Еремей 19 - Коми Библия 2023

Жугӧдӧм гырнич висьталӧ Ерусалим кар йылысь

¹ Господь тадзи висьталіс: «Мун да гырнич вӧчысьлысь ньӧб сёй гырнич. Аскӧдыд босьт войтырлӧн юрнуӧдысьяс пӧвстысь некымынӧс да попъяс пӧвстысь некымын юрнуӧдысьӧс.

² Мун Гырничтор дзиръяӧд Бен-Хинном ковтысӧ да юӧрт сэні сійӧ кывъяссӧ, мый Ме висьтала тэныд.

³ Иудаса ӧксыяслы да Ерусалимын олысьяслы тшӧкты кывзыны Господьлысь кывсӧ. Юӧрт налы, мый Господь Саваоф, Израильлӧн Ен, тадзи висьталӧ: тайӧ муас Ме мӧдӧда сэтшӧм шог, мый та йылысь кылысьлӧн пеляс кутас тіньгыны.

⁴ Ерусалимын олысьяс эновтісны Менӧ, пежалісны тайӧ ковтыссӧ, сотӧны тані висьяс мукӧд енъяслы, кодъясӧс эз тӧдлыны ни найӧ, ни налӧн батьясныс, ни иудаса ӧксыяс. Найӧ тыртісны тайӧ ковтыссӧ мыжтӧм йӧзлӧн вирӧн.

⁵ Найӧ лэптісны Ваал идоллы вись ваян мылькъяс, медым сотан вись пыдди вайны Вааллы ассьыныс ныв-пинысӧ. Но татшӧмторсӧ Ме эг тшӧктывлы вӧчнысӧ, тайӧ Меным абу сьӧлӧм серти.

⁶ Та вӧсна воасны лунъяс, – висьталӧ Господь, – кор тайӧ висьваянінсӧ оз нин кутны шуны Тофетӧн да тайӧ ковтыссӧ – Бен-Хинномӧн, но кутасны шуны виалан ковтысӧн.

⁷ Тані Ме бырӧда Иуда войтырлысь да Ерусалимын олысьяслысь кӧсйӧмсӧ. Ме сета найӧс вӧрӧглӧн шыпурт улӧ, и найӧ куласны налысь олӧмсӧ босьтны кӧсйысьяслӧн ки помысь. Налысь шойяссӧ Ме шыбита кырныш-варышлы да зверъяслы.

⁸ Тайӧ карсӧ Ме вӧча овтӧминӧн да повзьӧдчанторйӧн. Сійӧс бырӧдӧмысь сы дорті мунысьясӧс полӧм босьтас.

⁹ Ме вӧча сідзи, мый тайӧ карас олысьяс пондасны сёйны асланыс ныв-пилысь яйсӧ. Ыджыд шог дырйи, кор вӧрӧг кытшалас да дзескӧдас найӧс, и кӧсъяс босьтны налысь олӧмсӧ, найӧ пондасны сёйны ӧта-мӧдныслысь яйсӧ.

¹⁰ Тэкӧд локтысь юрнуӧдысьяслӧн син водзын жугӧд гырничсӧ

¹¹ да шу налы, мый Господь Саваоф тадзи висьталӧ: Ме жугӧда тайӧ войтырсӧ да тайӧ карсӧ, кыдзи вӧлі жугӧдӧма гырнич вӧчысьлысь сёй гырничсӧ, мый дзоньтавны он нин вермы. Тофетӧ пондасны дзебны виӧмаясӧс, ӧд мӧдлаын местаыс оз ло.

¹² Тадзи Ме вӧча Ерусалим каркӧд да сэні олысьяскӧд, – висьталӧ Господь. – Тайӧ карыс лоӧ Тофет висьваянін кодь.

¹³ Ерусалим карлӧн керкаясыс да иудаса ӧксыяслӧн керкаясыс лоӧны Тофет кодь пежӧсь. Тадзи лоӧ став керкаясыскӧд, кӧні вевт вылас тшынӧдчисны енэжвыв кодзувъяслы да вайисны вина вись мукӧд енъяслы».

¹⁴ Еремей бӧр локтіс Тофетысь, кытчӧ Господь мӧдӧдліс сійӧс пророкавны. Сэсся сійӧ сувтіс Господьлӧн крам йӧрӧ да шуис став войтырыслы:

¹⁵ «Господь Саваоф, Израильлӧн Ен, тадзи висьталӧ: тайӧ карыс вылӧ да став иудаса каръяс вылӧ Ме Аслам шуӧм серти мӧдӧда шог, ӧд тайӧ каръясас олысьясыс асныралӧны, оз кывзыны Менсьым кывъясӧс».