Ап. уджъяс 5 - Коми Библия 2023

Ананий да Сапфира

¹ Ананий нима морт Сапфира гӧтырыскӧд вузаліс овмӧссӧ.

² Босьтӧм сьӧмсьыс Ананий мыйтакӧ торйӧдіс аслыс, гӧтырыс тшӧтш тӧдіс та йылысь. Коляссӧ Ананий вайис апостолъяслы.

³ Петыр шуис сылы: «Ананий, мыйла тэ лэдзин сӧтанаыслы ыджыдавны сьӧлӧмад? Вузалӧм муыдлысь донсӧ дзебӧмнад тэ пӧръялін Вежа Лолӧс.

⁴ Эз ӧмӧй ас киад вӧв овмӧсыд да босьтӧм сьӧмыд? Мыйла тэ сьӧлӧмад лэдзин мӧвп тадзи вӧчны? Тэ эн мортӧс пӧръяв, тэ пӧръялін Енмӧс».

⁵ Тайӧс кылӧм бӧрын Ананий усис да сылӧн лолыс петіс. Та йылысь кывлысьясӧс ставнысӧ ыджыд полӧм босьтіс.

⁶ Том йӧз пасьтӧдісны Ананийӧс дзебан паськӧмӧн, сэсся петкӧдісны да гуалісны сійӧс.

⁷ Час куим мысти локтіс Ананийлӧн гӧтырыс. Лоӧмтор йывсьыс сійӧ, дерт, нинӧм на эз тӧд.

⁸ Петыр юаліс сылысь: «Висьтав меным, та донысь-ӧ мутӧ вузалінныд?» Сійӧ шуис: «Та донысь».

⁹ Петыр шуис: «Мыйла нӧ сёрнитчӧмныд пӧрйӧдлыны Господьлысь Ловсӧ? Кылан-ӧ ӧдзӧс сайысь кок шыяссӧ? Тэнсьыд верӧстӧ гуалысьяс локтӧны, ӧні тэнӧ тшӧтш петкӧдасны».

¹⁰ Дзик пыр Сапфира усис Петыр кок дорӧ да сылӧн лолыс петіс. Пырысьяс аддзисны сійӧс кулӧмаӧн, сэки петкӧдісны да гуалісны сійӧс верӧсыскӧд орччӧн.

¹¹ Ыджыд полӧм босьтіс став эскысьясӧс да быдӧнӧс, коді та йылысь кывліс.

Апостолъяс вӧчӧны шензьӧданаторъяс

¹² Уна шензьӧданатор индысьпасъясӧн вӧчисны апостолъяс йӧз пӧвстын. Эскысьяс ӧти сьӧлӧмӧн чукӧртчывлісны Соломон йӧрӧ.

¹³ Йӧзыс полісны ӧтувтчыны накӧд, но ошкисны найӧс.

¹⁴ Тадзи Господьлы эскысьяслӧн лыдыс пыр содіс, на пӧвстын вӧліны айулов и аньяс.

¹⁵ Йӧзыс петкӧдлісны висьысьясӧс вольпасьнас ывлаӧ да водтӧдавлісны туй бокӧ, медым мунігас Петырлӧн вуджӧрыс веськаліс на вылӧ.

¹⁶ Уна йӧз воліс Ерусалимӧ матігӧгӧр каръясысь. Найӧ вайӧдлісны висьысьясӧс да пеж лолӧн кутӧмаясӧс. И ставныс найӧ бурдісны.

Апостолъясӧс босьтӧм

¹⁷ Аркирейлӧн да сы дор сулалысь саддукейяслӧн чужис ыджыд лӧглун апостолъяс дінӧ.

¹⁸ Найӧ босьтісны апостолъясӧс да йӧртісны дзескыдінӧ.

¹⁹ Войнас Господьлӧн андел восьтіс дзескыдінысь ӧдзӧсъяссӧ да петкӧдіс найӧс сэтысь. Андел шуис налы:

²⁰ «Мунӧй крамӧ да висьталӧй йӧзыслы тайӧ выль олӧм йывсьыс ставсӧ».

²¹ Апостолъяс кывзысисны да асывводзнас мунісны крамӧ, сэні пондісны велӧдны. Сійӧ кадас аркирей аслас йӧзкӧд корис веськӧдлан котырӧс да Израиль войтырлысь юрнуӧдысьясӧс, сэсся найӧ тшӧктісны вайӧдны дзескыдінысь апостолъясӧс.

²² Дзескыдінӧ воӧм мысти мӧдӧдӧмаяс эз аддзыны апостолъясӧс. Найӧ бӧр локтісны да юӧртісны:

²³ «Ми асланым синмӧн аддзылім, дзескыдінсӧ вӧлі бура йигналӧма, и ӧдзӧс водзас сулалісны видзысьяс. Но кор ми восьтім, некодӧс эгӧ аддзӧй сэтысь».

²⁴ Тайӧс кылӧмысь крам видзысьяслӧн веськӧдлысь да аркирейяс шай-паймунісны, кыдзи пӧ тайӧ вермис лоны.

²⁵ Сэки локтіс ӧти морт да висьталіс, дзескыдінӧ йӧртӧмаясыд пӧ крамынӧсь, йӧзсӧ велӧдӧны.

²⁶ Крам видзысьяслӧн веськӧдлысь муніс аслас йӧзкӧд да вайӧдіс апостолъясӧс. Но найӧ апостолъяслы лёксӧ эз вӧчны, ӧд полісны, мый йӧзыс вермасны найӧс асьнысӧ изъявны.

²⁷ Апостолъясӧс вайӧдісны да сувтӧдісны веськӧдлан котыр водзӧ. Аркирей юаліс налысь:

²⁸ «Ми ӧмӧй эгӧ чорыда ӧлӧдлӧй тіянӧс тайӧ нимнас велӧдӧмысь? Став Ерусалимсӧ шызьӧдінныд асланыд велӧдӧмӧн, нӧшта миянӧс мыжданныд сійӧ Мортсӧ виӧмысь».

²⁹ Петыр да мукӧд апостолъяс вочавидзисны: «Мортыслы ёнджыка колӧ кывзыны Енмӧс, а оз мортӧс.

³⁰ Миян батьяслӧн Ен ловзьӧдіс Исусӧс, кодӧс ті ӧшӧдінныд пу вылӧ да виинныд.

³¹ Енмыс пуксьӧдіс Сійӧс веськыдладорас, индіс Сійӧс Юралысьӧн да Мездысьӧн, медым Израиль вермис бергӧдчыны мыжъяссьыс да босьтны прӧститӧмсӧ.

³² Ми тӧдам тайӧс, та вӧсна и висьталам. Висьталӧ та йылысь тшӧтш Вежа Лов, кодӧс Енмыс сетӧ Сылысь кывзысьысьяслы».

³³ Тайӧс кылӧм бӧрын став веськӧдлан котырыс пузис скӧрысла, найӧ дасьӧсь вӧліны вины апостолъясӧс.

³⁴ Сэки сувтіс веськӧдлан котырысь Гамалиэл нима фарисей, Индӧдӧ велӧдысь, кодӧс пыдди пуктісны став йӧзыс. Сійӧ тшӧктіс кад кежлӧ петкӧдны сэтысь апостолъясӧс.

³⁵ Сэсся шуис веськӧдлан котырлы: «Израиль войтыр! Энӧ тэрмасьӧй тайӧ йӧзыскӧд мыйкӧ вӧчны.

³⁶ Та водзвылын, эз на ёна важӧн, кыпӧдчыліс Февдас, асьсӧ сійӧ зэв ыджыдӧн лыддис. Сы бӧрся муніс нёльсё гӧгӧр морт. Но сійӧс виӧм бӧрын сы бӧрся мунысьяс ставныс разалісны-вошисны.

³⁷ Та бӧрти вӧлі йӧзӧс гижалӧм. Буретш сэки кыпӧдчис Галилеяысь Иуда да кыскис ас бӧрсяыс уна йӧзӧс. Но сійӧ куліс, и сы бӧрся мунысьяс ставныс разалісны.

³⁸ Ӧні кӧсъя шуны тіянлы: ӧвсьӧй тайӧ йӧзсьыс, лэдзӧй найӧс. Мортсянь кӧ тайӧ уджыс, сійӧ киссяс,

³⁹ а Енсянь кӧ, ті онӧ вермӧй кисьтнысӧ. Видзчысьӧй Енлы паныд сувтӧмысь».

⁴⁰ Веськӧдлан котыр кывзысис Гамалиэллысь. Сэки корисны апостолъясӧс да чорыда ӧлӧдісны, медым эз висьтавлыны Исус йылысь, сэсся нӧйтӧм бӧрын лэдзисны найӧс.

⁴¹ Веськӧдлан котыр дінысь апостолъяс мунісны долыдпырысь, ӧд Господь Исуслӧн ним вӧсна найӧ шогмисны увтыртӧм туйӧ.

⁴² Быд лун крамын да гортъясаныс найӧ велӧдісны да висьтавлісны Исус Кристос йылысь Бур Юӧр.