Еклесиаст 2 - Коми Библия 2023

¹ Ме кӧсйи тӧдмавны сьӧлӧмӧс гажӧдчӧмын, тшӧкті сылы нимкодясьны бурнас. Но и тайӧ, вӧлӧмакӧ, весьшӧрӧ.

² Сералӧм йылысь ме шуи: «Йӧйталӧм», гажӧдчӧм йылысь шуи: «Эм-ӧ сыысь бурыс?»

³ Ме шуи гажӧдны ассьым вир-яйӧс винаӧн. Ме сетчи тайӧ йӧйталӧмас, но видзи мывкыдлунӧс аслам сьӧлӧмын. Ме кӧсйи тӧдны, мый вайӧ бурсӧ мортлы, да мый сылы колӧ вӧчны енэж улас ассьыс дженьыд нэмсӧ олігӧн.

⁴ Ме вӧчи ыджыд уджъяс: лэпті аслым керкаяс, пукті виноград пуяс,

⁵ лӧсьӧді сад йӧръяс, расъяс да пукті сэтчӧ быдсяма вотӧса пусӧ,

⁶ кодйи вайӧртӧдъяс, медым киськавны быдмысь пуяссӧ.

⁷ Ме ньӧби кесйӧг айуловӧс да кесйӧг аньясӧс, и менам керка помын чужисны кесйӧгъяс. Ыж-мӧскыс менам вӧлі ёна унджык налӧн дорысь, кодъяс меӧдз юравлісны Ерусалимын.

⁸ Ме чукӧрті аслым эзысь-зарни, ӧксыяслысь да мукӧд войтыръяслысь озырлунсӧ. Чукӧрті ас дінӧ сьылысь аньясӧс да айуловӧс и босьті аслым гӧтырӧ уна аньӧс, медым найӧ гажӧдісны менӧ.

⁹ Ме лои ёна ыджыд да озыр на дорысь, кодъяс меӧдз юравлісны Ерусалимын. Но ме эг вошты мывкыдлунӧс.

¹⁰ Ме лэдзи видзӧдны синлы, мый сійӧ кӧсйис, эг кут сьӧлӧмӧс долыдасьӧмысь. Сьӧлӧмӧй нимкодясис став аслам уджысь, и тайӧ вӧлі меным удждонӧн.

¹¹ Ме видзӧдлі став уджыс вылӧ, мый вӧчис менам киӧй. Вӧлӧмакӧ, ставыс весьшӧрӧ, тӧв бӧрся вӧтлысьӧм кодь, и шонді улас таысь нинӧм бурыс абу.

¹² Ме куті мӧвпавны мывкыдлун, вежӧртӧмлун да йӧйлун йылысь. Ме бӧрын ӧксыӧ пуксьысь оз вермы вӧчны ыджыдджыксӧ, мый вӧчӧма нин.

¹³ Ме аддзи, мый мывкыдлуныс бурджык вежӧртӧмлунысь, кыдзи югыдыс бурджык пемыдысь.

¹⁴ Мывкыд морт аддзӧ, кытчӧ мунӧ, а вежӧртӧм шӧйтӧ пемыдас. Но ме тӧдмалі, мый кыкнансӧ виччысьӧ ӧтитор.

¹⁵ Ме гӧгӧрвои, мый менӧ виччысьӧ сійӧ жӧ, мый вежӧртӧмӧс. Сідзкӧ, мыйла меным ыджыд мывкыдлуныс? Вӧлӧмакӧ, и тайӧ весьшӧрӧ.

¹⁶ Мывкыдаӧс оз кутны казьтывлыны вежӧртӧмӧс дорысь дырджык. Коляс кад, и ставсӧ вунӧдасны. Мывкыдаӧс и вежӧртӧмӧс ӧтмоза кулӧмыс суӧ.

¹⁷ Ме мустӧмті олӧмӧс, ӧд меным зывӧк лои ставыс, мый вӧчсьӧ шонді улас. Ставыс весьшӧрӧ, тӧв бӧрся вӧтлысьӧм кодь.

¹⁸ Ме мустӧмті став ассьым уджӧс, мый вӧчи шонді улас. Ӧд меным ставсӧ ковмас кольны сылы, коді кутас веськӧдлыны ме бӧрти.

¹⁹ Код тӧдас, мывкыд морт али вежӧртӧм сійӧ лоӧ. Но сійӧ пондас вӧдитчыны ставнас, мый ме мывкыдлунӧн да сьӧкыда уджалӧмӧн нажӧвиті шонді улас. И тайӧ, вӧлӧмакӧ, весьшӧрӧ.

²⁰ Менам сьӧлӧмӧй нюкыртчис став уджӧй вӧсна, мый ме вӧчи шонді улас.

²¹ Овлӧ, мый морт мырсьӧ-уджалӧ, пуктӧ та вылӧ став ассьыс мывкыдлунсӧ, тӧдӧмлунсӧ да кужанлунсӧ, а сэсся сылы лоӧ кольны ставсӧ мӧдлы, коді эз мырсьы-уджав. И тайӧ, вӧлӧмакӧ, весьшӧрӧ да ыджыд лёктор.

²² Мый сетӧ мортыслы сьӧлӧмсянь тӧждысьӧмыс да став сылӧн мырсьӧм-уджалӧмыс, мый сійӧ вӧчӧ шонді улас?

²³ Став сылӧн олӧмыс – шогсьӧм, сылӧн уджыс – мырсьӧм-пессьӧм, весиг войнас сьӧлӧмыс майшасьӧ. И тайӧ, вӧлӧмакӧ, весьшӧрӧ.

Ставыс Енсянь

²⁴ Мырсян-пессян олӧмас мортлы сёйӧм-юӧм да нимкодясьӧм дорысь бурджыкыс абу. Ме гӧгӧрвои, мый и тайӧ – Енсянь.

²⁵ Вермас-ӧ мортыс сёйны-юны да Ентӧгыс нимкодясьны?

²⁶ Коді шогмана Енмыслы, сылы Енмыс сетӧ мывкыдлун, тӧдӧмлун да долыдлун. А мыж вӧчысьлы Енмыс сетӧ чӧжны-чукӧртны да кольны мортлы, коді шогмана Енмыслы. Но и тайӧ, вӧлӧмакӧ, весьшӧрӧ, тӧв бӧрся вӧтлысьӧм кодь.