Еремей 27 - Коми Библия 2023

Став войтыръяс лоӧны Вавилон кипод улынӧсь

¹ Кор Иуда муын ӧксыӧ пуксис Иосейлӧн Ехояким пиыс, Еремейлы вӧлі Господьсянь кыв.

² Господь меным тадзи висьталіс: «Вӧч кӧртӧдъяс да сийӧсъяс. Пукты сийӧссӧ аслыд сьылі вылад.

³ Кӧртӧдъяссӧ да сийӧсъяссӧ мӧдӧд тшӧтш эдомса ӧксылы, моавса ӧксылы, аммон войтырлӧн ӧксылы, тирса ӧксылы да сидонса ӧксылы юӧр вайысьяс пыр, кодъяс локтісны Ерусалимӧ иудаса Седекей ӧксы дінӧ.

⁴ Юӧр вайысьяслы тшӧкты висьтавны асланыс ыджыдъяслы, мый Господь Саваоф, Израильлӧн Ен, тадзи висьталӧ: юӧртӧй ыджыдъясныдлы,

⁵ мый Аслам ыджыд вынӧн да нюжӧдӧм киӧн Ме вӧчи мусӧ, йӧзӧс да мувывса пемӧсъясӧс и сета найӧс кодлы кӧсъя.

⁶ Тайӧ муяссӧ ӧні Ме сета вавилонса Навукодоносор ӧксылы, Аслам кесйӧглы. Весиг зверъясӧс Ме сета, медым найӧ кесъялісны сылы.

⁷ Став войтыръясыс пондасны кесъявны сылы, сылӧн пиыслы да пиыслӧн пиыслы, кытчӧдз оз во кад, кор сійӧ аслас войтырыскӧд кутас кесъявны мукӧд войтыръяслы да вына ӧксыяслы.

⁸ Но сійӧ войтырсӧ, коді оз кут кесъявны вавилонса Навукодоносор ӧксылы да оз лэдз аслас сьылі вылӧ пуктыны вавилонса ӧксылысь сийӧссӧ, Ме мыжда шыпуртӧн, тшыглунӧн да пӧрӧс висьӧмӧн, – висьталӧ Господь. – Сійӧ войтырсӧ Ме дзикӧдз бырӧда вавилонса ӧксы киӧн.

⁹ Энӧ кывзӧй ассьыныд пророкъяснытӧ, туналысьяснытӧ, вӧтъяс висьталысьяснытӧ, кимӧститчысьяснытӧ да тшыкӧдчысьяснытӧ, кодъяс шуалӧны тіянлы, ті пӧ онӧ кутӧй кесъявны вавилонса ӧксылы.

¹⁰ Ӧд найӧ юӧртӧны тіянлы ылӧгсӧ, медым ылыстны тіянӧс асланыд муысь. Кывзанныд кӧ найӧс, Ме вӧтла тіянӧс, и ті куланныд.

¹¹ Сійӧ войтырыслы, коді лэдзас аслас сьылі вылӧ пуктыны вавилонса ӧксылысь сийӧссӧ да пондас кесъявны сылы, Ме лэдза кольччыны аслас муӧ, – висьталӧ Господь. – Найӧ пондасны вӧдитны видз-му да овны сэні».

¹² Став тайӧ кывъяссӧ ме юӧрті тшӧтш иудаса Седекей ӧксылы: «Лэдзӧй асланыд сьылі вылӧ пуктыны вавилонса ӧксылысь сийӧссӧ, кесъялӧй сылы да сылӧн войтырыслы, и ті ловйӧн колянныд.

¹³ Мыйла тэныд да тэнад войтырыдлы кувны шыпуртысь, тшыгъялӧмысь да пӧрӧс висьӧмысь? Ӧд Господь висьталіс, мый тадзи лоӧ быд войтыркӧд, коді оз кут кесъявны вавилонса ӧксылы.

¹⁴ Энӧ кывзӧй пророкъясӧс, кодъяс юӧртӧны тіянлы, мый онӧ кутӧй кесъявны вавилонса ӧксылы. Ӧд тайӧ пророкъясыс тіянлы ылӧгсӧ юӧртӧны.

¹⁵ Ме найӧс эг мӧдӧдлы, – висьталӧ Господь. – Найӧ Менам нимсянь юӧртӧны ылӧгсӧ. Кывзанныд кӧ найӧс, Ме вӧтла тіянӧс, и ті куланныд, куласны тшӧтш тіянлы пророкалысьяс».

¹⁶ Попъяслы да Иуда войтырлы ме юӧрті: «Господь тадзи висьталӧ: энӧ кывзӧй ассьыныд пророкъяснытӧ, кодъяс юӧртӧны тіянлы, мый Вавилонысь регыд бӧр ваясны Господьлӧн крамлысь дозмук-кӧлуйсӧ. Ӧд тайӧ пророкъясыс тіянлы ылӧгсӧ юӧртӧны.

¹⁷ Энӧ кывзӧй найӧс, а кесъялӧй вавилонса ӧксылы, и ті ловйӧн колянныд. Мыйла тайӧ карыслы лоны из чукӧрӧн?

¹⁸ Найӧ кӧ пророкъяс, налӧн кӧ эм Господьсянь кыв, сідзкӧ, найӧ мед кевмӧны Господь Саваофлы, медым дозмук-кӧлуйсӧ, мый эм на Господьлӧн крамын, иудаса ӧксылӧн керкаын да Ерусалимын, эз нуны Вавилонӧ.

^19-21 Кор вавилонса Навукодоносор ӧксы нуӧдіс Ерусалимысь Вавилонӧ пленӧ иудаса Еконей ӧксыӧс, Ехоякимлысь писӧ, тшӧтш Иудаысь да Ерусалимысь став тӧдчана йӧзсӧ, сійӧ эз босьт аскӧдыс сюръяяс, вайӧртӧд, джекъяс да став дозмук-кӧлуйсӧ. А мый колис Господьлӧн крамын, иудаса ӧксылӧн керкаын да Ерусалимын, сы йылысь Господь Саваоф, Израильлӧн Ен, тадзи висьталӧ:

²² ставсӧ тайӧс нуасны Вавилонӧ да колясны сэтчӧ сійӧ лунӧдзыс, кор Ме бара кута тӧждысьны тайӧ вӧчӧмторъясыс вӧсна, – висьталӧ Господь. – Сэки Ме ставсӧ бӧр бергӧда тайӧ карас».