Еремей 12 - Коми Библия 2023

¹ – Господьӧй, кор ме вая ассьым могӧс Тэ водзӧ, Тэ веськыда вӧчан. Но ме юала Тэнсьыд веськыда мыждӧм йылысь. Мыйла лёк вӧчысьяслӧн ставыс артмӧ, мыйла Енсӧ эновтысьяс бура олӧны?

² Тэ пуктін найӧс, и найӧ вужъясисны, найӧ быдмӧны да вайӧны вотӧс. Найӧ сёрнитӧны Тэ йылысь, но сьӧлӧмнаныс ылынӧсь Тэысь.

³ Господьӧй, Тэ тӧдан да аддзан менӧ, Тэ видзӧдан менам сьӧлӧмӧ да тӧдан, радейта-ӧ ме Тэнӧ. Торйӧд лёк вӧчысьясӧс начкысян лун кежлӧ, ыжъясӧс моз нуӧд найӧс начкӧм вылӧ.

⁴ Дыр-ӧ муыс кутас бӧрдны, дыр-ӧ туруныс кутас косьмыны видз вылын? Пемӧс-лэбач кулӧ, ӧд мувывса олысьяс лёксӧ вӧчӧны, шуалӧны, Енмыс пӧ оз аддзы, мый лоӧ миянкӧд.

⁵ – Еремей, тэ кӧ мудзан подӧн мунысьяскӧд восьлалігӧн, кыдзи тэныд панласьны вӧвъяскӧд? Тэ кӧ крукасьлан-усьласян шыльыд му вывті восьлалігӧн, мый лоӧ тэкӧд Йӧрдан ю ойдігӧн?

⁶ Весиг тэнад вокъясыд да рӧдвужыд ылӧдлӧдны тэнӧ, бӧрвывсяньыд гораа горзӧны тэ вылӧ. Но найӧ кӧ весиг бурногӧн кутасны сёрнитны тэкӧд, тэ эн эскы налы.

Господь шогсьӧ Аслас войтыр вӧсна

⁷ – Ме эновті Ассьым керкаӧс, эновті Ассьым бӧрйӧм войтырӧс, Ассьым муса войтырӧс Ме сеті вӧрӧг киӧ.

⁸ Менам бӧрйӧм войтырӧй лев моз равзӧ Ме вылӧ, сійӧ кыпӧдӧ Ме вылӧ ассьыс гӧлӧссӧ, та вӧсна Ме мустӧмта сійӧс.

⁹ Менам бӧрйӧм войтырӧй лои уна рӧма лэбач кодь, код вылӧ быд боксянь усьласьӧ кырныш-варыш. Локтӧй, чукӧртчӧй, зверъяс, локтӧй сёйны!

¹⁰ Йӧз муысь локтӧм ӧксыяс тшыкӧдісны Менсьым виноград йӧрӧс, талялісны Менсьым видз-муӧс, кушинӧн вӧчисны Менсьым бур муӧс,

¹¹ вӧчисны сійӧс овтӧминӧн. Куш муыс бӧрдӧ Ме водзын, сійӧс дзикӧдз куштӧма, некод оз тӧждысь сы вӧсна.

¹² Овтӧминса керӧсъяс вывті локтісны бырӧдысьяс. Господьлӧн шыпуртыс бырӧдӧ мусӧ помсяньыс помӧдзыс, некод оз мездмы сыысь.

¹³ Менам войтырӧй кӧдзис шобді, а вундіс йӧн. Найӧ ёна мырсисны, но ставыс весьшӧрӧ. Мед тіянлы яндзим лоӧ нянь чукӧртіганыд, ӧд Господьлӧн яр скӧрлуныс вӧсна суис тіянӧс тайӧ.

¹⁴ Господь тадзи висьталӧ: «Израиль войтыркӧд орччӧн олысь лёк войтыръясӧс Ме нетшышта асланыс муысь, ӧд найӧ уськӧдчисны Израиль му вылӧ, мый Ме вичмӧді Аслам войтырлы. Иуда войтырӧс тшӧтш нетшышта на пӧвстысь.

¹⁵ Но нетшыштӧм бӧрын Ме бара бурсьӧлӧмтча тайӧ войтыръясыс дінӧ да быд войтырӧс бергӧда аслас муӧ.

¹⁶ Найӧ кӧ велӧдчасны овны, кыдзи Ме тшӧкті овны Аслам войтырлы, велӧдчасны кӧ кыв сетны ловъя Господь водзын, кыдзи найӧ велӧдісны Менсьым войтырӧс кыв сетны Ваал идол водзын, сэки найӧ вужъясясны Менам войтыр пӧвстӧ.

¹⁷ А сійӧ войтырсӧ, коді оз кывзысь Менсьым, Ме нетшышта да дзикӧдз бырӧда», – висьталӧ Господь.