Бӧрданкыв 2 - Коми Библия 2023

Ерусалимӧс мыждӧм

¹ Кымӧрӧн моз скӧрлуннас Господь вевттис Сион нылӧс! Енэжсянь му вылӧ Сійӧ шыбитіс Израильлысь ошйысянторсӧ, Аслас скӧралан лунӧ эновтіс Ассьыс кокувсӧ.

² Господь жалиттӧг бырӧдіс Яковлысь оланінъяссӧ, скӧралігас пасьвартіс Иудалысь изкаръяссӧ, янӧдӧмӧн шыбитіс муас ӧксыӧс да юралысьясӧс.

³ Скӧрйывсьыс Сійӧ жугӧдіс Израильлысь вынсӧ, вештіс сы вылысь Ассьыс веськыд кисӧ, эз видз сійӧс вӧрӧгысь. Сійӧ сотіс Яковӧс ыпъялысь биӧн, мый ньылыштӧ ставсӧ.

⁴ Паныд сувтысь моз Сійӧ зэвтіс Ассьыс ньӧввужсӧ, мустӧмтысь моз веськӧдіс мелань кисӧ. Сійӧ виис-бырӧдіс ставсӧ, мый долыдмӧдӧ синтӧ. Биӧс моз Сійӧ кисьтіс Ассьыс скӧрлунсӧ Сион нывлӧн оланін вылӧ.

⁵ Господь лои вӧрӧг кодь, Сійӧ виис Израильӧс, бырӧдіс сылысь керкаяссӧ, жугліс изкаръяссӧ, содтіс шогсӧ да бӧрдӧмсӧ Иуда нывлы.

⁶ Сад йӧрысь чомйӧс моз Сійӧ кисьтіс Ассьыс оланінсӧ, бырӧдіс войтырыслысь вежа чукӧртчанінсӧ. Господь лэдзис вунӧдны Сионын гажӧдчан лунъяс да шойччан лунъяс, ёна скӧралігас янӧдіс ӧксыӧс да попъясӧс.

⁷ Ассьыс висьпуктанінсӧ Господь эновтіс, Ассьыс вежаинсӧ колис. Вӧрӧг киӧ сетіс Сион карлысь стенъяссӧ. Гажӧдчан лунӧ моз вӧрӧг кыпӧдіс гора шы Господьлӧн керкаын.

⁸ Господь шуис жугӧдны Сионлысь стенъяссӧ. Сійӧ нюжӧдіс мурталан кӧв, Ассьыс кисӧ бырӧдӧмысь эз вешты. Ортсы пыкӧдъяссӧ жугліс, найӧ стенмыскӧд тшӧтш киссисны.

⁹ Карса дзиръяяс муас вӧйисны, иган-тасъяссӧ Сійӧ пасьйис. Ӧксы да юралысьяс олӧны мукӧд войтыр пӧвстын, Енлысь Индӧдсӧ оз велӧдны, Господьсянь петкӧдчылӧмыс пророкъяслы абу.

¹⁰ Сионса пӧрысь йӧз чӧла пукалӧны му вылын, юрнысӧ коялӧмаӧсь пӧимӧн, гартыштчӧмаӧсь шогалан паськӧмӧ. Ерусалимса нывъяс юрнысӧ копыртӧмаӧсь мулань.

¹¹ Синмӧй пемдіс бӧрдӧмсьыс, пытшкӧсӧй шызьӧма, сьӧлӧмӧй потӧ шогысла, ӧд менсьым войтырӧс бырӧдӧма, челядь да пузчужӧм кагаяс тшыгйысла кулӧны карса изэрдъяс вылын.

¹² Мамныслы шуӧны: «Сёйны кӧсъям! Юны кӧсъям!» Карса изэрдъяс вылын тышын доймалӧмаяс моз найӧ кулӧны, мам ки выланыс ловнысӧ лэдзӧны.

¹³ Мый меным шуны тэныд, Ерусалим нылӧй, мыйӧн ӧткодявны тэнӧ? Кодкӧд ӧткодявны тэнӧ, Сион нылӧй, медым бурӧдны тэнӧ? Тэнад дойыд саридз кодь ыджыд – коді вермас бурдӧдны тэнӧ?

¹⁴ Пророкъясыд висьтавлісны тэныд ковтӧм да ылӧг восьтӧмсӧ, а тэнсьыд мыжтӧ эз эрдӧдны, эз видзны тэнӧ пленӧ нуӧдӧмысь. Ковтӧм да пӧрйӧдлан аддзылӧмъяс найӧ юӧртісны тэныд.

¹⁵ Туй вывті ветлысь-мунысьяс кинас шлопнитӧмӧн шутьлялӧны, юрнас довкйӧдлӧны да Ерусалим йылысь омӧльтӧмӧн шуалӧны: «Тайӧ ӧмӧй сійӧ карыс, кодӧс шуисны медся мичаӧн, став муюгыдыслӧн гажӧн?»

¹⁶ Тэнӧ мустӧмтысьяс жеръялӧны тэ вылын, шутьлялӧны, пиньнысӧ йирӧмӧн шуалӧны: «Ми ньылыштім сійӧс! Ми ёна виччысим тайӧ лунсӧ, а ӧні аддзам сійӧс!»

¹⁷ Господь вӧчис, мый кӧсйис, збыльмӧдіс Ассьыс кывсӧ, важысянь шуӧмсӧ. Сійӧ жалиттӧг бырӧдіс тэнӧ, вӧрӧглы лэдзис нимкодясьны, тэнӧ мустӧмтысьясӧс вылӧ кыпӧдіс.

¹⁸ Сьӧлӧмсяньыс шыасьӧ Господь дінӧ Сион нывлӧн стен! Лун и вой шорӧн кисьт синватӧ, ланьтлытӧг мед синмыд бӧрдӧ.

¹⁹ Чеччы войнас да горзы, горзы войбыд, дугдывтӧг! Господьлӧн чужӧмбан водзын ваӧс моз кисьт сьӧлӧм дойтӧ. Нюжӧд китӧ Сылань, кевмысь ныв-пиыдлӧн олӧм вӧсна. Найӧ куйлӧны туйвежъясын, тшыгнысла кулӧны.

²⁰ Видзӧдлы, Господьӧй, видзӧдлы, кодлы Тэ тадзисӧ вӧчин! Мамъяс сёйӧны челядьнысӧ, морӧснас нёньӧдӧм каганысӧ. Господьлӧн вежаинын куйлӧны виӧм попъяс да пророкъяс.

²¹ Челядьлӧн и пӧрысьлӧн шойныс туплясьӧ туйяс вылын, менсьым ныв-зонмӧс шыпурт бырӧдіс. Тэ виалін найӧс Аслад скӧралан лунӧ, жалиттӧг начкин найӧс.

²² Гаж вылӧ моз быдласянь Тэ вайӧдін бырӧдысьӧс. Господьлӧн скӧралан лунӧ некод эз мездмы, некод ловйӧн эз коль. Найӧс, кодъясӧс ме чужті-быдті, бырӧдіс менӧ мустӧмтысь.