Ёрдысьяс 21 - Коми Библия 2023

Венямин чужанкотырлы гӧтыръяс

¹ Миспаӧ чукӧртчылігӧн израильсаяс вӧлі кыв сетӧмаӧсь, мый Венямин чужанкотырӧ некод ассьыс нывсӧ верӧс сайӧ оз сет.

² Израиль войтыр локтіс Вефильӧ. Сэні найӧ рытӧдзыс пукалісны Ен водзын да ырзӧмӧн гораа бӧрдісны.

³ Найӧ шуалісны: «Господьӧй, Израильлӧн Енмӧй! Мыйла татшӧмторйыс лои Израильын? Ӧні Израильын оз тырмы ӧти чужанкотыр».

⁴ Мӧд асывнас войтырыс чеччис водз, сувтӧдіс висьпуктанін да вайис сэні сотан да бурасян висьяс.

⁵ Найӧ юалісны: «Вӧліны-ӧ Израиль чужанкотыръяс пӧвстын сэтшӧм йӧз, кодъяс эз локны, кор ми чукӧртчылім Господь водзӧ?» Ӧд вӧлі кыв сетӧма, мый лоӧ виӧма быдӧнӧс, коді оз лок Господь водзӧ Миспаӧ.

⁶ Израиль пиянлӧн сьӧлӧмныс нормис Венямин чужанкотыр вӧсна, асланыс вокъяс вӧсна. Найӧ шуисны: «Талун Израиль воштіс ӧти чужанкотыр.

⁷ Кытысь миянлы корсьны гӧтыръяссӧ Венямин чужанкотырысь ловйӧн кольӧмаяслы? Ми ӧд Господь водзын кыв сетім, мый на сайӧ ог сетӧй нывъяснымӧс».

⁸ Нӧшта юалісны: «Вӧліны-ӧ Израиль чужанкотыръяс пӧвстын сэтшӧм йӧз, кодъяс эз локны Миспаӧ Господь водзӧ?» Вӧлӧмкӧ, Галаад муысь Явис карысь некод абу вӧлӧма чукӧртчанінын.

⁹ Та йылысь вӧлі тӧдмалӧма, кор лыддисны войтырсӧ.

¹⁰ Израиль войтыр мӧдӧдіс Галаад муӧ Явис карӧ дас кык сюрс вына тышкамортӧс да тшӧктіс: «Мунӧй да виалӧй шыпуртӧн Явис карса олысьясӧс, тшӧтш аньясӧс да челядьӧс.

¹¹ Дзикӧдз бырӧдӧй став айуловсӧ да сійӧ аньяссӧ, кодъяс узисны айловкӧд [а нывъясӧс ловйӧн кольӧй]». [Сідзи и вӧчисны.]

¹² Галаад муын Явис карын олысьяс пӧвстысь сюри нёльсё ныв, кодъяс эз на узьлыны айловкӧд. Нывъясӧс вайӧдісны Ханаан муӧ Силомӧ, израильса тышкайӧзлӧн сувтанінӧ.

¹³ Та бӧрын израильсаяс мӧдӧдісны йӧзӧс Риммон изкыртаын олысь Венямин чужанкотыр дінӧ, медым юӧртны налы, мый водзӧ оз петны налы паныд тышӧ.

¹⁴ Веняминсянь чужысьяс бӧр локтісны [израильсаяс дінӧ], и израильсаяс сетісны налы нывъясӧс, кодъясӧс ловйӧн колисны Галаад муын Явис карын олысьяс пӧвстысь. Но нывъясыс ставныслы эз тырмыны.

¹⁵ Израиль войтырлӧн сьӧлӧмыс нормис Венямин чужанкотыр вӧсна, ӧд Господь лэдзис, мый израильса чужанкотыръяс пӧвстын вӧлі зыксьӧм.

¹⁶ Войтырлӧн юрнуӧдысьяс шуисны: «Венямин чужанкотырысь аньясӧс бырӧдӧма. Кытысь миянлы нӧшта корсьны гӧтыръясӧс ловйӧн кольӧм айуловлы?»

¹⁷ Сэсся содтісны: «Венямин чужанкотырлы вичмӧдӧм муыс мед кольӧ Венямин чужанкотыр пӧвстысь ловйӧн кольӧмаяслы. Израиль войтыр пӧвстысь мед оз быр ни ӧти чужанкотыр!

¹⁸ Но ассьыным нывъясӧс ми огӧ вермӧй сетны на сайӧ. Ӧд Израиль пиян кыв сетісны, мый лоӧ ёрӧма быдӧнӧс, коді Венямин чужанкотырӧ сетас ассьыс нывсӧ верӧс сайӧ».

¹⁹ Юрнуӧдысьяслы тӧд выланыс уси, мый Силом карын быд во пасйӧны Господьлы сиӧм гаж. Карыс сулаліс Левона карсянь лунвылын, Вефиль карсянь войвылын, Вефильсянь Сикемӧ мунан туй асыввылын.

²⁰ Найӧ шуисны Веняминсянь чужысьяслы: «Мунӧй да дзебсьӧй виноград йӧръясӧ.

²¹ Кор силомса нывъяс локтасны йӧктыны, сэки петӧй виноград йӧръясысь. Быдӧн мед босьтас аслыс гӧтырӧс да бӧр мунас Венямин муӧ.

²² Кор нывъяслӧн батьясныс либӧ вокъясныс локтасны норасьны, ми налы шуам: ”Лоӧй бур сьӧлӧмаӧсь, ӧд налы ставныслы эз тырмыны тышын шедӧдӧм нывъясыс. Ті абу мыжаӧсь. А асьныд кӧ сетінныд нывъяснытӧ, вӧлінныд эськӧ мыжаӧсь”».

²³ Веняминсянь чужысьяс тадзи и вӧчисны. Быдӧн босьтіс гӧтырӧ йӧктанінысь гусялӧм нылӧс. Сэсся найӧ бӧр мунісны асланыс муӧ, выльысь лэптісны каръяссӧ да овмӧдчисны сэтчӧ.

²⁴ Израильсаяс разӧдчисны гортаныс, быдӧн муніс аслас муӧ чужанкотырыс да рӧдыс дінӧ.

²⁵ Сійӧ кадас Израильын эз вӧв ӧксыыс. Быдӧн вӧчис сійӧ, мый чайтіс веськыдӧн.