Ёрдысьяс 11 - Коми Библия 2023

Еффай ёрдысь

¹ Галаадса Еффай вӧлі повтӧм тышкаморт. Сійӧ вӧлі кырсалысь аньлӧн пиыс, а батьыс вӧлі Галаад.

² Галаадлӧн гӧтырыс тшӧтш чужтіс сылы пиянӧс. Кор найӧ быдмисны, вӧтлісны Еффайӧс. Найӧ шуисны сылы: «Батьнымлӧн овмӧс-эмбурыс тэныд оз вичмы, ӧд тэ – мӧд аньлӧн пи».

³ Еффай пышйис вокъяссьыс да овмӧдчис Тов муӧ. Сы дінӧ чукӧртчисны мывкыдтӧм йӧз да ветлӧдлісны сыкӧд.

⁴ Недыр мысти аммонсаяс петісны тышӧ Израиль войтырлы паныд.

⁵ Сэки галаадса юрнуӧдысьяс мунісны, медым корны Еффайӧс бӧр локны Тов муысь.

⁶ Найӧ шуисны: «Лок бӧр да нуӧд миянӧс аммон войтырлы паныд тышӧ».

⁷ Еффай вочавидзис: «Ті мустӧмтінныд менӧ да вӧтлінныд бать керкаысь. А ӧні, кор тіянлы сьӧкыд лои, ме дінӧ локтінныд».

⁸ Галаадса юрнуӧдысьяс шуисны: «Ми локтім корны тэнӧ, медым тэ миянкӧд ӧтвыв петін аммон войтырлы паныд тышӧ. Ми кӧсъям, медым тэ лоан став галаадса олысьяслӧн юралысьнас».

⁹ Еффай шуис налы: «Шуам, ме бӧр локта да тышкася аммонсаяскӧд. Господь кӧ сетас найӧс менам киӧ, сэки ме лоа юралысьӧн».

¹⁰ Галаадса юрнуӧдысьяс вочавидзисны: «Господь кывліс миянлысь сёрнитчӧмнымӧс. Ми тэ ног вӧчам».

¹¹ Еффай муніс галаадса юрнуӧдысьяскӧд. Войтырыс пуктіс сійӧс юралысьӧ да тышкайӧзӧн веськӧдлысьӧ. Господь водзын Миспаын Еффай мӧдысь висьталіс ассьыс кывъяссӧ.

¹² Еффай мӧдӧдіс юӧртысьясӧс аммон войтырлӧн ӧксы дінӧ. Найӧ юалісны сылысь: «Мый тэныд месянь колӧ? Мыйла тэ локтін менам муӧ тышкасьнысӧ?»

¹³ Аммон войтырлӧн ӧксы шуис Еффайлӧн юӧртысьяслы: «Египетысь петӧм бӧрын Израиль войтыр босьтіс менсьым муӧс Арнон юсянь Явок юӧдз да Йӧрдан юӧдз. Бурӧн бӧр сет сійӧс меным [и ме вешъя]».

¹⁴ [Еффайлӧн йӧзыс бӧр локтісны сы дінӧ.] Еффай бара мӧдӧдіс юӧртысьясӧс аммонса ӧксы дінӧ,

¹⁵ медым висьтавны сылы: «Со мый висьталӧ Еффай. Израиль войтыр эз мырддьыв моав да аммон войтыръяслысь муяссӧ.

¹⁶ Египетысь петӧм бӧрын Израиль войтыр муніс овтӧминӧд Гӧрд саридзлань да воис Кадешӧ.

¹⁷ Сэтысянь израильсаяс мӧдӧдісны юӧртысьясӧс эдомса ӧксы дінӧ, медым корны мунны сылӧн муӧд. Но эдомса ӧксы эз лэдз. Моавса ӧксылысь тшӧтш вӧлі корӧма, медым сійӧ лэдзас мунны. Но сійӧ эз лэдз. Та вӧсна Израиль войтыр кольччис Кадешӧ.

¹⁸ Сэсся войтырыс муніс овтӧминӧд, Эдом да Моав муясӧ эз пырав, но матыстчис Моав му дінӧ асывладорсяньыс. Сэні израильсаяс сувтісны чомъяснаныс Арнон ю бокӧ. Арнон ю вомӧн найӧ эз вуджны да Моав муӧ эз пырны.

¹⁹ Израильсаяс мӧдӧдісны юӧртысьясӧс аморейяслӧн Сигон ӧксы дінӧ, коді юраліс Хешбонын, да корисны мунны сылӧн муӧд асланыс муас.

²⁰ Но Сигон эз лэдз мунны Израиль войтырлы аслас муӧд. Мӧдарӧ, сійӧ чукӧртіс ассьыс йӧзсӧ, сувтӧдіс найӧс Яхац кар дорӧ да петіс израильсаяслы паныд тышӧ.

²¹ Господь, Израильлӧн Ен, сетіс Сигонӧс да сылысь тышкайӧзсӧ израильсаяслӧн киӧ. Тадзи израильсаяс пасьвартісны сэні олысь аморейясӧс да босьтісны аслыныс став налысь мусӧ.

²² Найӧ босьтісны аслыныс аморейяслысь став мусӧ Арнон юсянь Явок юӧдз да овтӧминсянь Йӧрдан юӧдз.

²³ Господь, Израильлӧн Ен, вӧтліс аморейясӧс Аслас Израиль войтыр водзысь. А ӧні тэ, аммонса ӧксы, кӧсъян босьтны тайӧ мусӧ аслыд?

²⁴ Тэнад эм му, мый тэныд сетіс Кемош енмыд. Миян эм му, мый миянлы сетіс Господь, миян Енным.

²⁵ Тэ ӧмӧй бурджык моавса Валак ӧксыысь, Сеппорлӧн пиысь? Сійӧ эз вензьы да эз пет тышӧ израильсаяслы паныд.

²⁶ Куимсё во нин Израиль войтыр олӧ Хешбон да Ароэр каръясын да нагӧгӧрса сиктъясын, тшӧтш Арнон ю бокын сулалысь каръясын. Мыйла нӧ ті водзынджыксӧ энӧ босьтӧй найӧс аслыныд?

²⁷ Тэ водзын ме абу мыжа. Лёксӧ вӧчин тэ, кор петін тышӧ меным паныд. Господь – Ёрдысьыс. Сійӧ мед Ачыс талун лоас Израиль пиян да аммонсаяс костын ёрдысьнас!»

²⁸ Но аммонса ӧксы эз кывзы Еффайлысь кывъяссӧ.

²⁹ Господьлӧн Лов лэччис Еффай вылӧ. Еффай вуджис Галаад да Манассей муяс. Сэсся бӧр бергӧдчис Галаад муӧ Мицфе карӧ да сэтысянь петіс аммонсаяслы паныд тышӧ.

³⁰ Еффай кыв сетіс Господьлы: «Тэ кӧ сетан менам киӧ аммонсаясӧс,

³¹ сэки найӧс вермӧм бӧрын гортӧ локтігам ме сета Тэныд сійӧс, коді менам керкаысь медводдзаӧн петас меным воча. Сійӧс ме вая Тэныд сотан вись пыдди».

³² Еффай тышкасис аммонсаяскӧд, и Господь сетіс найӧс сылӧн киӧ.

³³ Еффай пасьвартіс аммонсаясӧс. Ароэр карсянь Миннит да Авел-Керамим каръясӧдз сійӧ бырӧдіс кызь кар. Тадзи Израиль пиян вермисны аммонсаясӧс.

³⁴ Еффай бӧр локтіс гортас Миспаӧ. Тимпанӧн ворсӧмӧн да йӧктӧмӧн Еффайӧс вочааліс сылӧн ӧтка нылыс. Мӧд ныв-пиыс сылӧн эз вӧв.

³⁵ Нывсӧ аддзӧм бӧрын Еффай косяліс паськӧмсӧ да горӧдіс: «Нылӧй, тэ уськӧдін менӧ кок йывсьым! Тэ шог вайин меным! Ме кыв сеті Господьлы, и бӧрсӧ босьтны ме ог вермы».

³⁶ Сійӧ вочавидзис: «Батьӧй, тэ кӧ кыв сетін Господьлы, вӧч мекӧд, мый кӧсйысин. Ӧд Господь сетіс тэныд водзӧс перйыны тэнад вӧрӧглысь, аммонсаяслысь.

³⁷ Сӧмын кора, лэдзлы менӧ кык тӧлысь кежлӧ. Ме муна нывъёртъяскӧд керӧс вылӧ бӧрдны, мый некор верӧс сайӧ ог пет».

³⁸ Батьыс вочавидзис: «Мун». Батьыс лэдзис сійӧс кык тӧлысь кежлӧ. Сійӧ муніс нывъёртъясыскӧд керӧс вылӧ да бӧрдіс, мый нылӧн кувны ковмас.

³⁹ Кык тӧлысь кольӧм бӧрын ныв локтіс батьыс ордӧ. Батьыс збыльмӧдіс Господьлы кыв сетӧмсӧ, и нылыс куліс, верӧс сайӧ эз мунлы. Тайӧ кадсяньыс Израиль войтыр пӧвстын

⁴⁰ быд во нёль лун кежлӧ израильса нывъяс мунӧны сьывны галаадса Еффайлӧн ныв йылысь сьыланкывъяс.