Еремей 2 - Коми Библия 2023

Господь мыждӧ Израиль войтырӧс

¹ Меным вӧлі Господьсянь кыв.

² Господь тшӧктіс меным мунны Ерусалимӧ да юӧртны сэні, мый Господь тадзи висьталӧ: – Ме эг вунӧд, кыдзи том дырйиыд тэ сьӧлӧмсянь кесъялін Меным, тэ радейтін Менӧ, кор тэ вӧлін Меным гӧтырпуӧн на, тэ мунін Ме бӧрся овтӧминӧд, кӧні нинӧм он кӧдз ни он быдты.

³ Израиль – Господьлӧн вежаторйыс, Сылӧн медводдза вотӧсыс. Ставнысӧ, кодъяс ньылыштісны сійӧс, вӧлі мыждӧма, ыджыд шог суис найӧс, – висьталӧ Господь.

⁴ Кывзӧй Господьлысь кывсӧ, Яковсянь чужысьяс, Израильлӧн чужанкотыръяс!

⁵ Господь тадзи висьталӧ: – Аддзылісны ӧмӧй тіян батьясныд, мый Ме ог веськыда вӧч? Таысь ӧмӧй найӧ ылыстчисны Меысь? Найӧ вӧтчисны идолъяс бӧрся, нинӧм бӧрся моз, и асьныс лоины татшӧмӧсь.

⁶ Найӧ эз корсьны Господьӧс, коді петкӧдіс миянӧс Египетысь, нуӧдіс миянӧс овтӧминӧд, куш да гурана муӧд, кос да сап пемыд муӧд, муӧд, кыті некод эз ветлы, кӧні морт эз овлы.

⁷ Ме вайӧді тіянӧс муӧ, кӧні быдмӧны сад йӧръяс, медым ті пӧткӧдчинныд вотӧснас да бурторъяснас. Но ті локтінныд да пежалінныд Менсьым муӧс, вӧчинныд сійӧс зывӧкторйӧн.

⁸ Попъяс эз корсьны Господьӧс, Индӧдӧ велӧдысьяс эз тӧдны Менӧ, Менсьым войтырӧс видзысьяс кыпӧдчисны Меным паныд, пророкъяс пророкалісны Ваал нимсянь. Найӧ ставныс юрбитісны идолъяслы, кодъяс отсавны оз вермыны.

⁹ Та вӧсна Ме мыжала тіянӧс, – висьталӧ Господь, – мыжала тіянлысь челядьнытӧ да налысь челядьнысӧ.

¹⁰ Мунӧй киттимса діяс вылӧ, мӧдӧдӧй Кедарӧ йӧзӧс, сюся видзӧдӧй-тӧдмалӧй, вӧчӧны-ӧ сэтчӧс войтыръяс Менам войтыр моз.

¹¹ Мукӧд войтыръяслӧн енъясыс – абу збыль Ен, но найӧ оз вежлавны енъяснысӧ. А Менам войтырӧй вежис Менӧ, найӧ вежисны ассьыныс дзирдлунсӧ идолъяс вылӧ, кодъяс отсавны оз вермыны.

¹² Весьӧпӧрӧй таысь, енэжъяс, ёна дзӧрӧй-тіралӧй, – висьталӧ Господь. –

¹³ Менам войтырӧй вӧчис кык лёктор: эновтіс Менӧ, ловъя ва петанінсӧ, да кодйис аслыс буждысь юкмӧсъяс, кодъяс оз вермыны ва кутны.

¹⁴ Израиль войтыр ӧд абу кесйӧг, чужӧмсяньыс сійӧ абу киподувса. Мыйла сійӧ лои кыйдӧсӧн?

¹⁵ Том левъяс эргӧны сы вылӧ, кылӧ налӧн равзӧм шыыс. Израиль мусӧ найӧ вӧчисны овтӧминӧн, сылысь каръяссӧ пазӧдісны, сэні эз коль олысьыс.

¹⁶ Мемфис да Тафнис каръясын олысьяс кушӧдз шырисны тэнсьыд юртӧ.

¹⁷ Но таысь тэ ачыд мыжа, ӧд тэ эновтін Господьӧс, ассьыд Ентӧ, кор Сійӧ нуӧдіс тэнӧ.

¹⁸ Мый бурыс тэныд сыысь, мый тэ мунан Египетӧ, медым юны Нил юысь васӧ? Мый бурыс тэныд сыысь, мый тэ мунан Ассурӧ, медым юны Ефрат юысь васӧ?

¹⁹ Тэнад лёк вӧчӧмыд мыждас тэнӧ асьтӧ, Менӧ эновтӧмысь тэнӧ лоӧ чирыштӧма. Сідзкӧ, тӧд да гӧгӧрво, кутшӧм курыд шог тэнӧ суас сыысь, мый тэ эновтін Господьӧс, ассьыд Ентӧ, мый тэ пытшкын Меысь полӧмыс абу, – висьталӧ Ыджыдыс, Господь Саваоф.

²⁰ Ме важӧн нин жугӧді тэнсьыд сийӧстӧ, орйӧдлі тэнсьыд кӧртӧдъястӧ. Тэ шулін, мый он кут юрбитны идолъяслы, но став джуджыд керӧс вылын, быд пашкыр пу улын тэ куйлін кырсалысь ань моз.

²¹ Ме пукті да быдті тэнӧ, тэ вӧлін бур вотӧс вайысь виноград пу кодь, артмин медся бур кӧйдысысь, но лоин мӧд виноград пулӧн вожйӧн.

²² Дерт, тэ верман мыссьыны кунваӧн, ёна ниртны асьтӧ майтӧгӧн, но тэнад мыжъясыд кольӧны Ме водзын, – висьталӧ Господь Ыджыдыс.

²³ Тэ ӧмӧй верман шуны: «Ме сӧстӧм, ме эг юрбит Ваал идолъяслы». Видзӧдлы аслад уджъяс вылӧ, мӧвпыштлы, мый тэ вӧчин ковтысын! Тэ вӧлін том энь верблюд кодь, коді рӧдйӧн котралӧ ӧтарӧ-мӧдарӧ.

²⁴ Тэ вӧлін овтӧминын быдмӧм вӧлявывса энь осёл кодь, лёкколӧмыд дырйи вомтырнад апалін сынӧдсӧ. Коді вермас кутны тэнӧ? Тэнӧ корсьысьяслы абу колана мудзтӧдзныс котравны, нӧйччигад тэнӧ кокньыда позьӧ аддзыны.

²⁵ Видзчысь, медым котралігад эн коль кӧмтӧг, медым горшыд дзикӧдз эз косьмы. Но тэ шуин: «Ог кӧсйы кывзыны тайӧс! Меным мусаӧсь мукӧд енъяс, и налы ме юрбита».

²⁶ Кыдзи гусясьысьӧс кутӧны да янӧдӧны, тадзи юръяндзим лои Израиль войтырлы, сылӧн ӧксыяслы да веськӧдлысьяслы, попъяслы да пророкъяслы.

²⁷ Пулы войтырыс шуӧ, тэ пӧ менам батьӧй, излы шуӧ, тэ пӧ чужтін менӧ. Найӧ бергӧдісны Меланьӧ мышнысӧ, а эз чужӧмнысӧ. Но кор шогыс суӧ найӧс, найӧ шуалӧны: «Лок да отсав миянлы!»

²⁸ Но кӧні тіян киӧн вӧчӧм енъясныд? Вермӧны кӧ, найӧ мед отсаласны тіянлы шог дырйиныд. Ӧд тэнад, Иуда войтыр, сы мында жӧ енмыс, мыйта тэнад карыд.

²⁹ Мыйла ті мыжаланныд Менӧ? Ті [шогмытӧма олінныд,] ставныд кыпӧдчинныд Меным паныд, – висьталӧ Господь. –

³⁰ Весьшӧрӧ Ме нӧйтлі тіянлысь челядьнытӧ, найӧ эз сибӧдны Менсьым туйдӧдӧмӧс. Чашйысь лев моз тіян шыпуртныд бырӧдліс пророкъяснытӧ [но тайӧ тіянӧс эз повзьӧд].

³¹ Ӧнія олысьяс, гӧгӧрвоӧй Господьлысь кывсӧ: Вӧлі-ӧ Ме Израиль войтырлы овтӧминӧн? Вӧлі-ӧ Ме сылы пемыд муӧн? Мыйла Менам войтырӧй шуӧ, ми пӧ мунам, кытчӧ кӧсъям, огӧ пӧ бергӧдчӧй Тэ дінӧ?

³² Том ныв ӧмӧй вунӧдас пасьтавны мичмӧдчанторъяссӧ, гӧтырпу – кӧлысь паськӧмлысь вӧньсӧ? Но Менам войтырӧй важӧн нин вунӧдіс Менӧ.

³³ Кутшӧм наяна тэ сибӧдчан муслун корсигад, весиг лёк оласнога аньясӧс аслад туйӧ велӧдан!

³⁴ Тэ эн су коньӧр йӧзӧс гусясиганыс, но паськӧмыд ляксьӧма тайӧ мыжтӧм йӧзлӧн вирнас. И та вылӧ видзӧдтӧг

³⁵ тэ шуалан: «Ме мыжтӧм, оз су менӧ Енлӧн скӧрлуныс». Но Ме мыжала тэнӧ сыысь, мый шуан, ме пӧ мыжсӧ эг вӧчлы.

³⁶ Мыйла тэ дугдывтӧг шӧйтан, ӧтарӧ-мӧдарӧ вежлалан ассьыд туйтӧ? Ассур моз Египет янӧдас тэнӧ.

³⁷ Тэ яналӧмӧн кутчысян юрад да петан Египетысь. Ӧд Господь ӧтдортіс найӧс, код вылӧ тэ лача кутан. Найӧ оз отсавны тэныд.