Ап. уджъяс 9 - Коми Библия 2023

Исус Кристос петкӧдчӧ Савллы

¹ Савл скӧрысла пыр на пуис Господьлӧн велӧдчысьяс вылӧ, зілис бырӧдны найӧс. Сійӧ локтіс аркирей дінӧ

² да корис сысянь дамаскса синагогаясӧ гижӧд, медым Исуслы эскысь айуловӧс да аньясӧс позис кӧртавны да вайӧдны Ерусалимӧ.

³ Дамаскӧ матыстчигӧн туй вылас Савл гӧгӧр виччысьтӧг югнитіс енэжсяньыс югыд.

⁴ Сійӧ усис муас да кыліс шыасьӧм: «Савл, Савл, мыйла вӧтлан Менӧ?»

⁵ Сійӧ юаліс: «Коді Тэ, Господьӧй?» Господь шуис сылы: «Ме эм Исус, кодӧс тэ вӧтлан. Сьӧкыд тэныд мунны ёсь зорлы паныд».

⁶ Савлӧс полӧм босьтіс, тіралӧмӧн сійӧ юаліс: «Господьӧй, мый Тэ тшӧктан меным вӧчны?» Господь шуис сылы: «Чеччы да мун карас. Сэні висьталасны, мый тэныд колӧ вӧчнысӧ».

⁷ Савлкӧд ӧтлаын локтысьяс шӧйӧвошӧмӧн сулалісны. Найӧ кылісны сёрни, а висьталысьсӧ эз аддзыны.

⁸ Савл чеччис муысь, восьтіс синсӧ, но нинӧм эз аддзы. Киӧдыс кутӧмӧн сійӧс вайӧдісны Дамаскӧ.

⁹ Куим лун чӧж сійӧ нинӧм эз аддзы, оліс сёйтӧг-ютӧг.

¹⁰ Дамаскын оліс Ананий, Господьлӧн велӧдчысь. Господь петкӧдчис сылы да шуис: «Ананий!» Сійӧ вочавидзис: «Тані ме, Господьӧй».

¹¹ Господь шуис сылы: «Чеччы да мун Веськыд нима туй вылӧ. Юав Иуда керкаысь Тарсын чужлӧм Савл нима мортӧс. Ӧні сійӧ кевмысьӧ.

¹² Сійӧ аддзыліс Енсянь петкӧдчылӧм, мый Ананий нима морт локтас, пуктылас сы вылӧ кисӧ, да сійӧ кутас аддзыны».

¹³ Ананий вочавидзис: «Господьӧй, ме унасянь кывлі тайӧ мортыс йылысь, мыйта лёк сійӧ вӧчис Тэнад вежа войтырлы Ерусалимын.

¹⁴ Сылӧн эм аркирейяссянь гижӧд, та вӧсна вермас босьтны быдӧнӧс, коді шыасьӧ Тэ дінӧ».

¹⁵ Господь шуис: «Мун. Ме бӧрйи сійӧс кесъявны Меным, юӧртны Менсьым нимӧс войтыръяслы да ӧксыяслы, тшӧтш Израиль войтырлы.

¹⁶ Ме петкӧдла сылы, мыйта сьӧкыд ковмас нуны сылы Менам ним вӧсна».

¹⁷ Ананий муніс, пырис Иуда керкаӧ да Савл вылӧ кисӧ пуктӧмӧн шуис: «Савл вокӧй! Менӧ мӧдӧдіс тэ дінӧ Господь Исус, коді петкӧдчис тэныд туй вылын. Сійӧ мӧдӧдіс менӧ, медым тэ бара кутін аддзыны да тырин Вежа Лолӧн».

¹⁸ Пырысь-пыр Савл синмысь быттьӧ чери сьӧм усис, да сійӧ пондіс аддзыны. Сэсся дзик пыр чеччис да пыртчис.

¹⁹ Та бӧрын сёйыштіс да ёнмис. Кымынкӧ лун Савл оліс велӧдчысьяскӧд Дамаскын.

Савл юӧртӧ Исус йылысь Дамаскын да Ерусалимын

²⁰ Савл дзик пыр пондіс юӧртны-висьтавны синагогаясын, мый Исус эм Ен Пи.

²¹ Кывзысьяс ёна шензисны: «Эз-ӧ тайӧ мортыс бырӧдав Ерусалимын Исус нимӧ шыасьысьясӧс? Эз-ӧ сійӧ лок татчӧ, медым босьтны найӧс да нуӧдны аркирейяс водзӧ?»

²² А Савл ёнджыка на висьталіс да эскӧдіс, мый Исус эм Кристос. Тайӧн весьӧпӧртіс Дамаскын олысь иудейясӧс.

²³ Кад мысти иудейяс сёрнитчисны вины Савлӧс.

²⁴ Тайӧ кывсис Савллы. Иудейяс лун и вой кыйӧдчисны карса дзиръя дорын, медым вины сійӧс.

²⁵ Войнас велӧдчысьяс пуксьӧдісны Савлӧс ыджыд чуманӧ да лэдзисны карса стен бердӧд.

²⁶ Ерусалимӧ воӧм бӧрын Савл зілис ӧтувтчыны велӧдчысьяскӧд. Но найӧ ставныс полісны сыысь, эз эскыны, мый сійӧ тшӧтш Господьлӧн велӧдчысь.

²⁷ Сэки Варнава отсаліс Савллы, вайӧдіс сійӧс апостолъяс дінӧ да висьталіс налы, мый Савл аддзылӧма Господьӧс, да Господь сёрнитӧма сыкӧд. Нӧшта висьталіс, кыдзи Савл Дамаскын повтӧг юӧртӧма Исус йылысь.

²⁸ Та бӧрти Савл оліс да ветлӧдліс накӧд Ерусалимын да повтӧг висьтавліс Господь Исус йылысь.

²⁹ Сійӧ сёрнитліс да вензьывліс грек кывйӧн сёрнитысь иудейяскӧд, а найӧ пыр кӧсйисны вины сійӧс.

³⁰ Тайӧс тӧдмалӧм бӧрын вокъяс нуӧдісны Савлӧс Кесарияӧ, сэсянь мӧдӧдісны Тарсӧ.

³¹ Став Иудея, Галилея да Самария пасьтала вичкояс олісны лӧня. Найӧ олісны Господьысь полӧмӧн да лунысь-лун ёнмисны. Вежа Лов ышӧдӧм улын вичкоясын эскысьяслӧн лыдыс содіс.

Петыр Лиддаын да Иоппияын

³² Вичкояс кытшовтігӧн Петыр локтіс Лиддаын олысь вежа войтыр дінӧ.

³³ Сэтысь сійӧ аддзис Эней нима мортӧс, коді кӧкъямыс во нин куйлӧма чеччывтӧг.

³⁴ Петыр шуис сылы: «Эней, Исус Кристос бурдӧдӧ тэнӧ. Чеччы да лӧсьӧд вольпасьтӧ». Сійӧ дзик пыр чеччис.

³⁵ Лиддаын да Шаронын олысьяс ставныс аддзылісны тайӧс да бергӧдчисны Господьлань.

³⁶ Иоппияын оліс Тавита ань, сылӧн нимыс лоӧ: газель. Тайӧ аньыс тшӧтш вӧлі велӧдчысьяс лыдын. Уна бур сійӧ вӧчис йӧзыслы, отсасис гӧльяслы.

³⁷ Сійӧ лунъясӧ Тавита висьмис да куліс. Сійӧс мыськалісны да пуктісны вылыс вежӧсас.

³⁸ Велӧдчысьяс кор кылісны, мый Петыр Лиддаын, Иоппиясянь неылын, мӧдӧдісны кык мортӧс корны Петырӧс, мед сійӧ дзик пыр локтас на дінӧ.

³⁹ Петыр чеччис да локтіс накӧд. Воӧм мыстиыс Петырӧс нуӧдісны вылыс вежӧсас. Дӧваяс кытшалісны сійӧс да бӧрдӧмсорӧн петкӧдлісны Тавита киӧн вурӧм дӧрӧм-паськӧм.

⁴⁰ Петыр тшӧктіс петны ставныслы, ачыс пидзӧс вылас сувтӧмӧн кутіс кевмысьны. Сэсся шойланьыс бергӧдчӧмӧн шуис: «Тавита, чеччы!» Тавита восьтіс синсӧ, видзӧдліс Петыр вылӧ да пуксис.

⁴¹ Петыр мыччис сылы кисӧ да отсаліс чеччыны. Сэсся корис дӧваясӧс да мукӧд эскысьясӧс, да сувтӧдіс на водзӧ ловъя Тавитаӧс.

⁴² Та йылысь кывсис став Иоппия пасьтала, и унаӧн сэки эскисны Господьлы.

⁴³ Петыр дыркодь на оліс Иоппияын кучик вӧчысь Симон ордын.