шог да пӧрӧс висьӧм йылысь.

⁹ Пророк кӧ юӧртӧ лӧнь олӧм йылысь, и сылӧн кывъясыс инасны, сӧмын сэки тӧдмаласны, мый сійӧс збыльысь Господь мӧдӧдіс».

¹⁰ Хананей пророк босьтіс Еремей пророк сьылі вылысь сийӧссӧ да жугӧдіс.

¹¹ Став войтырыс дырйи Хананей шуис: «Господь тадзи висьталӧ: кык во мысти тадзи жӧ Ме жугӧда став войтыръяслӧн сьылі вылысь вавилонса Навукодоносор ӧксылысь сийӧссӧ». Сэсся Еремей пророк муніс аслас туйӧд.

¹² Сы бӧрти, кор Хананей пророк жугӧдіс Еремей пророк сьылі вылысь сийӧссӧ, Еремейлы вӧлі Господьсянь кыв:

¹³ «Мун да шу Хананейлы, мый Господь тадзи висьталӧ: тэ жугӧдін пу сийӧс, но та пыдди тэ вӧчан кӧрт сийӧс.

¹⁴ Ӧд Господь Саваоф, Израильлӧн Ен, тадзи висьталӧ: тайӧ войтыръяслӧн сьылі вылӧ Ме ӧшӧда кӧрт сийӧс, медым найӧ кесъяласны вавилонса Навукодоносор ӧксылы. Весиг зверъясӧс Ме сета сылӧн киӧ».

¹⁵ Еремей пророк шуис Хананей пророклы: «Кывзы, Хананей! Господь тэнӧ эз мӧдӧдлы. Тэ ышӧдан тайӧ войтырсӧ лача кутны ылӧг вылӧ.

¹⁶ Та вӧсна Господь тадзи висьталӧ: Ме чышкышта тэнӧ му вывсьыс. Тайӧ вонас тэ кулан, ӧд тэ ышӧдін тайӧ войтырсӧ Господьлы паныд кыпӧдчыны».

¹⁷ Сійӧ жӧ вонас, сизимӧд тӧлысьӧ, Хананей пророк куліс.