Еклесиаст 3 - Коми Библия 2023

Быдторлы эм аслас кад

¹ Быдторлы эм аслас кад, енэж улас ставыс вӧчсьӧ аслас кадӧ.

² Эм кад чужны и кувны, пуктысьны и идравны,

³ эм кад виавны и бурдӧдавны, жуглыны и тэчны,

⁴ эм кад бӧрдны и серавны, шогсьыны и йӧктыны,

⁵ эм кад шыблавны изъяс и чукӧртны изъяс, сывъясьны и янсӧдчыны,

⁶ эм кад корсьны и воштыны, видзны и шыбитны,

⁷ эм кад косявлыны и вурлыны, чӧв овны и сёрнитны,

⁸ эм кад радейтны и мустӧмтны, эм кад тышлы и лӧньлунлы.

⁹ Мый бурыс мортлы сылӧн уджалӧмысь?

¹⁰ Ме аддзылі мырсьӧм-уджалӧм, мый Енмыс сетӧма вӧчны мортыслы.

¹¹ Ставсӧ Енмыс вӧчӧма ас кадӧ мичаӧн, и морт сьӧлӧмӧ Сійӧ пуктӧма помтӧм олӧм, но помӧдзыс Енмыслысь уджъяссӧ морт оз вермы вежӧртны.

¹² Ме гӧгӧрвои, мый мортыслы бурджык нимкодясьны да вӧчны бурсӧ олӧм чӧжыс.

¹³ Мырсян-пессян олӧмас кӧ мортыс сёйӧ-юӧ да нимкодясьӧ, тайӧ сылы – Енсянь козин.

¹⁴ Ме гӧгӧрвои, мый Енлӧн став вӧчӧмторйыс олӧ нэмъяс чӧж, та дорӧ нинӧм он содты и таысь нинӧм он чинты. Енмыс тадзи лӧсьӧдӧма, медым йӧзыс олісны Сыысь полӧмӧн да вежавидзӧмӧн.

¹⁵ Мый ӧні эм, сійӧ водзын вӧлӧма, мый водзӧ лоӧ, сійӧ вӧлӧма нин, Енмыс выльысь бергӧдӧ воддзасӧ.

Ставыс муысь и бӧр воӧ муӧ

¹⁶ Нӧшта ме аддзылі шонді улас, мый ёрдын ыджыдалӧ лёкыс, мыжданінын ыджыдалӧ пӧръясьӧм.

¹⁷ Ме мӧвпышті: веськыда олысьӧс и лёк вӧчысьӧс кутас мыждыны Ен, ӧд быд вӧчӧмторлы да лоӧмторлы эм аслас кад.

¹⁸ Морт йылысь ме мӧвпышті: Енмыс тӧдмалӧ мортӧс, медым сійӧ гӧгӧрвоис, мый сійӧ оз торъяв пемӧсысь.

¹⁹ Ӧд мортӧс и пемӧсӧс виччысьӧ ӧти и сійӧ жӧ: ӧтиыс кулӧ, и мӧдыс кулӧ. Ӧтиыс и мӧдыс ловъя дырйиыс лолалӧны, та вӧсна мортыс абу бурджык пемӧсысь – сідзкӧ, ставыс весьшӧрӧ.

²⁰ Ставыс мунӧ ӧтилаӧ: ставсӧ вӧчӧма муысь, и ставыс бӧр бергӧдчӧ муӧ.

²¹ Коді вермас тӧдны, кыпӧдчӧ-ӧ мортлӧн лолыс вывлань, и лэччӧ-ӧ пемӧслӧн лолыс увлань, му пытшкас?

²² Ме гӧгӧрвои, мый мортлы бурджык нимкодясьны аслас уджъясӧн, ӧд тадзи лӧсьӧдӧма олӧмсӧ. Коді нӧ бӧр вайӧдас сійӧс, медым видзӧдлыны, мый лоӧ сылӧн олӧм помасьӧм бӧрын?