Ап. уджъяс 8 - Коми Библия 2023

Савл дзескӧдӧ эскысьясӧс

¹ Степанӧс виӧмсӧ Савл лыддис буртор вӧчӧмӧн. Сійӧ лунсяньыс Ерусалимын ёна кутісны вӧтлыны эскысьясӧс. Апостолъясысь кындзи ставныс найӧ разӧдчисны Иудея да Самария пасьтала.

² Вежавидзысь йӧз гуалісны Степанӧс, ыджыд бӧрдӧмӧн колльӧдісны сійӧс.

³ Савл жӧ зілис бырӧдны эскысьясӧс, ветліс керкаысь керкаӧ да мырдысьӧн йӧрталіс айуловӧс да аньясӧс дзескыдінӧ.

Филип Самарияын

⁴ Разӧдчӧм эскысьяс ветлӧдлісны да висьтавлісны Бур Юӧр.

⁵ Самарияын Филип локтіс ӧти карӧ да сэні висьтавліс Кристос йылысь.

⁶ Кор йӧзыс кылісны Филиплысь висьталӧмсӧ да аддзисны шензьӧданаторъяс вӧчӧмсӧ, пондісны сюся кывзыны сійӧс.

⁷ Уна пытшкысь лёкысь горзӧмӧн петісны пеж ловъяс, унаӧн вӧрзьӧдчыны вермытӧмъясысь да чотысьясысь бурдісны.

⁸ Став карыс ёна нимкодясис.

⁹ Тайӧ карас оліс Симон нима морт. Аслас туналӧмӧн сійӧ шензьӧдліс Самарияын олысьясӧс. Асьсӧ сійӧ ыджыд мортӧ пуктіс.

¹⁰ Быдӧн ичӧтсянь гырысьӧдз сюся кывзіс сійӧс да шуис, сійӧ пӧ Енлӧн ыджыд выныс.

¹¹ Йӧзыс кывзісны сійӧс, ӧд дыр кад чӧж сійӧ шензьӧдіс найӧс тунасьӧмнас.

¹² Но кор кылісны Енлӧн Юралӧм йылысь да Исус Кристос йылысь Бур Юӧр, эскисны Филиплы, сэсся айулов да аньяс ставныс пыртчисны.

¹³ Ачыс Симон тшӧтш эскис. Пыртчӧм бӧрас сійӧ эз вешйыв Филип дінысь, ёна шензис ыджыд вынӧн вӧчӧм шензьӧданаторъяс вылӧ.

¹⁴ Ерусалимын апостолъяс кор кылісны, мый Самарияын сибӧдӧмаӧсь Енлысь кывсӧ, мӧдӧдісны сэтчӧ Петырӧс да Иоанӧс.

¹⁵ Самарияӧ воӧм бӧрын найӧ кевмысисны, медым эскысьяс сибӧдасны Вежа Лолӧс.

¹⁶ На вылӧ абу на вӧлі лэччӧма Вежа Лолыс, найӧс сӧмын пыртӧма вӧлі Господь Исус нимӧн.

¹⁷ Апостолъяс пуктылісны на вылӧ кинысӧ, сэки Вежа Лов лэччис на вылӧ.

¹⁸ Симон аддзис, мый апостолъяслӧн ки пуктылӧм пыр эскысьяс тырӧны Вежа Лолӧн, сэки вайис апостолъяслы сьӧм

¹⁹ да шуис: «Сетӧй меным татшӧм вынсӧ, медым менам ки пуктылӧм пыр тшӧтш тырисны Вежа Лолӧн».

²⁰ Петыр шуис сылы: «Тэнад эзысьыд мед сісьмас тэкӧд тшӧтш. Тэ мӧвпыштін ньӧбны Енмыслысь козинсӧ!

²¹ Тэныд весиг гыж ыджда пай оз вичмы таысь, ӧд тэнад сьӧлӧмыд абу веськыд Ен водзас.

²² Бергӧдчы аслад лёк вӧчӧмысь да кевмысь Енлы, гашкӧ, Сійӧ прӧститас тэнсьыд лёк мӧвптӧ.

²³ Ме аддза, тэ курыд сӧптӧн тырӧмыд, лёкыс кӧрталӧма тэнӧ».

²⁴ Симон воча шуис: «Кевмысьӧй ме вӧсна Господьлы, медым эз су менӧ тіян шуӧмныд».

²⁵ Господь йылысь да Сылысь велӧдӧмсӧ висьталӧм бӧрын апостолъяс бӧр мунісны Ерусалимӧ. Мунігмозныс найӧ висьтавлісны Евангелльӧ Самария сиктъясын.

Филип пыртӧ эфиопияса мортӧс

²⁶ Господьлӧн андел шуис Филиплы: «Луншӧр кадӧ чеччы да мун Ерусалимысь Газаӧ мунан эновтӧм туй вылӧ».

²⁷ Филип чеччис да петіс туйӧ. Сійӧ кадас сэті муніс эфиопияса ыджыд чина морт, евнук, эфиопияса кандакиялӧн – ӧксы-аньлӧн – став овмӧснас веськӧдлысь. Сійӧ вӧлі волӧма Ерусалимӧ юрбитны,

²⁸ ӧні бӧр муніс гортланьыс. Евнук пукаліс тарантасын да лыддис Исай пророклысь гижӧд.

²⁹ Вежа Лов шуис Филиплы: «Матыстчы тарантас дорас да мун орччӧн».

³⁰ Филип котӧрӧн матыстчис да кыліс, кыдзи тарантасын пукалысь лыддис Исай пророклысь гижӧд. Филип юаліс: «Гӧгӧрвоан-ӧ, мый лыддян?»

³¹ Мӧдыс шуис: «Кыдзи нӧ верма гӧгӧрвонысӧ, абу кӧ гӧгӧрвоӧдысьыс?» Сійӧ корис Филипӧс пуксьыны орччӧн.

³² Гижӧдсьыс сійӧ лыддис татшӧм кывъяс: – Ыжӧс моз Сійӧс нуӧдісны начкыны, шырысь водзын чӧв олысь баля моз Сійӧ эз восьтлы Ассьыс вомсӧ.

³³ Сійӧс увтыртісны, эз веськыда мыждыны. Коді висьталас Сысянь чужысьяс йылысь, мувывса олӧмсӧ кӧ Сылысь орӧдасны?

³⁴ Евнук шуис Филиплы: «Висьтав, код йылысь пророкыс шуӧма тайӧс? Ас йывсьыс али мӧд йылысь?»

³⁵ Сэки Филип тайӧ гижӧдсяньыс пондіс висьтавны сылы Исус йылысь Бур Юӧрсӧ.

³⁶ Сэккості найӧ воисны вадорӧ, евнук шуис: «Со ваыс. Мый менӧ кутӧ пыртчӧмысь?»

³⁷ Филип шуис сылы: «Став сьӧлӧмсяньыд кӧ эскан, позьӧ». Евнук вочавидзис: «Эска, мый Исус Кристос – Ен Пи».

³⁸ Сэсся тшӧктіс сувтӧдны тарантассӧ да найӧ кыкнанныс пырисны ваӧ. Филип пыртіс сійӧс.

³⁹ Ваысь петӧм бӧрын Вежа Лов лэччис евнук вылӧ. А Господьлӧн андел босьтіс Филипӧс, и евнук эз нин аддзы сійӧс. Евнук долыдпырысь водзӧ муніс аслас туйӧд.

⁴⁰ Бӧрынджык Филипӧс аддзисны Азот карысь. Кесарияӧ мунігӧн сійӧ быд карын висьтавліс Бур Юӧр.