Бӧрданкыв 3 - Коми Библия 2023

Сьӧкыдалӧм да лача кутӧм

¹ Менӧ Господь вачкаліс скӧрлуна бедьнас, ме ёна сьӧкыдала.

² Сійӧ вӧтліс менӧ, нуӧдіс пемыдас, эз югыдас.

³ Сійӧ лэптіс ме вылӧ кисӧ, нӧйтӧ менӧ лунысь-лун.

⁴ Сійӧ чашйис менсьым кучикӧс, косявліс вир-яйӧс, жугліс лыясӧс.

⁵ Сійӧ кытшаліс менӧ шогӧн, потшис сьӧкыдалӧмӧн.

⁶ Важӧн кулӧмаӧс моз Сійӧ йӧршитіс менӧ пемыдінӧ.

⁷ Сійӧ лэптіс ме гӧгӧр стен, медым ме эг пет, дорис менӧ кыз сьӧкыд чептӧн.

⁸ Ме бӧрдӧмӧн горзі, но Сійӧ эз кыв менсьым кевмӧмӧс.

⁹ Изъясӧн потшӧсаліс менсьым туйӧс, чукыльтіс менсьым ордымӧс.

¹⁰ Ош моз Господь кыйӧдӧ менӧ, лев моз Сійӧ кыйӧдчӧ дзебсянінсянь.

¹¹ Сійӧ кежӧдіс менӧ туй вылысь, косявліс да эновтіс менӧ.

¹² Сійӧ зэвтіс Ассьыс ньӧввужсӧ, веськӧдіс мелань ньӧвсӧ.

¹³ Пуртӧссьыс перйӧм ньӧвнас Сійӧ лыйис меным вӧркйӧ.

¹⁴ Аслам войтырлы ме лои серамтуйын, найӧ быд лун лӧсьӧдлӧны ме йылысь сьылан.

¹⁵ Господь вердіс менӧ курыд сёянӧн, юкталіс менӧ курыд юанӧн.

¹⁶ Сійӧ изйӧн гирскис менсьым пиньӧс, тыртіс менӧ пӧимӧн.

¹⁷ Ме вошті лӧньлунӧс, вунӧді шудлунӧс.

¹⁸ Ме шуи: «Помасис менам вынӧй, бырис Господь вылӧ лачаӧй».

¹⁹ Эн вунӧд менсьым шогсьӧмӧс да оланінтӧг кольӧмӧс, олӧмыс меным курыд, пагӧдан турун кодь.

²⁰ Та йылысь вунӧдны ог вермы, ловнам ме дзикӧдз усьӧма.

²¹ Но лача кутӧмӧн ме аслым шуала:

²² – Господьлӧн буралӧмыс вӧсна ми эгӧ бырӧй, Сылӧн буралӧмлы абу помыс.

²³ Господьлӧн буралӧмыс быд асыв выльмӧ, Сійӧ – эскана Ен.

²⁴ Менам эм Господь, – висьталӧ сьӧлӧмӧй, – та вӧсна ме Сы вылӧ лача кута.

²⁵ Господь бур Сы вылӧ лача кутысьяс дінӧ, Сійӧс корсьысьяс дінӧ.

²⁶ Бур, кор чӧла виччысян мездмӧмсӧ Господьсянь.

²⁷ Мортыслы бур, сьӧкыдсӧ кӧ нуӧ аслас том кадӧ.

²⁸ Господь сьӧкыдсӧ пуктӧ морт вылӧ, та вӧсна мортыс мед ӧтнасӧн чӧла пукалӧ,

²⁹ мед чужӧмсӧ муӧдз копыртӧ – гашкӧ, сюрас на лача.

³⁰ Мед чужӧмбансӧ бергӧдӧ кучкысьлань да нуӧ лёкӧдӧмсӧ.

³¹ Господь оз эновт пыр кежлӧ.

³² Мӧдӧдӧ кӧ шогсӧ, Сійӧ и бурсьӧлӧмтчӧ, ӧд Сылӧн бурлуныс ыджыд.

³³ Господьлӧн сьӧлӧмыс оз нимкодясь, кор Сійӧ чирыштӧ да шогӧ уськӧдӧ мортӧс.

³⁴ Кор став му пасьтала нартитӧмаясӧс талялӧны кок улын,

³⁵ оз веськыда мыждыны мортӧс Медвылыссаыс водзын,

³⁶ дзескӧдӧны мортӧс ёрд водзын, Господь ӧмӧй оз аддзы тайӧс?

³⁷ Кодлӧн шуӧмыс инӧ? Оз-ӧ Господьлӧн, коді тшӧктӧ иннысӧ?

³⁸ Оз-ӧ Медвылыссалӧн шуӧм серти ло лёкыс да бурыс?

³⁹ Мыйла нӧ, сідзкӧ, элясьӧ ловъя мортыс? Сійӧ ӧд сьӧкыдалӧ аслас мыж вӧсна.

⁴⁰ Тӧдмаламӧй ассьыным туйнымӧс, медым бергӧдчыны Господь дінӧ.

⁴¹ Восьтамӧй сьӧлӧмнымӧс, лэптамӧй кинымӧс енэжын олысь Енлань.

⁴² Ми мыж вӧчим, Тэныд паныд кыпӧдчим, и Тэ миянӧс эн прӧстит.

⁴³ Тэ скӧралӧмӧн вӧтлін миянӧс, жалиттӧг виалін.

⁴⁴ Тэ вевттьысин кымӧрӧн, медым миян кевмысьӧмным эз во Тэӧдз.

⁴⁵ Тэ вӧчин миянӧс ёгӧн да няйтӧн мукӧд войтыръяс пӧвстын.

⁴⁶ Миянӧс мустӧмтысьяс пиньнысӧ йирӧны.

⁴⁷ Повзьӧдлӧм да гуӧ шыбитӧм, куштӧм да бырӧдӧм виччысьӧ миянӧс.

⁴⁸ Менсьым войтырӧс бырӧдӧмысь синваӧй шорӧн лэччӧ.

⁴⁹ Синваӧй пыр киссьӧ, оз дугды петнысӧ,

⁵⁰ кытчӧдз Господь оз видзӧдлы да оз аддзы енэжсяньыс.

⁵¹ Менсьым сьӧлӧмӧс шымыртӧ шог аслам карса нывъяс вӧсна.

⁵² Менӧ мустӧмтысьяс помкатӧг кӧсйӧны кыйны менӧ лэбачӧс моз.

⁵³ Найӧ ловйӧн шыбитісны менӧ гуӧ, изъялісны менӧ.

⁵⁴ Ваыс юрӧс вевттис, ме шуи: «Меным пом воис».

⁵⁵ Господьӧй, джуджыд гу пытшсянь ме чукӧсті Тэнӧ.

⁵⁶ Кыв менсьым гӧлӧс шыӧс, эн тупкы пельтӧ менам ойзӧмысь да кевмӧмысь.

⁵⁷ Кор ме шыаси Тэ дінӧ, Тэ матыстчин ме дінӧ да шуин: «Эн пов».

⁵⁸ Тэ дорйин менӧ, Господьӧй, мездін менсьым олӧмӧс.

⁵⁹ Господьӧй, Тэ аддзан меным вӧчӧм лёксӧ, ло веськыда мыждысьӧн.

⁶⁰ Тэ аддзан, кыдзи мустӧмтысьяс кӧсйӧны водзӧс перйыны, мӧвпалӧны вӧчны меным лёксӧ.

⁶¹ Господьӧй, Тэ кылан налысь омӧльтӧмсӧ, тӧдан, мый найӧ мӧвпалӧны вӧчны меным лёксӧ.

⁶² Быд лун найӧ лёкӧдӧны менӧ, шӧпкӧдчӧны ме йылысь.

⁶³ Видзӧдлы, пукаліганыс и сулаліганыс найӧ сералӧмӧн лӧсьӧдлӧны ме йылысь сьылан.

⁶⁴ Господьӧй, мынты налы уджъясныс серти.

⁶⁵ Пемдӧд налысь вежӧрсӧ, ысты на вылӧ Ассьыд ёрӧмтӧ.

⁶⁶ Вӧтӧд найӧс Аслад скӧрлунӧн, бырӧд найӧс енэж увсьыс, Господьӧй!