Даниил 11 - Коми Библия 2023

¹ Мидияса Дарийлӧн медводдза веськӧдлан воӧ ме отсалі Микаиллы да дорйи сійӧс.

² Ӧні ме висьтала тэныд збыльсӧ. Персия муын пондасны сьӧрсьӧн-бӧрсьӧн юравны нӧшта куим ӧксы, а сэсся лоӧ нёльӧд, и сійӧ лоӧ медся озыр. Озырлуныс вӧчас сійӧс вынаӧн, и став йӧзсӧ сійӧ кыпӧдас Грециялы паныд.

³ Сійӧ кадас кыпӧдчас вына ӧксы, коді пондас юравны ыджыд вынӧн да кутас вӧчны, мый кӧсъяс.

⁴ Но сылӧн юралӧмыс ӧдйӧ киссяс да разалас нёльнан му пельӧсӧ. Сылӧн юралӧмыс оз вудж сысянь чужысьяслы, и оз нин ло сэтшӧм вына, кутшӧм вӧлі сылӧн юралігӧн. Сылысь юралӧмсӧ лоӧ вужнас нетшыштӧма да сетӧма мукӧдыслы.

⁵ Лунвывса ӧксы лоӧ зэв вына, но сылӧн тышкайӧзӧн веськӧдлысьяс пӧвстысь ӧти лоӧ сыысь на вынаджык, и тайӧ веськӧдлысьлӧн кипод улын муыс лоӧ лунвывса ӧксылӧн дорысь унджык на.

⁶ Коляс мыйтакӧ во, и найӧ кӧрталасны йитӧд. Медым вынсьӧдны тайӧ йитӧдсӧ, лунвывса ӧксылӧн нылыс петас верӧс сайӧ войвывса ӧксы сайӧ. Но тайӧ аньыс оз вермы видзны тайӧ йитӧдсӧ, и сылӧн верӧсыс, войвывса ӧксы, воштас юралӧмсӧ. Бӧрынджык тайӧ аньсӧ, сылысь отсасьысьяссӧ да сылысь батьсӧ лоӧ бырӧдӧма.

⁷ Но тайӧ аньыслӧн чужанвужйысь петӧм морт лоӧ лунвывса ӧксыӧн, и сійӧ петас тышӧ войвывса ӧксылӧн тышкайӧзлы паныд. Сійӧ пырас налӧн изкарӧ, уськӧдчас на вылӧ да вермас найӧс.

⁸ Налысь енъяссӧ, бӧлбанъяссӧ да эзысь-зарниысь вӧчӧм дона дозмук-кӧлуйсӧ сійӧ босьтас аскӧдыс да нуас Египетӧ. Та бӧрын некымын во чӧж сійӧ оз петавлы тышӧ войвывса ӧксылы паныд.

⁹ Войвывса ӧксы уськӧдчас лунвывса ӧксылӧн му вылӧ, но бӧр бергӧдчас аслас муӧ.

¹⁰ Сэсся войвывса ӧксылӧн пияныс чукӧртасны уна лыда тышкайӧзӧс, и на пиысь ӧти тайӧ тышкайӧзыскӧд петас тышӧ. Ойдӧм ва моз найӧ ыльӧбтасны-уськӧдчасны лунвывса ӧксылӧн изкар вылӧ.

¹¹ Лунвывса ӧксы ёна скӧрмас да тышӧ петас войвывса ӧксылы паныд. Войвывса ӧксы чукӧртас уна лыда тышкайӧзӧс, но лунвывса ӧксы аслас тышкайӧзкӧд пасьвартас найӧс.

¹² Вӧрӧгсӧ пасьвартӧм бӧрын лунвывса ӧксы пондас ышнясьны. Сы вылӧ видзӧдтӧг, мый лунвывса ӧксы бырӧдас дас сюрсъясӧс, сылӧн оз ло тырвыйӧ вермӧм.

¹³ Войвывса ӧксы выльысь чукӧртас воддза дорсьыс на унджык тышкайӧзӧс. Кымынкӧ во мысти бура дасьтысьӧмӧн сійӧ бара уськӧдчас аслас уна лыда тышкайӧзкӧд лунвывса ӧксы вылӧ.

¹⁴ Сійӧ кадас унаӧн кыпӧдчасны лунвывса ӧксылы паныд. Тэнад Израиль войтырыд пӧвстысь тшӧтш кыпӧдчасны сылы паныд лёк вӧчысьяс, медым иніс Енсянь восьтӧмыс. Но найӧс лоӧ вермӧма.

¹⁵ Сэсся локтас войвывса ӧксы, кар гӧгӧрыс вӧчас тымӧд да босьтас изкарсӧ. Лунвывса ӧксылӧн тышкайӧзыс, весиг медвынаясыс, оз вермыны водзсасьны сыкӧд.

¹⁶ Войвывса ӧксы кутас вӧчны, мый кӧсъяс, и некод оз вермы сылы паныд сувтны. Аслас тышкайӧзкӧд сійӧ локтас мича муӧ да бырӧдас сійӧс.

¹⁷ Сійӧ мӧвпыштас уськӧдчыны аслас став тышкайӧзкӧд лунвывса му вылӧ. Медым бырӧдны лунвывса ӧксылысь юралӧмсӧ, войвывса ӧксы кӧрталас йитӧд лунвывса ӧксыкӧд да сетас сылы гӧтыр пыдди нывсӧ. Но войвывса ӧксылӧн мӧвпыштӧмаыс оз артмы, оз вай сылы бурсӧ.

¹⁸ Войвывса ӧксы мӧдӧдчас саридздорса муясӧ и уна му босьтас аслас кипод улӧ. Но мукӧд тышкайӧзлӧн юралысь пуктас пом войвывса ӧксылӧн вывтіасьӧмлы и сылысь вывтіасьӧмсӧ бергӧдас сылы паныд.

¹⁹ Сэсся войвывса ӧксы бӧр бергӧдчас аслас муӧ да уськӧдчас изкаръяс вылӧ, но сійӧс пасьвартасны, и сійӧ кулас.

²⁰ Сы пыдди ӧксыӧ пуксяс мӧд морт, коді мӧдӧдас нартитысьӧс мича муӧ, медым чукӧртны вот. Дженьыд кад мысти тайӧ ӧксысӧ лоӧ бырӧдӧма, но оз тышын, оз сылы паныд кыпӧдчӧм дырйи.

²¹ Бырӧдӧм ӧксы пыдди пуксяс юравны мустӧм морт, кодӧс ӧксы туйӧ оз пуктыны. Сійӧ локтас виччысьтӧг да наянлунӧн пуксяс ӧксыӧ.

²² Ойдӧм ва моз локтысь тышкайӧзӧс лоӧ кылӧдӧма сы водзысь. Тадзи лоӧ пасьвартӧма найӧс. Лоӧ пасьвартӧма тшӧтш Енлӧн йитӧд вӧсна кывкутысьӧс.

²³ Войвывса ӧксы кӧрталас йитӧд мукӧд войтыръяскӧд, сэсся ылӧдлас найӧс. Сійӧ петас тышӧ этша лыда йӧзкӧд, но шедӧдас вермӧм да зумыдмӧдас ассьыс юралӧмсӧ.

²⁴ Сійӧ уськӧдчас вотӧса муясын лӧня олысь войтыръяс вылӧ да пондас вӧчны сійӧ, мый эз вӧчлыны сылӧн батьясыс да пӧльясыс. Войтыръяслысь мырддялӧм эмбурсӧ да озырлунсӧ сійӧ юклас аслас йӧзлы. Сійӧ мӧвпыштас уськӧдчыны изкаръяс вылӧ. Но тадзи лоӧ сӧмын дженьыд кад чӧж.

²⁵ Войвывса ӧксы чукӧртас уна лыда тышкайӧзӧс да став выннас повтӧг петас тышӧ лунвывса ӧксылы паныд. Лунвывса ӧксы чукӧртас нӧшта на унджык да вынаджык тышкайӧзӧс, но сылы паныд гуся сёрнитчӧм вӧсна оз вермы войвывса ӧксыӧс.

²⁶ Ӧд лунвывса ӧксыкӧд ӧти пызан сайын пукалысьяс кыпӧдчасны сылы паныд, медым бырӧдны сійӧс. Сылӧн тышкайӧзыс разаласны, и унаӧс лоӧ виӧма.

²⁷ Ӧти пызан сайын пукалӧмӧн кык ӧксы кутасны ылӧдлыны ӧта-мӧднысӧ, ӧд налӧн сьӧлӧмныс тырӧма лёк мӧвпъясӧн. Налӧн нинӧм оз артмы, ӧд нэм помыс лоӧ сӧмын индӧм кадӧ.

²⁸ Войвывса ӧксы бӧр мӧдӧдчас аслас муӧ ыджыд озырлунӧн. Сійӧ збыльмӧдас вежа йитӧдлы паныд мӧвпыштӧмасӧ, а сэсся бӧр бергӧдчас аслас муӧ.

²⁹ Урчитӧм кадӧ войвывса ӧксы бара мӧдӧдчас лунвыв муӧ, но сылӧн нинӧм оз артмы.

³⁰ Сы вылӧ уськӧдчасны киттимса корабльяс вылын локтысьяс, сійӧ повзяс наысь да бӧр бергӧдчас. Ассьыс скӧрлунсӧ сійӧ кисьтас вежа йитӧд вылӧ. Гортас бергӧдчӧм бӧрын сійӧ сёрнитчас вежа йитӧд эновтысьяскӧд.

³¹ Сійӧ мӧдӧдас ассьыс тышкайӧзсӧ, и найӧ пежаласны ыджыд да вежа крамсӧ. Найӧ дугӧдасны сэні быдлунся вись вайӧм да сувтӧдасны сэтчӧ пеж зывӧксӧ.

³² Йитӧд торкысьясӧс сійӧ ылӧдлӧмӧн кыскас ас дінас. А найӧ, кодъяс тӧдӧны ассьыныс Енсӧ, лоӧны зумыдӧсь да кутчысясны Енлӧн Индӧдас.

³³ Израиль войтырлӧн мывкыд веськӧдлысьяс унаӧс туйдӧдасны-велӧдасны, но дженьыд кадӧн на пиысь кодсюрӧӧс виасны шыпуртӧн, сотасны, нуӧдасны пленӧ, налысь мырддясны эмбурнысӧ.

³⁴ Сьӧкыдсӧ нуигӧн найӧ оз кольны отсӧгтӧг, но уна йӧз наянпырысь ӧтувтчасны накӧд.

³⁵ Мывкыд веськӧдлысьясысь кодсюрӧ куласны, медым на пиысь ловйӧн кольӧмаясӧс тӧдмавны да весавны-сӧстӧммӧдны бӧръя кад кежлӧ, ӧд урчитӧм кадыс эз на во.

³⁶ Войвывса ӧксы пондас вӧчны, мый кӧсъяс. Сійӧ пондас ышнясьны да пуктас асьсӧ став енъяссьыс вылӧджык на, пондас лёкӧдны-омӧльтны медыджыд Енмӧс. Сылӧн ставыс кутас артмыны, кытчӧдз оз кус Енлӧн скӧрлуныс. Ӧд мый вӧлі водзвыв шуӧма, ставыс збыльмас.

³⁷ Сійӧ оз кут пыдди пуктыны аслас батьяслысь енъяссӧ, аньяслысь муса енсӧ и некутшӧм енмӧс, но асьсӧ пуктас ставсьыныс медвылӧ.

³⁸ Сійӧ пондас ыдждӧдлыны изкаръяслысь енсӧ, кодӧс эз тӧдлыны сылӧн батьясыс. Тайӧ енмыслы сійӧ ваяс зарни, эзысь, дона изъяс да мукӧд дона козинъяс.

³⁹ На отсӧгӧн, кодъяс юрбитӧны тайӧ енмыслы, сійӧ ёнмӧдас ассьыс изкаръяссӧ. Сійӧ кутас нимӧдны тайӧ енмыслы юрбитысьясӧс, пуктас найӧс веськӧдлысьясӧ да сетас налы козин пыдди муяс.

⁴⁰ Бӧръя кадас лунвывса ӧксы петас тышӧ войвывса ӧксылы паныд. Ыджыд тӧвныр моз войвывса ӧксы уськӧдчас сы вылӧ аслас тарантасъясӧн, вӧвъясӧн да корабльясӧн. Ойдӧм ва моз сійӧ ыльӧбтас-уськӧдчас уна му вылӧ.

⁴¹ Сэсся сійӧ петас тышӧ мича мулы паныд, и унаӧн куласны. Сылӧн киысь мездмасны сӧмын Эдомын да Моавын олысьяс, тшӧтш унаӧн аммон войтыр пӧвстысь.

⁴² Сійӧ нюжӧдас ассьыс кисӧ уна му вылӧ. Сылӧн киысь оз мездмы весиг Египет.

⁴³ Сійӧ босьтас Египетысь зарни, эзысь да став мукӧд озырлунсӧ. Ливияса да эфиопияса войтыр сетчасны сылӧн кипод улӧ.

⁴⁴ Но войвывсянь да асыввывсянь воӧм юӧръяс повзьӧдасны сійӧс, и сійӧ петас ыджыд скӧрлунӧн, медым вины да дзикӧдз бырӧдны унаӧс.

⁴⁵ Сійӧ сувтӧдас ассьыс дӧрачомъяссӧ саридз да мича вежа керӧс костӧ. Но сылы воас пом, и некод сылы оз отсав.